ഭോപ്പാൽ; ക്രിക്കറ്റിൽ മുൻ ഇന്ത്യൻ നായകൻ മഹേന്ദ്രസിങ് ധോണിയെ പോലെ ഇന്ത്യൻ രാഷ്ട്രീയത്തിലെ മികച്ച ഫിനിഷറാണ് രാഹുൽ ഗാന്ധിയെന്ന് പ്രതിരോധമന്ത്രി രാജ്നാഥ് സിംഗ്. കോൺഗ്രസ് പാർട്ടിയെ ഇല്ലാതാക്കുമെന്ന് രാഹുൽ ഗാന്ധി പ്രതിജ്ഞയെടുത്തിരിക്കുകയാണെന്നും കോൺഗ്രസും അഴിമതിയും തമ്മിൽ അഭേദ്യമായ ബന്ധമുണ്ടെന്നും അദ്ദേഹം പരിഹസിച്ചു. മദ്ധ്യപ്രദേശിലെ സിധി ജില്ലയിൽ തിരഞ്ഞെടുപ്പ് റാലിയെ അഭിസംബോധന ചെയ്യുകയായിരുന്നു അദ്ദേഹം.
”എന്തുകൊണ്ടാണ് ഇങ്ങനെ സംഭവിക്കുന്നതെന്ന് ഞാൻ ചിലപ്പോൾ അത്ഭുതപ്പെടാറുണ്ട്. ഒടുവിൽ ഞാനൊരു നിഗമനത്തിലെത്തി. ആരാണ് ക്രിക്കറ്റിൽ ഏറ്റവും മികച്ച ഫിനിഷർ? (മഹേന്ദ്രസിങ് ധോണി എന്ന് ജനക്കൂട്ടത്തിന്റെ മറുപടി). അതെ ധോണി തന്നെ. ഇന്ത്യൻ രാഷ്ട്രീയത്തിലെ മികച്ച ഫിനിഷർ ആരാണെന്ന് ആരെങ്കിലും ചോദിക്കുന്നുവെന്ന് വയ്ക്കുക. ഞാൻ പറയും, അത് രാഹുൽ ഗാന്ധിയാണെന്ന്. നിരവധി നേതാക്കൾ കോൺഗ്രസ് വിടുന്നതിന്റെ പ്രധാനകാരണം ഇതാണ്.” എന്നായിരുന്നു കേന്ദ്രമന്ത്രിയുടെ പരാമർശം.
ഒരുകാലത്ത് ഇന്ത്യൻ രാഷ്ട്രീയത്തിൽ കോൺഗ്രസ് ആധിപത്യം പുലർത്തിയിരുന്നെങ്കിലും ഇപ്പോൾ രാജ്യത്ത് രണ്ടോ മൂന്നോ ചെറിയ സംസ്ഥാനങ്ങളിൽ മാത്രമാണ് ഭരിക്കുന്നത്. അധികാരത്തിലിരിക്കുമ്പോൾ കോൺഗ്രസ് നിരവധി വാഗ്ദാനങ്ങൾ നൽകിയിരുന്നുവെന്നും അവ ഭാഗികമായെങ്കിലും നിറവേറ്റിയിരുന്നെങ്കിൽ ഇന്ത്യ വളരെ മുമ്പുതന്നെ ശക്തമായ രാജ്യമാകുമായിരുന്നുവെന്നും കേന്ദ്രമന്ത്രി കുറ്റപ്പെടുത്തി.
മിക്ക കോൺഗ്രസ് സർക്കാരുകളും അഴിമതി ആരോപണങ്ങൾ നേരിട്ടിരുന്നു, എന്നാൽ പ്രധാനമന്ത്രി നരേന്ദ്ര മോദിയുടെ സർക്കാരിലെ ഒരു മന്ത്രിക്കെതിരെയും അത്തരം ആരോപണങ്ങൾ ഉണ്ടായിട്ടില്ലെന്നും അദ്ദേഹം പറഞ്ഞു. 2045ഓടെ ഇന്ത്യ ഇന്ത്യ സൂപ്പർ പവർ ആകുമെന്ന് അദ്ദേഹം കൂട്ടിച്ചേർത്തു.
