കൊല്ലം: ചവറയിൽ പ്രായപൂർത്തിയാകാത്ത കുട്ടിയെ പ്രകൃതി വിരുദ്ധ പീഡനത്തിന് ഇരയാക്കിയ അദ്ധ്യാപകൻ അറസ്റ്റിൽ. തേവലക്കര സ്വദേശി കബീർകുട്ടി (49) ആണ് അറസ്റ്റിലായത്. ഇയാൾക്കെതിരെ പോക്‌സോ നിയമത്തിലെ വിവിധ വകുപ്പുകൾ ചുമത്തി പോലീസ് കേസ് എടുത്തു.
മൂന്നാം ക്ലാസ് വിദ്യാർത്ഥിയെ ആയിരുന്നു ഇയാൾ പീഡിപ്പിച്ചത്. കഴിഞ്ഞ വർഷം ഓഗസ്റ്റ് മുതൽ കുട്ടി പീഡനത്തിന് ഇരയായിവരികയാണ്. ദഫ്മുട്ട് പഠിപ്പിക്കാമെന്ന് പറഞ്ഞ് വീട്ടിൽ വിളിച്ചുവരുത്തിയായിരുന്നു പീഡനം. മൂന്നാം ക്ലാസുകാരന് പുറമേ മറ്റ് കുട്ടികളെയും ഇയാൾ വീട്ടിലേക്ക് വിളിച്ചുവരുത്തിയിരുന്നു. ദഫ്മുട്ട് പരിശീലനം കഴിഞ്ഞ് മറ്റ് കുട്ടികൾ വീട്ടിൽ നിന്നും പോയിട്ടും ഈ കുട്ടിയെ മാത്രം ഇയാൾ വിട്ടില്ല. തുടർന്ന് മുറിയിൽ കൊണ്ടുപോയി പീഡിപ്പിക്കുകയായിരുന്നു. പുറത്ത് പറയരുതെന്ന് കുട്ടിയെ ഇയാൾ ഭീഷണിപ്പെടുത്തുകയും ചെയ്തു.
ഇതിന് ശേഷവും ഇയാൾ കുട്ടിയെ പലതവണ ഉപദ്രവിച്ചു. ഇതോടെ കുട്ടി കഴിഞ്ഞ ദിവസം രക്ഷിതാക്കളോട് വെളിപ്പെടുത്തുകയായിരുന്നു. തുടർന്ന് വീട്ടുകാർ പോലീസിൽ നൽകിയ പരാതിയിലാണ് അറസ്റ്റ്. സംഭവത്തിൽ ചവറ തെക്കുംഭാഗം പോലീസ് ആണ് നടപടി സ്വീകരിച്ചിട്ടുള്ളത്.
