മലപ്പുറം : മിന്നൽ ചുഴലിയെ തുടർന്ന് മലപ്പുറത്ത് വ്യാപക നാശനഷ്ടം. മലപ്പുറം വടക്കാങ്ങര പള്ളിപ്പിടിയിലാണ് മിന്നൽ ചുഴലി നാശം വിതച്ചത്. നിരവധി മരങ്ങൾ കടപുഴകി വീണതാണ് വലിയ നാശത്തിന് കാരണമായത്. മരം വീണ് ഇലക്ട്രിക് പോസ്റ്റുകളും വീടുകളും തകർന്നിട്ടുണ്ട്.
കഴിഞ്ഞ രണ്ടു ദിവസമായി മലപ്പുറത്ത് ഇടവിട്ടുള്ള മഴ തുടരുന്നുണ്ട്. ഇതിനിടെയാണ് ഇന്ന് പള്ളിപ്പിടിയിലെ ഒരു ചെറിയ പ്രദേശത്ത് മാത്രമായി മിന്നൽ ചുഴലി ഉണ്ടായത്. ആറോളം വലിയ മരങ്ങൾ ചുഴലിയിൽപ്പെട്ട് കടപുഴകി വീണു. മൂന്ന് വീടുകൾക്ക് വലിയ രീതിയിൽ കേടുപാടുകൾ സംഭവിച്ചിട്ടുണ്ട്.
മിന്നൽ ചുഴലിയിൽ പള്ളിപ്പടിയിൽ ആളപായം ഉണ്ടായിട്ടില്ല . ശക്തമായ കാറ്റിനെ തുടർന്ന് പലരും വീടിനു പുറത്തേക്ക് ഓടിയിറങ്ങി സുരക്ഷിതസ്ഥാനങ്ങളിലേക്ക് മാറിയതിനാലാണ് വലിയ അപകടം ഒഴിവായത്. ശക്തമായ കാറ്റിനെ തുടർന്ന് പ്രദേശത്ത് മൂന്ന് തെങ്ങുകൾ മറിഞ്ഞുവീണു. മിന്നൽചുഴലിയെ തുടർന്ന് അഞ്ചോളം ഇലക്ട്രിക് പോസ്റ്റുകളും തകർന്നിട്ടുണ്ട്.
