എത്ര ശ്രമിച്ചിട്ടും ഉറക്കം ശരിയാവുന്നില്ലേ?: നിങ്ങളുടെ പ്രായത്തിന് എത്ര ഉറക്കം വേണം?കണക്ക് അറിയാം

മനുഷ്യർ ശരാശരി മൂന്നിലൊരുഭാഗം ആയുസ്സിന്റെ സമയം ഉറക്കത്തിനു വേണ്ടിയാണ് ചെലവഴിക്കുന്നത്, അതായത് 8 മണിക്കൂർ രാത്രി ഉറക്കം. ചിലരിൽ ഉറക്കക്കുറവ് മൂലം നിരവധി മാനസിക-ശാരീരിക പ്രശ്‌നങ്ങൾ കണ്ടുവരാറുണ്ട്. 2021ൽ നടത്തിയ ഒരു പഠനത്തിൽ, ഉറക്കമില്ലായ്മ ഹൃദയത്തെ ദോഷകരമായി ബാധിക്കുന്ന അനാരോഗ്യകരമായ ശീലമാണെന്നാണ് പറയുന്നത്. മതിയായ സമയം ഉറങ്ങാനായില്ലെങ്കിൽ രക്തസമ്മർദ്ദം കൂടാനും പൊണ്ണത്തടി ഉണ്ടാകാനും അതിനൊപ്പം ഹൃദ്രോഗം പക്ഷാഘാതം എന്നിവയ്ക്കും സാധ്യതയുണ്ടെന്ന് വിവിധ പഠനങ്ങൾ തെളിയിച്ചിട്ടുണ്ട്.

03 മാസം…

നവജാതശിശുക്കൾ, മൂന്ന് മാസം വരെ പ്രായമുള്ള കുഞ്ഞുങ്ങൾ ദീർഘസമയം ഉറങ്ങാറുണ്ട്. ഇവർ 14-17 മണിക്കൂർ വരെ ഉറങ്ങേണ്ടതുണ്ട്. പതിവായി ഉറക്കം കുറവായാൽ കുഞ്ഞുങ്ങളെ ഇത് ബാധിക്കാം.

4-11 മാസം…

നാല് മാസം മുതൽ 11 മാസം വരെ, അതായത് ഒരു വയസ് തികയുന്നതിന് തൊട്ടുമുമ്പ് വരെയാണെങ്കിൽ കുട്ടികൾക്ക് 12-15 മണിക്കൂർ ഉറക്കമാണ് വേണ്ടത്. ഇതിലും കുറവുണ്ടാകാൻ പാടില്ല.

1-2 വയസ്…

ഒരു വയസ് മുതൽ രണ്ട് വയസ് വരെ പ്രായമുള്ള കുട്ടികൾക്കാണെങ്കിൽ ദിവസത്തിൽ 11-14 മണിക്കൂർ ഉറക്കം വേണം. ഇവരുടെ ശാരീരികപ്രവർത്തനങ്ങൾക്ക്- പ്രത്യേകിച്ച് തലച്ചോറിന് ഇത്രയും വിശ്രമം ആവശ്യമാണ്.

3-5 വയസ്

സ്‌കൂളിൽ ചേർക്കുന്നതിന് മുമ്പുള്ള സമയമാണിത്. ഈ സമയത്ത് 10-13 മണിക്കൂർ ഉറക്കമൊക്കെയാണ് കുട്ടികൾക്ക് വേണ്ടത്. ഈ ഘട്ടത്തിൽ കുട്ടികൾ ഏറെ കാര്യങ്ങൾ പഠിച്ചും മനസിലാക്കിയുമൊക്കെ വരികയാണ്. അപ്പോഴും മതിയായ വിശ്രമം നിർബന്ധമാണ്.

6-12 വയസ്

ആറ് വയസ് മുതൽ 12 വയസ് വരെയുള്ള കുട്ടികൾക്കാണെങ്കിൽ 9-12 മണിക്കൂർ നേരത്തെ ഉറക്കമാണ് ആവശ്യമായി വരുന്നത്. സ്‌കൂളിൽ പോകുന്ന കുട്ടികളാണിത്. അതിനാൽ തന്നെ അവർക്ക് ആവശ്യമായ വിശ്രമം ഉറപ്പിക്കണം.

13-18 വയസ്…

13-18 വരെയുള്ള പ്രായം എന്നാൽ അത് കൗമാരകാലമാണ് . ഈ സമയത്ത് 8-10 മണിക്കൂർ ഉറക്കമാണ് കുട്ടികൾക്ക് ആവശ്യമായി വരുന്നത്. കാര്യമായ മാറ്റങ്ങളിലൂടെ ശരീരവും മനസും കടന്നുപോകുന്ന സാഹചര്യമായതിനാൽ തന്നെ മതിയായ വിശ്രമം കുട്ടികൾക്ക് ഈ ഘട്ടത്തിൽ കിട്ടിയേ തീരൂ.

18-60 വയസ്…

മുതിർന്നവർ എന്ന് പറയുമ്പോൾ 18 മുതൽ 60 വയസ് വരെ പ്രായമുള്ളവർ ഇതിലുൾപ്പെടുന്നു. ഇവർക്കെല്ലാം തന്നെ നമ്മൾ ആദ്യമേ സൂചിപ്പിച്ചത് പോലെ 7-9 മണിക്കൂർ ഉറക്കമാണ് വേണ്ടിവരുന്നത്. ഈ ഘട്ടത്തിലെ ഉറക്കമില്ലായ്മ ശാരീരിക-മാനസികാരോഗ്യത്തെ ഒരുപോലെ ബാധിക്കുന്നു.

61ന് ശേഷം…

61 വയസിന് മുകളിലുള്ളവരാകട്ടെ ദിവസം 7-8 മണിക്കൂർ ഉറക്കമാണ് നേടേണ്ടത്. പ്രത്യേകിച്ച് പ്രായമായവരിൽ ഉറക്കം കുറയാറുണ്ട്.