കണക്കുകൂട്ടലുകൾ തെറ്റി പണികിട്ടിയോ? റീകൗണ്ടിംഗ് ആവശ്യമായി വരുന്നോ? ഈ വിദ്യകളുണ്ടെങ്കിൽ ഇനി ഉഡായിപ്പിന്റെ ആവശ്യമേ ഇല്ല

ഭൂഗോളത്തിന്റെ സ്പന്ദനം കണക്കിലാണെന്ന് ചാക്കോ മാഷ് ആവർത്തിച്ച് ആവർച്ച് പറഞ്ഞത് ഓർമ്മയില്ലേ. എന്തിനും ഏതിനും കണക്ക് വേണം. വട്ടത്തിൽ ചുടുന്ന ദോശയിലും ഓടിക്കിതയ്ക്കുന്ന ക്ലോക്കിലും കണക്കുണ്ട്. എന്നാൽ കണക്ക് കീറാമുട്ടിയാണെന്നാണ് പലരുടെയും പരാതി. കണക്ക് വെള്ളം കുടിപ്പിക്കുന്നുവേ എന്ന് പറയുന്നവർക്ക് ഈ വിഷയം തന്നെ കുറച്ച് എളുപ്പമാക്കാനുള്ള വിദ്യകൾ പരിചയപ്പെടാം.

മറ്റ് വിഷയങ്ങളെ പോലെ മനപാഠമാക്കേണ്ടതോ വായിച്ച് പഠിക്കേണ്ടതോ ആയ വിഷയമല്ല കണക്ക്. ആശയങ്ങൾ മനസിലാക്കി നിരന്തരം പ്രാക്ടീസ് ചെയ്യുകയാണ് കണക്ക് എളുപ്പമാക്കാൻ വേണ്ട ഒരു വഴി. എളുപ്പവും ലളിതവുമായ കണക്കിലെ പ്രോബ്ലസ് സോൾവ് ചെയ്ത് പതിയെ സങ്കീർണമായ പ്ല്രോബ്ലംസിലേക്ക് കടക്കാം.കണക്ക് ഘട്ടം ഘട്ടമായി വേണം പഠിച്ചെടുക്കാൻ.

ഘട്ടം ഘട്ടമായി പഠിച്ചെടുക്കേണ്ട വിഷയമായതിനാൽ തന്നെ ഏതെങ്കിലും ഒരു ഭാഗത്ത് സംശയം വന്നാൽ അപ്പോൾ തന്നെ അദ്ധ്യപകരോടോ മുതിർന്നവരോടോ സഹപാഠികളോടോ ചോദിച്ച് ആ സംശയം തീർക്കാം.സംശയങ്ങൾ എത്രയും വേഗം പരിഹരിക്കപ്പെടുന്നുവോ അത്രയും വേഗത്തിൽ നിങ്ങൾക്ക് കണക്ക് പഠനം മുന്നോട്ട് കൊണ്ടുപോകാൻ സാധിക്കും.

കണക്കിലെ ഫോർമുലകൾ അഥവാ സൂത്രവാക്യങ്ങൾ വളരെ പ്രധാനപ്പെട്ടവയാണ്. പഠനത്തിൽ അപ്രധാനം എന്ന് കരുതി ഒരു ഫോർമുലയും ഒഴിവാക്കരുത്. പിന്നീടുള്ള പഠനത്തിൽ നിങ്ങൾ ഒഴിവാക്കുന്ന ഫോർമുല പ്രധാനപ്പെട്ട ഒന്നായി മാറും.

കണക്ക് പഠനത്തിൽ പഠിച്ച് കഴിഞ്ഞത് ഒഴിവാക്കാൻ സാധിക്കില്ല. നിങ്ങൾക്ക് 9-ാം ക്ലാസ് മുതൽ 12-ാം ക്ലാസ് വരെ പഠിക്കുന്ന കണക്കിന്റെ ശക്തമായ അടിത്തറയിലാണ് ഉന്നതവിദ്യാഭ്യാസത്തിൽ മുന്നോട്ട് പോക്ക് സാധ്യമാകുന്നത്. കണക്കിലെ മിക്ക അധ്യായങ്ങളും മുമ്പത്തെ അധ്യായങ്ങളെ അടിസ്ഥാനമാക്കിയുള്ളതാണ്.

അബാക്കസ്

ഗണിതത്തിന്റെ അടിസ്ഥാനമാണ് സഖ്യകളും, അത് കൂട്ടിയും കിഴിച്ചും ഹരിച്ചും ഉത്തരങ്ങൾ കണ്ടെത്തുന്നതും. ഇതിൽ നല്ല പ്രാവീണ്യമില്ലെങ്കിൽ തന്നെ ഗണിതപഠനം ദുരിതമാകും. എന്നാൽ ഗണിതപഠനം ആകർഷണീയമാക്കുന്ന ഒന്നാണ് അബാക്കസ്.

മനുഷ്യ മസ്തിഷ്‌കത്തിലെ ബുദ്ധിപരമായ കഴിവിൽ 5% ത്തിൽ കുറവ് മാത്രമാണ് സാധാരണ ഉപയോഗിച്ച് വരുന്നത്.അബാക്കസ് പരശീലനത്തിലൂടെ ബുദ്ധിപരമായ കഴിവുകൾ കൂടുതൽ ഉപയോഗപ്രദമാക്കുവാൻ സാധിക്കുമെന്ന് കണ്ടെത്തിയിരിക്കുന്നു.
വളരെ വേഗത്തിലും എളുപ്പത്തിലും ചെയ്യാൻ സാധിക്കുന്ന ഈ പരിശീലനം കുട്ടികളുടെ ശ്രദ്ധ, ഏകാഗ്രത, ഓർമ്മശക്തി, ആത്മവിശ്വാസം, കൃത്യത, വേഗത, ക്രിയാത്മകത, പഠന വൈദഗ്ധ്യം, ചിന്താശേഷി എന്നീ കഴിവുകളെ പതിന്മടങ്ങ് വർദ്ധിപ്പിക്കുവാൻ സാധിക്കുമെന്ന് തെളിയിച്ചുകൊണ്ടിരിക്കുന്നു.

അബാക്കസിലൂടെ കുട്ടികളിൽ കണക്ക് ചെയ്യുന്ന സ്പീഡ്. അരിത്മെറ്റിക് എബിലിറ്റി എന്നിവ മെച്ചപ്പെടുത്തുന്നു. സ്പീഡ് റൈറ്റിംഗിനും ഏകാഗ്രതയ്ക്കും ശ്രവണശേഷി മെച്ചപ്പെടുത്തുന്നതിനും സഹായിക്കുന്നു. അബാക്കസ് പരിശീലനം ലഭിച്ചവർക്ക് റികൗണ്ടിങ്ങിന്റെ ആവശ്യം പോലുമില്ലാതെ സഖ്യകൾ എളുപ്പത്തിൽ കൂട്ടാനും കുറയ്ക്കാനും സാധിക്കുന്നു.