‘രാജ്യം മുന്നോട്ട് പോകുമ്പോൾ കേരളം പിന്നോട്ട് പോകുന്നു‘: ഉത്തരവാദികൾ ഇരു മുന്നണികളുമെന്ന് അനിൽ കെ ആന്റണി

ന്യൂഡൽഹി: മനസുകൊണ്ട് ആഗ്രഹിക്കുന്ന മാറ്റം യാഥാർത്ഥ്യമാക്കാൻ കേരളത്തിലെ ജനങ്ങൾക്ക് കൈവന്നിരിക്കുന്ന സുവർണാവസരമാണ് പുതുപ്പള്ളി ഉപതിരഞ്ഞെടുപ്പെന്ന് ബിജെപി ദേശീയ സെക്രട്ടറി അനിൽ കെ ആന്റണി. അവിശ്വസനീയമായ വേഗത്തിലാണ് കഴിഞ്ഞ 9.5 വർഷം കൊണ്ട് ഇന്ത്യ വളർന്നത്. എന്നാൽ കഴിഞ്ഞ 10 വർഷം കൊണ്ട് കേരളത്തിൽ എന്താണ് സംഭവിച്ചു കൊണ്ടിരിക്കുന്നതെന്ന് ജനം സ്വയം വിലയിരുത്തണമെന്ന് അദ്ദേഹം പറഞ്ഞു.

രാജ്യം മുന്നേറുമ്പോൾ കേരളം പിന്നോട്ട് പോവുകയാണ്. മാറി മാറി അധികാരത്തിൽ വരുന്ന ഇരു മുന്നണികളും കേരളത്തിന്റെ യഥാർത്ഥ വളർച്ചാ സാദ്ധ്യതകളെ പിന്നോട്ടടിക്കുകയാണ്. സംസ്ഥാനം സാമൂഹികമായോ സാമ്പത്തികമായോ പുരോഗതി കൈവരിക്കുന്നില്ലെന്ന് അനിൽ കെ ആന്റണി പറഞ്ഞു.

ഇത് മാറ്റത്തിനുള്ള സമയമാണ്. കേരളത്തിലേക്ക് വികസനം പറഞ്ഞ് കടന്നു വരാൻ ധൈര്യമുള്ള ഒരേയൊരു പാർട്ടി ബിജെപിയാണ്. ഈ തിരഞ്ഞെടുപ്പോടെ കേരളത്തിൽ വലിയ മാറ്റങ്ങൾക്ക് കളമൊരുങ്ങുമെന്നും അനിൽ കെ ആന്റണി വ്യക്തമാക്കി.