ന്യൂഡൽഹി: ഇന്ത്യൻ നാവികസേനയുടെ ഏറ്റവും പുതിയ സ്റ്റെൽത്ത് ഗൈഡഡ് മിസൈൽ ഡിസ്ട്രോയർ “ഐഎൻഎസ് ഇംഫാൽ” ഡിസംബർ 26 ന് മുംബൈയിലെ നേവൽ ഡോക്ക്‌യാർഡിൽ കമ്മീഷൻ ചെയ്യും. പ്രതിരോധ മന്ത്രി രാജ്‌നാഥ് സിംഗ് മുഖ്യാതിഥിയായി പങ്കെടുക്കുമെന്ന് പ്രതിരോധ മന്ത്രാലയം ഔദ്യോഗിക പ്രസ്താവനയിൽ അറിയിച്ചു.
ഭാരതം തദ്ദേശീയമായി രൂപകൽപ്പന ചെയ്ത് നിർമ്മിച്ച നാല് ‘വിശാഖപട്ടണം’ ക്ലാസ് ഡിസ്ട്രോയറുകളിൽ മൂന്നാമത്തേതാണ് ഐ എൻ എസ് ഇംഫാൽ.
യാത്രയിലുടനീളം ഗതിമാറ്റം സാധ്യമാകുന്ന തരത്തിലുള്ള മിസൈലുകളാണ് ഗൈഡഡ് മിസൈലുകൾ . അത്തരത്തിലുള്ള മിസൈലുകൾ തൊടുത്ത് വിടുവാൻ ശേഷിയുള്ള തരം യുദ്ധക്കപ്പലുകൾ ആണ് ഗൈഡഡ് മിസൈൽ ഡിസ്ട്രോയറുകൾ. ഐഎൻഎസ് ഇംഫാൽ” കമ്മീഷൻ ചെയ്യപ്പെടുന്നതോട് കൂടി ഇന്ത്യയുടെ കൈവശമുള്ള ഗൈഡഡ് മിസൈൽ ഡിസ്ട്രോയറുകളുടെ എണ്ണം 13 ആയി. യുദ്ധവിമാനങ്ങൾ വഹിക്കാൻ ശേഷിയുള്ള എയർക്രാഫ്റ്റ് ക്യാരിയറുകളെ ആക്രമിക്കുക എന്നതാണ് ഗൈഡഡ് മിസൈൽ ഡിസ്ട്രോയറുകളുടെ പ്രധാന ലക്ഷ്യം.
ഏതൊരു രാജ്യത്തിന്റെയും നാവിക ശക്തിയുടെ ഏറ്റവും പ്രധാനപ്പെട്ട ഘടകം വിമാന വാഹിനി കപ്പലുകൾ ആയിരിക്കെ, അവയെ നശിപ്പിക്കാൻ ശേഷിയുള്ള ഗൈഡഡ് മിസൈൽ കാരിയറുകൾക്ക് സ്വാഭാവികമായും പ്രതിരോധ സംവിധാനത്തിൽ വലിയ പ്രാധാന്യം ആണ് കല്പിക്കപ്പെടുന്നത്
രണ്ടാം ലോക യുദ്ധത്തിന്റെ തുടക്കകാലത്തും അതിനു ശേഷമുള്ള വർഷങ്ങളിലും വികസിച്ചു വന്ന ഡിസ്ട്രോയറുകൾ ഇന്ന് ഏതൊരു നാവികസേനയുടെയും പ്രധാന ഘടകമാണ്.
എന്നാൽ ഇന്നും ഗൈഡഡ് മിസൈൽ ഡിസ്ട്രോയറുകൾ രൂപകൽപ്പന ചെയ്യാനും നിർമ്മിക്കാനും കമ്മീഷൻ ചെയ്യാനും ഉള്ള കഴിവ് വളരെ ചുരുക്കം ചില രാജ്യങ്ങൾക്ക് മാത്രമേയുള്ളൂ.
മുംബൈയിലെ മാസഗോൺ ഡോക്ക് ലിമിറ്റഡാണ് കപ്പൽ നിർമ്മിച്ചത്. “ഇന്ത്യയിൽ നിർമ്മിച്ച ഏറ്റവും ശക്തമായ യുദ്ധക്കപ്പലുകളിൽ ഒന്നായി ഇംഫാലിനെ കണക്കാക്കാം. ‘ആത്മ നിർഭർ ഭാരത്’ പദ്ധതിയിലൂടെ ഇന്ത്യയുടെ വർദ്ധിച്ചുവരുന്ന കപ്പൽ നിർമ്മാണ വൈദഗ്ധ്യത്തിന്റെ തെളിവാണിത്,” .ഒരു ഇന്ത്യൻ നാവികസേന വക്താവ് പറഞ്ഞു.
ആധുനികമായ നിരീക്ഷണ റഡാറാണ് കപ്പലിൽ ഘടിപ്പിച്ചിരിക്കുന്നത്. ഇത് കപ്പലിന്റെ ആയുധ സംവിധാനങ്ങൾക്ക് ടാർഗെറ്റ് ഡാറ്റ നൽകുന്നു.
തദ്ദേശീയമായി വികസിപ്പിച്ച റോക്കറ്റ് ലോഞ്ചറുകൾ, ടോർപ്പിഡോ ലോഞ്ചറുകൾ, അന്തർവാഹിനി വിരുദ്ധ യുദ്ധ ഹെലികോപ്റ്ററുകൾ എന്നിവ കപ്പലിന്റെ അന്തർവാഹിനികൾ തകർക്കാനുള്ള ശേഷി വർധിപ്പിക്കുന്നു
“ന്യൂക്ലിയർ, ബയോളജിക്കൽ, കെമിക്കൽ (എൻബിസി) യുദ്ധസാഹചര്യങ്ങൾക്ക് കീഴിൽ യുദ്ധം ചെയ്യാൻ കപ്പൽ സജ്ജമാണ്, കൂടാതെ ഉയർന്ന തോതിലുള്ള ഓട്ടോമേഷനും സ്റ്റെൽത്ത് സവിശേഷതകളും ഏത് സാഹചര്യത്തിലും പ്രവർത്തിക്കാനുള്ള കപ്പലിന്റെ കഴിവ് വർധിപ്പിക്കുന്നു
2 017 മെയ് 19 ന് നിർമ്മാണ പ്രവർത്തനങ്ങൾക്ക് തുടക്കം കുറിച്ച മുതൽ 2019 ഏപ്രിൽ 20 നോടെ “ഐഎൻഎസ് ഇംഫാൽ” അതിന്റെ ആദ്യ ട്രയൽ റൺ നടത്തി. ഇത് ഒരു റെക്കോർഡ് ടൈം ആണ്.
ഡിസ്ട്രോയറുകൾ ഏതൊരു നാവികസേനയുടെയും നിർണ്ണായകമായ ഘടകം ആണെന്നിരിക്കെ, തദ്ദേശീയമായി, ഏറ്റവും കുറഞ്ഞ സമയത്തിനുള്ളിൽ ഡിസ്ട്രോയറുകൾ നിർമ്മിച്ച് പരീക്ഷണം നടത്തി കമ്മീഷൻ ചെയ്യാനുള്ള കഴിവ് ഭാരതത്തിന് ലഭിച്ചത് നാവികസേനയെ സംബന്ധിച്ചിടത്തോളവും ഇന്ത്യയുടെ പ്രതിരോധ മേഖലയ്ക്കും ഒരു മുതൽക്കൂട്ടാണ്. പല വികസിത രാജ്യങ്ങളേക്കാൾ കൂടുതൽ ഡിസ്ട്രോയറുകൾ ഭാരതത്തിന്റെ കൈവശം ഉണ്ട്. എങ്കിലും ചൈനയുമായോ അമേരിക്കയുമായോ താരതമ്യം ചെയ്താൽ നമ്മൾ ഇനിയും ഒരുപാടു ദൂരം സഞ്ചരിക്കാനുണ്ട്. എന്നാൽ അതിലേക്കുള്ള ശേഷി തന്നെയാണ് നമുക്ക് നമ്മുടെ കൈവശമുള്ള തദ്ദേശീയ നിർമ്മാണ സാങ്കേതിക ശേഷി നൽകുന്നത്
