സ്വപ്‌നഗൃഹം നിർമ്മിക്കുമ്പോൾ എല്ലാവരും ആഗ്രഹിക്കുന്ന ഒന്നാണ് മനോഹരമായ പൂന്തോട്ടം. ചെറിയ വീട്ടുമുറ്റം ആണെങ്കിലും പൂത്തുലഞ്ഞ സസ്യങ്ങൾ നട്ടുവളർത്താൻ എല്ലാവരും ആഗ്രഹിക്കുന്നു. എന്നാൽ പൂന്തോട്ടത്തിന്റെ കാര്യത്തിലും വാസ്തു നോക്കാറുണ്ട്. ഏതൊക്കെ ചെടി നടാം ഏതൊക്കെ ചെടി പാടില്ല എന്നതിനെപറ്റി നിലനിൽക്കുന്ന ചില വിശ്വാസങ്ങളുണ്ട്.
വീടിന് സമീപം ശരിയായ സ്ഥാനത്തല്ലാതെ വളരുന്ന ചെടികൾ നിരവധി ദോഷഫലങ്ങൾ ഉണ്ടാക്കും.വാസ്തുശാസ്ത്രത്തിൽ മൂന്ന് തരം വൃക്ഷങ്ങളെക്കുറിച്ച് പറയുന്നുണ്ട്. അന്തഃസാര വൃക്ഷങ്ങൾ, സർവ്വസാര വൃക്ഷങ്ങൾ, ബഹിർസാര വൃക്ഷങ്ങൾ എന്നിവയാണവ. അന്തഃസാര വൃക്ഷങ്ങൾ വീടിൻറെ അടുത്തും, സർവ്വസാര വൃക്ഷങ്ങൾ കുറച്ച് മാറിയും, ബഹിർസാര വൃക്ഷങ്ങൾ അതിന് അപ്പുറത്തും വച്ച് പിടിപ്പിക്കാമെന്നാണ് വിശ്വാസം.
തുളസി വീടിന്റെ പ്രധാന വാതിലിന് അഭിമുഖമായാണ് നടേണ്ടത്. അതായത് പ്രധാന വാതിലിൽ നിന്നാൽ തുളസിച്ചെടി കാണാൻ കഴിയണം. തുളസി മഹാലക്ഷ്മിയുടെ ഇരിപ്പിടമാണ്. തുളസിക്കൊപ്പം ഒരുമൂട് മഞ്ഞൾകൂടി നട്ടാൽ മഹാവിഷ്ണുവിന്റെ സാമീപ്യവും ഉണ്ടാവും. അത്‌പോലെ തന്നെ ശുദ്ധമായി വേണം തുളസിയെ സമീപിക്കാൻ വലതു കൈകൊണ്ട് മാത്രമേ ഇവ നുള്ളി എടുക്കാൻ പാടുള്ളൂ. നഖം ഉപയോഗിച്ച് നുള്ളാൻ പാടില്ല.
പൂന്തോട്ടത്തിൽ പൂത്തുലുഞ്ഞ് നിൽക്കുന്നവയാണ് റോസാ ചെടികൾ വലവർണത്തിൽ പലവലുപ്പത്തിൽ പുഷ്പിച്ചുനിൽക്കുന്ന റോസാ ചെടികൾ കാണാൻ തന്നെ നല്ല ഭംഗിയാണ്. എന്നാൽ ഇവയുടെ സ്ഥാനം എവിടെയാണ്? റോസാച്ചെടികൾ ഒരിക്കലും വീടിന്റെ പ്രധാനവാതിലിന് നേരെയോ പുറത്തേക്കിറങ്ങുന്ന വഴിയ്ക്ക് ഇരുവശത്തുമായോ നടരുത്. അങ്ങനെ ചെയ്താൽ ദോഷങ്ങൾ മാത്രമേ ഉണ്ടാകൂ. മുള്ളുള്ള ചെടികൾ കണ്ടുകൊണ്ട് വീടിന് പുറത്തേക്കിറങ്ങുന്നത് അത്ര നന്നല്ല. പ്രധാന വാതിലിന് മുന്നിലും പ്രധാന വഴിക്ക് ഇരുവശത്തും ഒഴികെ മറ്റെവിടെയും റോസ് നട്ടുവളർത്താം. മുള്ളുകളുള്ള ചെടികളെ പൊതുവേ ഒഴിവാക്കണമെന്നാണ് പറയുന്നത്. കള്ളിമുൾച്ചെടി വളർത്തുന്നത് ബന്ധങ്ങൾ ദുർബലമാക്കുമെന്നും ടെൻഷൻ കൂട്ടുമെന്നുമാണ് വിശ്വാസം. കുള്ളൻ രൂപത്തിലുള്ള ബോൺസായ് ചെടികൾ വളർച്ച മുരടിച്ചവയായതുകൊണ്ട് ഒഴിവാക്കണമെന്നുമാണ് വിശ്വാസം.
പേരാൽ വീടിൻറെ കിഴക്ക് ദിക്കിലും അത്തി തെക്ക് ദിക്കിലും ഇത്തി വടക്ക് ദിക്കിലും അരയാൽ പടിഞ്ഞാറും വേണം നടാൻ. ഈ നാലു മരങ്ങൾ നാൽപാമരം എന്ന് അറിയപ്പെടുന്നു. ഇവ സ്ഥാനം തെറ്റി നട്ട് വഴർത്തുന്നത് വിപരീത ഫലങ്ങളുണ്ടാകുമത്രേ. കാഞ്ഞിരം, ചേര്, കഴനി, താന്നി,കള്ളി, കാപ്പി, മുരിങ്ങ, എരുക്ക്, കരങ്ങാഴി തുടങ്ങിയവ വീട്ടിൽ വച്ച് പിടിപ്പിക്കരുത്. നെല്ലി, കുമിഴ്, കൂവളം, അശോകം, ഞാവൽ, പ്ലാശ്, ചന്ദനം, വേങ്ങ, ചെമ്പകം, വേപ്പ്, കടുക്കാമരം, ദേവതാരം, നെന്മേനി, വാക എന്നിവ വീട്ടിൽ വച്ച് പിടിപ്പിക്കാം
സന്തോഷത്തിന്റെയും സ്‌നേഹത്തിന്റേയും പ്രതീകമാണ് ഓർക്കിഡ് . വീടിനുള്ളിലെ മുറികൾക്കുള്ളിൽ ഏതു മൂലയിലും ഓർക്കിഡ് വളർത്താം.സാമ്പത്തിക അഭിവൃദ്ധിയേയും പൂർണ്ണതയേയും പ്രതിനിധീകരിക്കുന്ന ഓർക്കിഡ് നെഗറ്റീവ് എനർജിയെ ഇല്ലാതാക്കാൻ കഴിയുന്ന ചെടിയുമാണ്.
വീടിനുള്ളിലെ വിഷവായുവിനെ ശുദ്ധീകരിക്കാൻ കഴിയുന്ന ഒരു ചെടിയാണ് കറ്റാർവാഴ. സൗന്ദര്യവർധക വസ്തുവായും ഔഷധ സസ്യമായും അറിയപ്പെടുന്ന കറ്റാർവാഴ വീടിന്റെ അകത്തളത്തിൽ സൂര്യപ്രകാശം ലഭിക്കുന്നയിടത്താണ് വയ്‌ക്കേണ്ടത്.
വെള്ളത്തിലിട്ട് വളർത്തുന്ന ബാംബുച്ചെടി മങ്ങിയ പ്രകാശമുള്ള മുറികളിലാണ് വയ്‌ക്കേണ്ടത്. ലക്കി ബാംബു വീടിനുള്ളിൽ വളർത്തിയാൽ പേരും പ്രശസ്തിയും അംഗീകാരവും നേടിത്തരും എന്നൊരു വിശ്വാസവുമുണ്ട്.
മണിപ്ലാൻറ് വളർത്തുമ്പോൾ മുകളിലോട്ട് പോകുന്ന രീതിയിലാവണം വയ്‌ക്കേണ്ടത്. എങ്കിൽ ഐശ്വര്യവും ആരോഗ്യവും ഉണ്ടാകുമെന്നാണ് വിശ്വാസം. സൂര്യപ്രകാശമേൽക്കുന്ന ജനാലക്കരിക്കിൽ വെള്ളം നിറച്ച ഗ്ലാസ് ബൗളിലാവണം മണി പ്ലാൻറ് വളർത്തേണ്ടത്.
പീസ് ലില്ലി വീടിന്റെ പ്രവേശന കവാടത്തിൽ വെച്ചാൽ വീട്ടിൽ പോസിറ്റീവ് എനർജി വരും. സന്തോഷവും ഐശ്വര്യവും ഉണ്ടാവും.കുട്ടികളുടെ പഠന മുറിയിൽ പീസ് ലില്ലി വളർത്തുന്നത് കുട്ടികളുടെ ഏകാഗ്രത വർദ്ധിപ്പിക്കും. സ്റ്റഡി ടേബിളിലാണ് പീസ് ലില്ലി സൂക്ഷിക്കാൻ ഏറ്റവും അനുയോജ്യമായ സ്ഥലം.
Discussion about this post