ഡല്‍ഹി: ജനുവരി രണ്ടിന് നടന്ന പത്താന്‍കോട്ട് വ്യോമസേനാ താവളത്തിലെ ആക്രമണം ആസൂത്രണം ചെയ്തത് ജെയ്ഷ ഇ മുഹമ്മദ് തലവന്‍ മസൂദ് അസ്ഹര്‍ തന്നെയെന്ന് പാകിസ്ഥാന്‍ മുന്‍ പ്രസിഡന്റ് പര്‍വേസ് മുഷറഫ്.
സംശയത്തിന്റെ നിഴലില്‍ നില്‍ക്കുന്ന മസൂദിനെ പാകിസ്ഥാനില്‍ നിര്‍ബാധം തുടരാന്‍ അനുവദിക്കുന്നത് ശരിയല്ലെന്നും അദ്ദേഹം പറഞ്ഞു. സി.എന്‍.എന്‍ ഐ.ബി.എന്‍ ചാനലിന് നല്‍കിയ അഭിമുഖത്തിലാണ് മുഷറഫിന്റെ വെളിപ്പെടുത്തല്‍.
പാകിസ്ഥാന്‍ പട്ടാളം 100 ശതമാനവും സമാധാനം ആഗ്രഹിക്കുന്നവരാണ്. പത്താന്‍കോട്ട് ആക്രമണവുമായി പാക് പട്ടാളത്തിനോ ഐ.എസ്.ഐക്കോ യാതൊരുവിധ ബന്ധവുമില്ലെന്നും അഭിമുഖത്തില്‍ മുഷറഫ് വ്യക്തമാക്കി. പാകിസ്ഥാനുമായി പ്രധാനമന്ത്രി നരേന്ദ്രമോദി ചര്‍ച്ചകളിലേര്‍പ്പെടുന്നത് ആത്മാര്‍ഥമായിട്ടല്ല. നവാസ് ഷെരീഫുമായുള്ള അദ്ദേഹത്തിന്റെ കൂടിക്കാഴ്ച കാമ്പില്ലാത്തതായിരുന്നെന്നും അദ്ദേഹം കുറ്റപ്പെടുത്തി.
2003ല്‍ മസൂദ് അസ്ഹര്‍, മുഷഫിനെ വധിക്കാന്‍ ശ്രമിച്ചതായി റിപ്പോര്‍ട്ടുകളുണ്ടായിരുന്നു. തനിക്ക് നേരെയുള്ള വധശ്രമത്തിന് ശേഷവും പാകിസ്ഥാനില്‍ മസൂദ് അസ്ഹറിനെ തുടരാന്‍ അനവദിക്കുന്നതിലുള്ള അമര്‍ഷവും മുഷറഫ് രേഖപ്പെടുത്തി.
Discussion about this post