ജീവിതത്തിൽ ഒരിക്കലെങ്കിലും കരയാത്തവരായി ആരുമുണ്ടാവില്ല.വൈകാരികാവസ്ഥയനുസരിച്ച് മനുഷ്യരിൽ നടക്കുന്ന പ്രതികരണ പ്രവർത്തനമാണ് കരച്ചിൽ. ജനനം മുതൽ മരണം വരെ ജീവിതത്തിന്റെ പല ഘട്ടങ്ങളിലും കരച്ചിൽ ഉളവാക്കാവുന്ന അനുഭവങ്ങളോ സന്ദർഭങ്ങളോഉണ്ടാകാറുണ്ട്. ചിലർ സങ്കടം വരുമ്പോൾ മാത്രമല്ല സന്തോഷം വരുമ്പോഴും കരയും. ഒരു വികാരത്തോടുള്ള ശരീരത്തിന്റെ സ്വാഭാവിക പ്രതികരണമാണ് കരച്ചിൽ.
എന്തിനാണിങ്ങനെ കരയുന്നത് എന്ന് പലരും പലരോടും ചോദിക്കാറുണ്ട്. എന്നാൽ കരയുന്നത് കൊണ്ട് ചില ഗുണങ്ങളുമുണ്ട്. നമ്മൾ കരയുമ്പോൾ, ശരീരം എൻഡോർഫിനുകളും ഓക്സിടോസിനും പുറത്തുവിടുമെന്ന് ഗവേഷണങ്ങൾ സൂചിപ്പിക്കുന്നു. ഈ പ്രകൃതിദത്ത കെമിക്കൽ മെസഞ്ചറുകൾ ശാരീരിക വേദനയ്ക്കൊപ്പം വൈകാരിക ക്ലേശങ്ങളും ഒഴിവാക്കാൻ നമ്മളെ സഹായിക്കുന്നു.
സ്ട്രെസ്സ് ഹോർമോണുകൾ നിർമിക്കാൻ ശരീരം ഉപയോഗിക്കുന്ന രാസവസ്തുക്കൾ കരച്ചിലിലൂടെ പുറന്തള്ളപ്പെടുന്നു. ശരീരത്തിന് ഒരു മസ്സാജിലൂടെ ലഭിക്കുന്ന അതേ ഗുണങ്ങൾ കരച്ചിലിലുടെയും ലഭിക്കുന്നു.
കണ്ണുകളുടെ ആരോഗ്യം നിലനിർത്താനും ഒക്കെ കരച്ചിൽ സഹായകമാണ്. കൃഷ്ണമണിക്കും, കൺപീലികൾക്കും ഒക്കെ സുഗമമായി പ്രവർത്തിക്കാനുള്ള ഒരു എണ്ണയാണ് കരച്ചിൽ. വരണ്ടിരിക്കുന്ന കണ്ണിന് ആശ്വാസം കൂടിയാണത്. അതുപോലെ ശ്ലേഷ്മപടലങ്ങളെ നിർജലീകരണത്തിൽ നിന്ന് രക്ഷിക്കാനും ഇതുവഴി സാധിക്കുന്നു.
കണ്ണുനീരിൽ അടങ്ങിയിരിക്കുന്ന ലിസോസൈം ബാക്ടീരിയയിൽ നിന്നും വൈറസുകളിൽ നിന്നും കണ്ണിനെ സംരക്ഷിക്കുന്നു. കണ്ണിന്റെ നനവ് നിലനിർത്തുന്നതിലൂടെ കാഴ്ചയ്ക്കും ഗുണം ചെയ്യുന്നു. കണ്ണിലെ മാത്രമല്ല മൂക്കിലെ ബാക്ടീരിയയെയും നശിപ്പിക്കുന്നു.
സമ്മർദം: സ്ട്രെസ് ഹോർമോണുകളിൽ നിന്ന് ആശ്വാസം നൽകാനുള്ള ശരീരത്തിന്റെ ഒരു മാർഗമാണ് കരച്ചിൽ. കരച്ചിലിനുശേഷം സമ്മർദം കുറയുന്നതായി കാണുന്നു.
അനുകമ്പ: കരച്ചിൽ ഒരു വ്യക്തിഗത പ്രക്രിയയാണെങ്കിലും, അത് അനുകമ്പയും സാമൂഹിക സ്വഭാവവും വർധിപ്പിച്ചതായി കാണുന്നു.
Discussion about this post