കൊച്ചി: തെന്നിന്ത്യയിൽ പ്രേക്ഷകർ ഇരു കൈയ്യും നീട്ടി സ്വീകരിച്ച മഞ്ഞുമ്മൽ ബോയ്സ് 200 കോടി ക്ലബിൽ എത്തി. ഫെബ്രുവരി 22ന് തിയറ്ററുകളിലെത്തിയ ചിത്രം ഇപ്പോഴും തിയറ്റർ നിറഞ്ഞ് മുന്നേറുകയാണ്.
ഇന്ത്യൻ സിനിമ വ്യവസായത്തിൽ 2024ൽ ഏറ്റവും കൂടുതൽ കളക്ഷൻ നേടിയ ചിത്രങ്ങളിൽ രണ്ടാം സ്ഥാനത്തുള്ള മഞ്ഞുമ്മൽ ബോയ്സ് റിലീസായി 26-ാം ദിവസമാണ് ഈ റെക്കോർഡ് സ്വന്തമാക്കിയത്. ഇതോടെ മലയാള സിനിമ ചരിത്രത്തിൽ ഗ്രോസ് കളക്ഷനിൽ 200 കോടി സ്വന്തമാക്കുന്ന ആദ്യ ചിത്രമായി മാറി മഞ്ഞുമ്മൽ ബോയ്സ്. 2018ന്റെ ഇൻഡസ്ട്രി ഹിറ്റ് മറികടന്നാണ് മഞ്ഞുമ്മൽ ബോയ്സ് 200 കോടി ക്ലബിലെത്തിയത്. 175.50 കോടി 2018ന്റെ റെക്കോർഡ് മഞ്ഞുമ്മൽ ബോയ്സ് 21 ദിവസങ്ങൾ കൊണ്ട് പിന്നിട്ടിരുന്നു.
50 കോടിയിൽ അധികമാണ് തമിഴ്നാട് ബോക്സ്ഓഫീസിൽ ഇതുവരെ മഞ്ഞുമ്മൽ ബോയ്സിന് നേടാനായിട്ടുള്ളത്. ചരിത്രത്തിൽ ആദ്യമായിട്ടാണ് ഡബ് ചെയ്യാത്ത ഒരു മലയാളം ചിത്രം തമിഴ്നാട് ബോക്സ്ഓഫീസിൽ ഇത്രയും വലിയ നേട്ടം സ്വന്തമാക്കുന്നത്. കന്നഡ ബോക്സ്ഓഫീസിലും ചിത്രത്തിന് മികച്ച പ്രതികരണമാണ് ലഭിക്കുന്നത്. 10-15 ഇടയിലാണ് ഇതുവരെയുള്ള ചിത്രത്തിന്റെ കർണാടകയിൽ നിന്നുമുള്ള നേട്ടം
ചിത്രത്തിന്റെ മൊഴിമാറ്റ പതിപ്പുകളും എത്തുന്നതോടെ കളക്ഷൻ ഇരട്ടിയായേക്കും. കേരളത്തിലെ തീയറ്ററുകളിൽ നിന്ന് ചിത്രം 60 കോടിയിലധികം സ്വന്തമാക്കിയിരുന്നു.
Discussion about this post