തിരുവനന്തപുരം : ആറ്റിങ്ങലിൽ പോലീസിന് നേരെ ട്രാൻസ്ജെൻഡർ വ്യക്തികളുടെ ആക്രമണം. പട്രോളിംഗ് നടത്തുകയായിരുന്ന പോലീസുകാർക്ക് നേരെയായിരുന്നു ആക്രമണം ഉണ്ടായത്. പോലീസ് കൺട്രോൾ റൂം വാഹനത്തിന്റെ ചില്ല് ഇവർ അടിച്ചു തകർത്തതായാണ് പോലീസ് പറയുന്നത്. സംഭവത്തിൽ എട്ട് പേരെ പോലീസ് അറസ്റ്റ് ചെയ്തിട്ടുണ്ട്.
ചൊവ്വാഴ്ച പുലർച്ചെയായിരുന്നു എട്ട് ട്രാൻസ്ജെൻഡർ വ്യക്തികൾ ചേർന്ന് പോലീസിനെ ആക്രമിച്ചത്. ആറ്റിങ്ങൽ മാമം ഗ്രൗണ്ടിന് സമീപത്തായി സാമൂഹ്യവിരുദ്ധ പ്രവർത്തനങ്ങൾ നടക്കുന്നുവെന്ന് നേരത്തെ തന്നെ വ്യാപകമായ പരാതി ഉയർന്നിരുന്നു. ഈ കാരണത്താൽ പോലീസ് ഈ പരിസരപ്രദേശങ്ങളിൽ പട്രോളിംഗ് ശക്തമാക്കിയിരുന്നു. ചൊവ്വാഴ്ച പുലർച്ചെ 3:00 മണിയോടെ ഈ പരിസരത്ത് നിരീക്ഷണത്തിനായി എത്തിയ പോലീസ് വാഹനത്തിനും ഉദ്യോഗസ്ഥർക്കും നേരെയാണ് ആക്രമണം ഉണ്ടായത്.
മാമം ഗ്രൗണ്ടിന് സമീപത്തായി രാത്രികാലങ്ങളിൽ പിടിച്ചുപറി അടക്കമുള്ള സാമൂഹ്യവിരുദ്ധ പ്രവർത്തനങ്ങൾ നടക്കുന്നതായി നാട്ടുകാരിൽ പലർക്കും പരാതിയുണ്ട്. ഇത്തരം സാഹചര്യങ്ങൾ നിരീക്ഷിക്കാനാണ് ഹൈവേ പോലീസ് കൺട്രോൾ റൂം സംഘം ഇവിടെ പട്രോളിംഗ് നടത്തിയത്. എന്നാൽ ഇവിടെ എത്തിയ പോലീസിന്റെ വാഹനത്തിന് നേരെയും പോലീസ് ഉദ്യോഗസ്ഥർക്ക് നേരെയും കല്ലേറും ആക്രമണവും ഉണ്ടാവുകയായിരുന്നു. തുടർന്ന് സംഘത്തിൽ ഉണ്ടായിരുന്ന 8 ട്രാൻസ്ജെൻഡർ വ്യക്തികളെ പോലീസ് അറസ്റ്റ് ചെയ്തു.
