ലക്നൗ : സഞ്ചാരികളുടെ എണ്ണത്തിൽ റെക്കോർഡ് നേട്ടം കൈവരിച്ചിരിക്കുകയാണ് ഉത്തർപ്രദേശ്. 2023ലെ ആദ്യ 9 മാസത്തിനുള്ളിൽ ഉത്തർപ്രദേശ് സന്ദർശിച്ചിരിക്കുന്നത് 32 കോടിയോളം സഞ്ചാരികളാണെന്ന് റിപ്പോർട്ട്. കാശി, അയോദ്ധ്യ, പ്രയാഗ് രാജ് എന്നിവിടങ്ങളിലാണ് ഏറ്റവും അധികം സഞ്ചാരികൾ വന്നെത്തിയിട്ടുള്ളത്.
2022ൽ 12 മാസങ്ങളിലായി ഉത്തർപ്രദേശിൽ വന്നെത്തിയിരുന്ന സഞ്ചാരികളുടെ എണ്ണം 31.85 കോടിയായിരുന്നു. എന്നാൽ 2023 ആദ്യം 9 മാസങ്ങളിൽ തന്നെ 32 കോടിയിലധികം സഞ്ചാരികൾ ഉത്തർപ്രദേശ് സന്ദർശിച്ചു. ഇന്ത്യൻ സഞ്ചാരികളും വിദേശ വിനോദസഞ്ചാരികളും അടക്കമുള്ളവരുടെ കണക്കുകളാണ് പുറത്തുവിട്ടിട്ടുള്ളത്. ഏറ്റവും കൂടുതൽ സഞ്ചാരികൾ സന്ദർശിച്ച സ്ഥലം കാശിയാണ്.
2023ലെ ആദ്യ 9 മാസത്തെ കണക്കുകൾ അനുസരിച്ച് 8.42 കോടി ആളുകളാണ് കാശി സന്ദർശിച്ചിട്ടുള്ളത്. 2023-ൽ ജനുവരി മുതൽ സെപ്റ്റംബർ വരെ ഉത്തർപ്രദേശിലേക്ക് വന്ന ആഭ്യന്തര വിനോദസഞ്ചാരികളുടെ എണ്ണം 31,91,95,206 ആണ്. ഒപ്പം 9,54,866 വിദേശ വിനോദസഞ്ചാരികളും യുപിയിൽ എത്തി. 8,40,71,726 ആഭ്യന്തര സഞ്ചാരികളും 1,33,088 വിദേശ സഞ്ചാരികളുമാണ് ജനുവരി മുതൽ സെപ്റ്റംബർ വരെയുള്ള കാലയളവിൽ വാരണാസി സന്ദർശിച്ചിരിക്കുന്നത്.
