ലഹോര്‍: ഇന്ത്യന്‍ ടെസ്റ്റ് ടീം നായകന്‍ വിരാട് കോഹ്‌ലിയുടെ പാക്കിസ്ഥാനിലെ ആരാധകന്‍ തന്റെ വീട്ടില്‍ ഇന്ത്യന്‍ ദേശീയ പതാക ഉയര്‍ത്തി അറസ്റ്റിലായി. പാക്കിസ്ഥാനിലെ പഞ്ചാബ് പ്രവിശ്യയിലെ ഒക്കാറ ജില്ലയില്‍ നിന്നുള്ള ഉമര്‍ ദ്രാസ് എന്ന പാക്ക് പൗരനാണ് അറസ്റ്റിലായത്.
ക്രമസമാധാന പാലനം മുന്‍നിര്‍ത്തി ഉമറിനെ അറസ്റ്റ് ചെയ്തതായി പൊലീസ് അറിയിച്ചു. കോടതിയില്‍ ഹാജരാക്കിയ ഉമറിനെ പൊലീസ് കസ്റ്റഡിയില്‍ റിമാന്‍ഡ് ചെയ്തു.
ഉമറിന്റെ വീട്ടില്‍ ഇന്ത്യന്‍ പതാക ഉയര്‍ത്തിയതായി പരാതി ലഭിച്ചതിനെ തുടര്‍ന്ന് പൊലീസ് ഉദ്യോഗസ്ഥര്‍ സ്ഥലത്തെത്തുകയായിരുന്നു. തുടര്‍ന്ന്, ഇയാളുടെ വീട്ടില്‍ നടത്തിയ പരിശോധനയില്‍ ഇന്ത്യന്‍ പതാക കണ്ടെടുത്തതായി പൊലീസ് ഉദ്യോഗസ്ഥന്‍ മുഹമ്മദ് ജമീല്‍ അറിയിച്ചു.
അതേസമയം, താന്‍ വിരാട് കോഹ്‌ലിയുടെ കടുത്ത ആരാധകനാണെന്ന് ഉമര്‍ പ്രതികരിച്ചു. ഞാന്‍ ഇന്ത്യന്‍ ടീമിനെ പിന്തുണയ്ക്കുന്നത് തന്നെ കോഹ്‌ലി ഉള്ളതുകൊണ്ടാണ്. വീട്ടില്‍ ഇന്ത്യന്‍ പതാക ഉയര്‍ത്തിയതും കോഹ്‌ലിയോടുള്ള ഇഷ്ടംകൊണ്ടു തന്നെയെന്നും ഉമര്‍ പറഞ്ഞു.
Discussion about this post