ശരിയായ വളർച്ചയ്ക്കും വികാസത്തിനും നമുക്ക് ആവശ്യമായ ഒരു മൂലകമാണ് ഇരുമ്പ്. ശരീരത്തിലെ കോശങ്ങളിൽ എല്ലാം പ്രാണവായുവായ ഓക്സിജൻ എത്തിക്കുന്നതിന് ആവശ്യമായ ഹീമോഗ്ലോബിൻ രൂപീകരണത്തിൽ ഇരുമ്പ് നിർണായക പങ്ക് വഹിക്കുന്നു. ആരോഗ്യകരമായി ഗർഭധാരണം നടത്താനും ഊർജ്ജസ്വലത ഉറപ്പാക്കാനും എല്ലാം ഇരുമ്പ് അത്യാവശ്യമാണ്. എന്നാൽ ശരീരത്തിൽ ഇരുമ്പിൻ്റെ കുറവ് വളരെ സാധാരണമാണ്, പ്രത്യേകിച്ച് സ്ത്രീകളിൽ. ഇരുമ്പിൻ്റെ അളവ് കു റയുന്നത് കൊണ്ടുണ്ടാകുന്ന രോഗമാണ് വിളർച്ച (അനീമിയ)
ഇരുമ്പിൻ്റെ അംശം കുറയുന്നതിൻ്റെ ലക്ഷണങ്ങൾ എന്തെല്ലാമാണ്?
1. അകാരണമായ തളർച്ച.
2. ഉണർന്ന് എഴുന്നേൽക്കുമ്പോഴുള്ള തലകറക്കം.
3. കൂടുതൽ സമയം നിൽക്കുമ്പോൾ തലകറക്കം.
4. വിണ്ടുകീറിയ ചുണ്ടുകൾ:
5. നെഞ്ചെരിച്ചിലും ഹൃദയമിടിപ്പും:
6. മങ്ങിയ കണ്ണുകൾ:
7. ചെറിയ ആഘാതത്തിലും ചതവുണ്ടാവുക:
8. നഖം വിണ്ടുകീറുക
9. കുട്ടികൾ ഇഷ്ടികയോ മണ്ണോ കഴിക്കുന്നതും ഇരുമ്പിൻ്റെ അംശം ശരീരത്തിൽ കുറയുമ്പോഴാകാം.
10. വായയുടെ വശങ്ങൾ വിണ്ടുകീറുക
ഇരുമ്പിൻ്റെ കുറവു കാരണം രക്തത്തിൽ ഹീമോഗ്ളോബിൻ്റെ അളവ് കുറയും. ഹീമോഗ്ളോബിനാണ് രക്തത്തിന് ചുവന്ന നിറം നൽകുന്നത്. ഇരുമ്പിൻ്റെ അംശം കുറഞ്ഞാൽ ചർമ്മം വി റളിയതായി തോന്നും. അനീമിയ ചർമ്മത്തിൻ്റെ വിളർച്ച പോലെ കണ്ണുകളും വിളറിയതായി കാണും. കണ്ണുകളിലെ മന്ദതയോ തെളിച്ചമില്ലായ്മയോ ഇരുമ്പിൻ്റെ കുറവിൻ്റെ ഒരു ലക്ഷണമായേക്കാം.
ഇരുമ്പിൻ്റെ കുറവ് രക്തക്കുഴലുകളെ ദുർബലമാക്കുകയും അവ പൊട്ടാനുള്ള സാധ്യത വർദ്ധിപ്പിക്കുകയും ചെയ്യുന്നു, ഇത് ശരീരത്തിൽ എളുപ്പത്തിൽ ചതവ് ഉണ്ടാക്കുന്നു. ചർമ്മത്തിൻ്റെ പ്രധാന ഘടകമായ കൊളാജൻ്റെ ഉൽപാദനത്തിൽ ഇരുമ്പ് ഒരു പങ്കു വഹിക്കുന്നുണ്ട്.
ഇരുമ്പിൻ്റെ അഭാവത്തിൻ്റെ ശ്രദ്ധ കേന്ദ്രീകരിക്കാനുള്ള ബുദ്ധിമുട്ട്, ശ്വാസം മുട്ടൽ, കടുത്ത ക്ഷീണം, തണുത്ത കൈകളും കാലുകളും, തലവേദന എന്നീ ലക്ഷണങ്ങളും ഉണ്ടാകാം.
ഇരുമ്പ് കുറവെന്ന് എങ്ങനെ കണ്ടെത്താം?
ഒരു ചെ റിയ ലബോറട്ടറി പരിശോധനയിലൂടെ രക്തത്തിലെ ഹീമോഗ്ളോബിൻ അളവും മറ്റ് പരിശോധനകളും നടത്തി ഇരുമ്പിൻ്റെ അളവു കുറഞ്ഞാലുണ്ടാകുന്ന വിളർച്ച വളരെയെളുപ്പം കണ്ടുപിടിക്കാം. പ്രാഥമിക ആരോഗ്യകേന്ദ്രത്തിലോ സർക്കാർ ആശുപത്രിയിലോ ഈ പരിശോധന പലപ്പോഴും സൗജന്യമാണ്.
വിളർച്ച കണ്ടെത്തിയാൽ എന്ത് ചെയ്യണം?
വിളർച്ച കണ്ടെത്തിയാൽ ഇരുമ്പിൻ്റെ അംശമടങ്ങിയ ഭക്ഷണങ്ങൾ കൂടുതലായി കഴിക്കണം. എന്ത് കഴിച്ചാലാണ് ഇരുമ്പ് ശരീരത്തിൽ ലഭിക്കുക?
ഇരുമ്പിൻ്റെ ഏറ്റവും പ്രധാനപ്പെട്ട ഭക്ഷണസ്രോതസ്സുകളിലൊന്നാണ് ചീര. ചീര, പയർവർഗ്ഗങ്ങൾ എന്നിവയിൽ നിന്ന് ശരീരത്തിനാവശ്യമുള്ള ഇരുമ്പ് ലഭിക്കും. മുരിങ്ങയില, പയർ ഇല, അഗത്തിച്ചീര, ചേമ്പില, കാബേജ്, തുടങ്ങിയ പച്ചക്കറികളിലും ഇരുമ്പുണ്ട്. തവിടോട് കൂടിയ ധാന്യങ്ങൾ, മുളപ്പിച്ച കടലകൾ, ശർക്കര, മാംസം, മത്സ്യം, കോഴി, ആട്, മാട് എന്നിവയുടെ കരൾ തുടങ്ങിയവയിൽ ഇരുമ്പ് കൂടുതൽ അടങ്ങിയിട്ടുണ്ട്.
ശർക്കര ഇരുമ്പിൻ്റെ നല്ലൊരു ഉറവിടമാണ്. മാത്രമല്ല ശർക്കരയിലെ ഇരുമ്പ് മനുഷ്യശരീരത്തിന് കൂടുതൽ ആഗിരണം ചെയ്യാനാകും എന്നും പഠനങ്ങളുണ്ട്. ശർക്കര പാനിയിൽ നെല്ലിക്കയിട്ട് ഉണക്കിയെടുത്ത നെല്ലിക്കമിഠായി ഗർഭിണികൾക്ക് പരമ്പരാഗതമായി തന്നെ നൽകിവരുന്നത് ഇരുമ്പിൻ്റെ അളവ് കുറയാതിരിക്കാനാണ്.
വിളർച്ച കൂടുതലാണെങ്കിൽ ആരോഗ്യവിദഗ്ധരുടെ നിർദ്ദേശപ്രകാരം ഇരുമ്പ് ഗുളികകൾ കഴിക്കേണ്ടിവരാം. പ്രാഥമിക ആരോഗ്യകേന്ദ്രത്തിലും സർക്കാർ ആശുപത്രികളിലും ഈ ഗുളികകൾ സൗജന്യമായി തന്നെ ലഭിക്കും. ഗർഭിണികൾക്കും പെൺകുട്ടികൾക്കും അംഗനവാടികൾ വഴിയും ഇരുമ്പ് ഗുളികകൾ വിതരണം ചെയ്യാറുണ്ട്.
Discussion about this post