തിരുവനന്തപുരം : യൂത്ത് കോണ്‍ഗ്രസ് സംഘടനാ തിരഞ്ഞെടുപ്പില്‍ വ്യാജ തിരിച്ചറിയാല്‍ കാര്‍ഡ് ഉപയോഗിച്ചത് ഗുരുതരമായ ക്രിമിനല്‍ കുറ്റമെന്ന് ബിജെപി അധ്യക്ഷന്‍ കെ സുരേന്ദ്രന്‍. വ്യാജ ഐഡി കാര്‍ഡ് ഉണ്ടാക്കാന്‍ ഉപയോഗിച്ച ആപ്പ് ഉണ്ടാക്കിയത് ഒരു എംഎല്‍എ നേരിട്ട് നേതൃത്വം നല്‍കിയാണെന്നും സുരേന്ദ്രന്‍ പറഞ്ഞു.
“വ്യാജ തെരഞ്ഞെടുപ്പ് തിരിച്ചറിയല്‍ കാര്‍ഡ് ഇപ്പോള്‍ ഉപയോഗിച്ചത് യൂത്ത് കോണ്‍ഗ്രസ്സ് തെരഞ്ഞെടുപ്പിനുവേണ്ടിയാണെങ്കിലും നടന്നത് ഗുരുതരമായ ക്രിമിനല്‍ കുറ്റമാണ്. ഇത്തരത്തില്‍ പൊതു തെരഞ്ഞെടുപ്പുകളില്‍ ഉപയോഗിക്കാം, വ്യാജ സിം കാര്‍ഡ് ഉണ്ടാക്കാം തുടങ്ങി നിരവധി തട്ടിപ്പുകള്‍ ഇതുവഴി നടത്താനാവും”, സുരേന്ദ്രന്‍ ചൂണ്ടിക്കാട്ടി.
ഈ ആപ്പ് ഉണ്ടാക്കിയത് ഒരു എംഎല്‍എ നേരിട്ട് നേതൃത്വം നല്‍കിയാണ്. കൂടാതെ കെ. സി. വേണുഗോപാലും വി. ഡി. സതീശനും ഇക്കാര്യം അറിഞ്ഞിരുന്നു. വിഷയത്തില്‍ പൊലീസ് അടിയന്തിരമായി കേസ്സെടുക്കണം. മാത്രമല്ല തെരഞ്ഞെടുപ്പു കമ്മീഷനും ഇടപെടണമെന്നും സുരേന്ദ്രന്‍ ആവശ്യപ്പെട്ടു. അതേസമയം, ഇക്കാര്യത്തില്‍ ബി. ജെ. പി ഉചിതമായ നിയമനടപടികള്‍ സ്വീകരിക്കുമെന്നും അദ്ദേഹം കൂട്ടിച്ചേര്‍ത്തു.
യൂത്ത് കോണ്‍ഗ്രസ് സംഘടനാ തെരഞ്ഞെടുപ്പില്‍ വ്യാപകമായി വ്യാജ തിരിച്ചറിയല്‍ രേഖകളുണ്ടാക്കി വോട്ട് ചെയ്തതായി പ്രവര്‍ത്തകര്‍ തന്നെ പരാതി നല്‍കിയതോടെയാണ് വിവരം പുറത്തറിയുന്നത്. വ്യാജ തിരിച്ചറിയല്‍ കാര്‍ഡ് ഉണ്ടാക്കാന്‍ ഉപയോഗിച്ച മൊബൈല്‍ ആപ്ലിക്കേഷനും മാതൃകാ വീഡിയോയും പരാതിക്കാര്‍ എഐസിസിക്ക് കൈമാറിയിരുന്നു. രാഹുല്‍ ഗാന്ധിയുടെ തിരിച്ചറിയല്‍ കാര്‍ഡ് തയ്യാറാക്കുന്ന മാതൃക വീഡിയോ ഉള്‍പ്പെടെയാണ് പരാതിക്കാര്‍ എഐസിസിക്ക് കൈമാറിയിരിക്കുന്നത്.
