തിരുവനന്തപുരം : കേരളം കടുത്ത വൈദ്യുതിക്ഷാമമാണ് ഇപ്പോൾ നേരിട്ടുകൊണ്ടിരിക്കുന്നത്. വൈദ്യുതി നിയന്ത്രണം ഒഴിവാക്കുന്നതിനായി ഉപഭോക്താക്കൾ സഹകരിക്കണമെന്നാണ് കെഎസ്ഇബിയുടെ പുതിയ അറിയിപ്പ്. സമൂഹമാദ്ധ്യമങ്ങളിലൂടെയാണ് കെഎസ്ഇബി വൈദ്യുതി നിയന്ത്രണം ഒഴിവാക്കാനായി ഉപഭോഗത്തിന്റെ കാര്യത്തിൽ ഉപഭോക്താക്കൾ സഹകരിക്കണമെന്ന് അറിയിച്ചത്.
സാങ്കേതിക തകരാറിനെ തുടർന്ന് വിവിധ കേന്ദ്ര വൈദ്യുതി നിലയങ്ങളിൽ നിന്ന് സംസ്ഥാനത്തിന് ലഭിച്ചു കൊണ്ടിരുന്ന വൈദ്യുതിയിൽ അപ്രതീക്ഷിതമായി 300 മെഗാവാട്ടോളം കുറവുണ്ടായിട്ടുണ്ട്. സംസ്ഥാനത്തിന്റെ മൊത്തം വൈദ്യുതി ലഭ്യതയിൽ വന്ന കുറവ് കാരണം വൈദ്യുതി നിയന്ത്രണമേർപ്പെടുത്തേണ്ട സാഹചര്യമാണ് ഇപ്പോഴുള്ളത് എന്നും കെഎസ്ഇബി അറിയിച്ചു.
നിയന്ത്രണം ഒഴിവാക്കുന്നതിനായി വൈകുന്നേരം 6 മണി മുതൽ രാത്രി 11 വരെ അത്യാവശ്യമല്ലാത്ത വൈദ്യുതി ഉപകരണങ്ങൾ പ്രവർത്തിപ്പിക്കാതെ ഉപയോഗം പരമാവധി നിയന്ത്രിക്കാൻ മാന്യ ഉപഭോക്താക്കൾ തയ്യാറാകണമെന്ന് കെഎസ്ഇബി അഭ്യർത്ഥിച്ചു. കാലവർഷത്തിൽ വന്ന കുറവ് കൂടുതൽ വില കൊടുത്തു വൈദ്യുതി വാങ്ങേണ്ട അവസ്ഥയാണ് കെഎസ്ഇബിക്ക് സൃഷ്ടിച്ചിരിക്കുന്നത്.
