ലക്‌നൗ: അയോദ്ധ്യ ശ്രീരാമക്ഷേത്രത്തിലെ പ്രധാന പ്രതിഷ്ഠയായ രാംലല്ലയെ കൂടാതെ നിർമ്മിച്ച മറ്റ് രണ്ട് വിഗ്രഹങ്ങളുടെ സമ്പൂർണ ചിത്രങ്ങൾ പുറത്ത് വന്നു. ആദ്യം പുറത്ത് വന്നത് തൂവെള്ള നിറത്തിലുള്ള രാംലല്ല വിഗ്രഹത്തിന്റെ ചിത്രമാണ്. ഇത് ക്ഷേത്രത്തിന്റെ ഒന്നാം നിലയിൽ സ്ഥാപിക്കും. രാജസ്ഥാൻ സ്വദേശിയായ സത്യനാരായൺ പാണ്ഡെയാണ് ഈ വിഗ്രഹം നിർമ്മിച്ചത്. അമ്പും വില്ലും കൈകളിലേന്തിയ രാംലല്ല വിഗ്രഹത്തിന് ചുറ്റും വിവിധ വൈഷ്ണവ അവതാരങ്ങളെയും അംശാവതാരങ്ങളെയും ദർശിക്കാനാവും.
ബ്ലാക്ക് സ്റ്റോണിൽ കൊത്തിയെടുത്തതാണ് മൂന്നാമത്തെ ശിൽപ്പം. കർണാടക സ്വദേശിയായ ഗണേഷ് ഭട്ടാണ് ശിൽപി. മൈസൂരിലെ ഹെഗഡദേവന കോട്ട പ്രദേശത്തെ കൃഷിസ്ഥലത്ത് നിന്നും ശേഖരിച്ച ബ്ലാക്ക് സ്റ്റോണായ കൃഷ്ണശിലയിൽ നിന്നാണ് വിഗ്രഹം കൊത്തിയെടുത്തിരിക്കുന്നത്.
അതേസമയം, ക്ഷേത്രത്തിലെ പ്രധാന പ്രതിഷ്ഠയായ രാംലല്ലയെ 2.5 ബില്ല്യൺ വർഷം പഴക്കമുളള കറുത്ത ഗ്രാനൈറ്റ് ഉപയോഗിച്ചാണ് തയ്യാറാക്കിയത്. 51 ഇഞ്ച് ഉയരമുളള രാംലല്ല ആയിരം വർഷത്തോളം യാതൊരു കേടുപാടുമില്ലാതെ നിലനിൽക്കും.കാലാസ്ഥയിലുണ്ടാകുന്ന വ്യത്യാസങ്ങൾ വിഗ്രഹത്തെ പ്രതികൂലമായി ബാധിക്കില്ല.
