തിരുവനന്തപുരം: സംസ്ഥാനത്തെ മഴ മുന്നറിയിപ്പിൽ മാറ്റം വരുത്തി കാലാവസ്ഥാ നിരീക്ഷണ കേന്ദ്രം. വരും മണിക്കൂറിൽ മഴ കനക്കാൻ സാദ്ധ്യതയുള്ള പശ്ചാത്തലത്തിലാണ് മഴ മുന്നറിയിപ്പിൽ മാറ്റം വരുത്തിയത്. ശക്തമായ മഴ ലഭിക്കാൻ സാദ്ധ്യതയുള്ളതിനാൽ 9 ജില്ലകളിൽ യെല്ലോ അലർട്ട് ഏർപ്പെടുത്തി.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട് എന്നീ ജില്ലകളിലാണ് യെല്ലോ അലർട്ട്. നേരത്തെ തിരുവനന്തപുരം മുതൽ ഇടുക്കിവരെയുള്ള ജില്ലകളിൽ മാത്രമാണ് മഴ മുന്നറിയിപ്പ് പുറപ്പെടുവിച്ചിരുന്നത്. എന്നാൽ മദ്ധ്യകേരളത്തിൽ മഴ കനക്കാൻ സാദ്ധ്യതയുള്ളതിനാൽ മാറ്റം വരുത്തുകയായിരുന്നു. യെല്ലോ അലർട്ട് ഏർപ്പെടുത്തിയ ജില്ലകളിൽ ഒറ്റപ്പെട്ട ശക്തമായ മഴയാണ് ലഭിക്കുക. യെല്ലോ അലർട്ട് ഇല്ലെങ്കിലും മറ്റ് ജില്ലകളിലും മഴയുണ്ടാകും. മലയോര മേഖലയിൽ ഉള്ളവർ പ്രത്യേകം ജാഗ്രത പാലിക്കണമെന്നും കാലാവസ്ഥാ നിരീക്ഷണ കേന്ദ്രം അറിയിച്ചിട്ടുണ്ട്.
പടിഞ്ഞാറൻ ഝാർഖണ്ഡിനും, തെക്കൻ തമിഴ്‌നാടിനും മുകളിലായി ചക്രവാതച്ചുഴികൾ നിലനിൽക്കുന്നുണ്ട്. ഇതാണ് നിലവിൽ സംസ്ഥാനത്ത് ശക്തമായ മഴയ്ക്ക് കാരണം ആകുന്നത്. അതേസമയം വരും ദിവസങ്ങളിൽ ചുഴലിക്കാറ്റിന് സാദ്ധ്യതയുണ്ടെന്നും സൂചനയുണ്ട്.
Discussion about this post