അംഗബലം കൊണ്ടും ആയുധബലം കൊണ്ടും ലോകത്തെ തന്നെ ശക്തമായ സേനകളിൽ ഒന്നാണ് ഇസ്രായേൽ പ്രതിരോധ സേന. ഹമാസിനെതിരായ പോരാട്ടം കടുപ്പിച്ചതോടെ ഇസ്രായേലിന്റെ സൈനിക ശക്തി ലോകം ഒരിക്കൽ കൂടി തിരിച്ചറിഞ്ഞു. അത്യാധുനിക പ്രതിരോധ ആയുധങ്ങളും സംവിധാനങ്ങളുമാണ് ഇസ്രായേൽ സേനയുടെ മുതൽ കൂട്ട്. ഇതിൽ ഏറ്റവും പ്രധാന്യം അർപ്പിക്കുന്ന ഒന്നാണ് ഗാസ അതിർത്തിയിൽ സൈന്യം വിന്യസിച്ചിട്ടുള്ള മെർക്കാവ ടാങ്ക്.
ഇസ്രായേൽ സേനയുടെ വജ്രായുധം എന്ന വിശേഷണം ഇണങ്ങുന്ന പ്രതിരോധ ആയുധമാണ് മെർക്കാവ ടാങ്കുകൾ. ഹീബ്രുവാക്കായ മെർക്കാവയുടെ അർത്ഥം രഥം എന്നാണ്. നിലവിൽ തെക്കൻ ഇസ്രായേലിന്റെ ഗാസ അതിർത്തിയിലാണ് സൈന്യം പ്രധാനമായും ഈ ടാങ്കുകൾ വിന്യസിച്ചിരിക്കുന്നത്.
1970 കളിൽ നിർമ്മാണം ആരംഭിച്ച മെർക്കാവ ടാങ്കുകൾ ഒൻപത് വർഷങ്ങൾക്ക് ശേഷം 1979 ലാണ് ഇസ്രായേൽ സേനയുടെ ഭാഗമായത്. മെർക്കാവ എംകെ 1 ആയിരുന്നു ആദ്യ പതിപ്പ്. ഒരു പതിറ്റാണ്ടിലധികം കാലം പിന്നിടുമ്പോൾ അഞ്ച് തലമുറകളിൽപ്പെട്ട മെർക്കാവ ടാങ്കുകളാണ് സേനയുടെ ആവനാഴിയിൽ ഉള്ളത്. ഇതിൽ ഏറ്റവും പുതിയ പതിപ്പ് സേന സ്വന്തമാക്കിയത് ആകട്ടെ ഈ വർഷവും. മെർക്കാവ ഫൈവ് ബറാക്ക് എന്നാണ് പുതിയ ടാങ്കുകൾ അറിയപ്പെടുന്നത്. ബറാക്ക് എന്നാൽ മിന്നൽ എന്നാണ് അർത്ഥം.
1982 ലെ ലെബനൻ യുദ്ധത്തിലാണ് മെർക്കാവ ടാങ്ക് ശത്രുക്കൾക്കെതിരെ ആദ്യമായി പോരാടിയത്. ഇതോടെ ഇസ്രായേൽ സേനയുടെ കരുത്ത് ലോകവും തിരിച്ചറിഞ്ഞു. തുടർന്നുള്ള സേനയുടെ നിലനിൽപ്പിന് പിന്നിലെ പ്രധാനികൂടിയാണ് മെർക്കാവ ടാങ്കുകൾ. ടാങ്കുകളിലെ ഒറ്റയാനായ മെർക്കാവ ഇസ്രായേൽ സേനയുടെ ഭാഗമായ മെർക്കാവ ആർമേഡ് കോംപാക്റ്റ് വെഹിക്കിൾ ഡിവിഷനാണ് വികസിപ്പിച്ചെടുത്തത്. തദ്ദേശീയമായി നിർമ്മിച്ച ഉപകരണങ്ങളാണ് ടാങ്കിന്റെ ഏറിയ ഭാഗവും എന്നത് ഇസ്രായേലിന്റെ കരുത്ത് ഒന്ന് കൂടി ഉയർത്തുന്നതാണ്.
ലോകത്തിലെ മറ്റ് ടാങ്കുകളെ അപേക്ഷിച്ച് സൈനികർക്ക് പരമാവധി സുരക്ഷ നൽകുന്നതാണ് മെർക്കാവ ടാങ്കുകൾ. ഇതിന് മുൻഭാഗത്തായി നൽകിയിട്ടുള്ള പ്രതിരോധ കവചമാണ് ഇത് സാദ്ധ്യമാക്കുന്നത്. ശക്തമായ കവചം ഷെല്ലാക്രമണങ്ങളെ ഉൾപ്പെടെ പ്രതിരോധിക്കുന്നു. മുൻപിൽ നിന്നുള്ള ആക്രമണങ്ങളെ ചെറുക്കാൻ ഈ കവചത്തിന് അനായാസം കഴിയും. അകത്തിരിക്കുന്ന ഡ്രൈവറുടെ ഉൾപ്പെടെ സുരക്ഷ ഈ ടാങ്കുകൾ ഉറപ്പാക്കുന്നു.
മുൻഭാഗാത്തായാണ് എൻജിൻ സ്ഥാപിച്ചിട്ടുള്ളത് എന്നതും മെർക്കാവയെ വ്യത്യസ്തമാക്കുന്നു. ചെങ്കുത്തായ മലനിരകളിൽ പോലും അനായാസ കുതിപ്പ് നടത്താൻ മെർക്കാവയ്ക്ക് കഴിയും. മറ്റ് ടാങ്കുകളെ അപേക്ഷിച്ച് നിർമ്മാണ ചിലവ് കുറവാണ് എന്നതും തകരാറുകൾ എളുപ്പത്തിൽ പരിഹരിക്കാമെന്നതും മെർക്കാവയുടെ മാത്രം സവിശേഷതയാണ്. ആധുനിക സെൽഫ് പ്രൊപ്പെൽഡ് ഹോവിറ്റ്സർ മാതൃകയിലാണ് ഇതിന്റെ നിർമ്മാണം. മറ്റ് ടാങ്കുകളെ അപേക്ഷിച്ചുള്ള കൂടുതൽ സംഭരണ ശേഷിയും മെർക്കാവയുടെ എടുത്ത് പറയേണ്ട സവിശേഷതയാണ്.
