വലിപ്പത്തിൽ ചെറിയവൻ ആണെങ്കിലും ഗുണങ്ങളുടെ കാര്യത്തിൽ അതികായനാണ് ഏലയ്ക്ക. വിറ്റാമിൻ ബി6, വിറ്റാമിൻ ബി3, വിറ്റാമിൻ സി, സിങ്ക്, കാത്സ്യം, പൊട്ടാസ്യം എന്നിങ്ങനെയുള്ള നിരവധി ഘടകങ്ങൾ ഏലയ്ക്കയിൽ അടങ്ങിയിട്ടുണ്ട്. അതിനാൽ തന്നെ ഏലക്ക കഴിക്കുന്നത് ധാരാളം ഗുണങ്ങൾ ശരീരത്തിന് പ്രദാനം ചെയ്യും. ഏലയ്ക്ക കൊണ്ട് തയ്യാറാക്കുന്ന ചായ പതിവാക്കുന്നത് വഴി ശരീരത്തിന് ലഭ്യമാകുന്ന ഗുണങ്ങൾ നിരവധിയാണ്.
ദഹനക്കേട് , നെഞ്ചെരിച്ചിൽ, വയറുവേദന എന്നിവയുൾപ്പെടെയുള്ള ദഹനപ്രശ്നങ്ങളുടെ ലക്ഷണങ്ങൾ കുറയ്ക്കാൻ ഏലയ്ക്കാ ചായ സഹായിക്കുന്നതാണ്. ഈ ചായയിൽ ആൻറി-ഇൻഫ്ലമേറ്ററി ഗുണങ്ങളുണ്ട്. ഇത് വയറുവേദനയ്ക്ക് കാരണമാകുന്ന പ്രശ്നങ്ങളെ ശമിപ്പിക്കാൻ സഹായിക്കുന്നു. ഏലക്കായയിൽ ഉള്ള കാർമിനേറ്റീവ് ഗുണങ്ങൾ ഗ്യാസ്ട്രബിൾ കൊണ്ടുള്ള വയറു വീർക്കൽ തടയാൻ സഹായിക്കുന്നു. ആന്റി ഓക്സിഡന്റുകള് ധാരാളം അടങ്ങിയ ഏലയ്ക്ക ഉയര്ന്ന രക്തസമ്മര്ദ്ദം നിയന്ത്രിക്കാനും സഹായിക്കുന്നതാണ്.
ഏലയ്ക്കയിൽ അടങ്ങിയിട്ടുള്ള ആന്റി ഓക്സിഡന്റുകൾ രോഗപ്രതിരോധശേഷി വർദ്ധിപ്പിക്കാൻ സഹായകരമാണ്. ഹൃദയത്തിന്റെ ആരോഗ്യത്തിനും രക്തക്കുഴലുകളിലെ വീക്കം കുറയ്ക്കാനും രക്തചംക്രമണം മെച്ചപ്പെടുത്താനും ഹൃദയാഘാത സാധ്യത കുറയ്ക്കാനും ഏലയ്ക്ക സഹായിക്കും. ഏലയ്ക്കയിൽ വലിയ അളവിൽ പൊട്ടാസ്യം അടങ്ങിയിട്ടുണ്ടെന്ന് ഗവേഷണങ്ങൾ കാണിക്കുന്നു. ഇത് രക്തക്കുഴലുകളിലെ മർദ്ദം കുറയ്ക്കുന്നതിനുള്ള ഒരു വാസോഡിലേറ്ററായി പ്രവർത്തിക്കുന്നതാണ്.
ശരീരത്തിൽ കൊഴുപ്പ് അടിഞ്ഞുകൂടുന്നത് കുറയ്ക്കാനും ശരീര ഭാരം കുറയ്ക്കുന്നതിനും ഏലയ്ക്ക സഹായകരമാണ്. ചുമ, ജലദോഷം, ശ്വാസംമുട്ടല്, തൊണ്ടയിലെ അണുബാധ എന്നീ പ്രശ്നങ്ങൾക്കും ഏലയ്ക്ക മികച്ച ഒരു പ്രതിവിധിയാണ്. ഏലയ്ക്കാ ചായ പതിവാക്കുന്നത് സമ്മർദ്ദം കുറയ്ക്കുകയും മാനസികാരോഗ്യം വർദ്ധിപ്പിക്കുകയും ചെയ്യുന്നതാണ്. കൂടാതെ പ്രകൃതിദത്തമായ ആന്റി ബാക്ടീരിയൽ ഗുണങ്ങൾ അടങ്ങിയിട്ടുള്ള ഏലയ്ക്ക വായിലെ പ്രശ്നങ്ങൾ അകറ്റാനും വായ്നാറ്റം ഇല്ലാതാക്കാനും സഹായിക്കുന്നതാണ്.
Discussion about this post