ഒന്ന് പണക്കാരനായി ജീവിക്കണമെന്ന് ആഗ്രഹിക്കാത്തവരായി ആരും തന്നെ നമ്മുടെയിടയിൽ ഉണ്ടാകില്ല. അതിനായി ലോട്ടറി എടുക്കുന്നവരും നറുക്കെടുപ്പുകൾ എടുക്കുന്നവരുമാണ് നമുക്കിടയിലെ പലരും. സേവിംഗ്‌സിനായി പല വഴികളും നോക്കാറുമുണ്ട്. അത്തരത്തിൽ ഒരു യുവാവാണ് ഇപ്പോൾ സോഷ്യൽ മീഡിയയിൽ എല്ലാം താരം.
പ്രവാസിയായ ആന്ധ്രാപ്രദേശ് സ്വദേശി നാഗേന്ദ്രം ബൊരുഗഡ ഇപ്പോൾ ഒരു കോടീശ്വരനാണ്. ഒരോ മാസവും 100 ദിർഹം അതായത് 2,272 രൂപ നാഗേന്ദ്രം മാറ്റി വക്കുകയായിരുന്നു. എന്നാൽ, നാഷണൽ ബോണ്ട് നറുക്കെടുപ്പിൽ 2.27 കോടി രൂപയാണ് നാഗേന്ദ്രത്തിന് സമ്മാനമായി ലഭിച്ചത്.
46കാരനായ നാഗേന്ദ്രം ഒരു ഇലക്ട്രീഷ്യനാണ്. 2017ലാണ് അദ്ദേഹം യുഎഇയിലെത്തിയത്. 2019 മുതലാണ് കിട്ടുന്ന ശമ്പളത്തിന്റെ ഒരു പങ്ക് തന്റെ കുടുംബത്തിന്റെ ഭാവിയ്ക്കായി നാഷണൽ ബോണ്ടിൽ നിക്ഷേപിച്ചു തുടങ്ങിയത്. ഇതിനിടയിൽ അപ്രതീക്ഷിതമായാണ് നറുക്കെടുപ്പിലൂടെ ഭാഗ്യം നാഗേന്ദ്രത്തെ തേടിയെത്തിയത്.
തന്റെ കുടുംബത്തെ നല്ല രീതിയിലെത്തിക്കാനും 18ഉം 14ഉം വയസുകാരായ മക്കൾക്ക് മികച്ച വിദ്യഭ്യാസം നേടിക്കൊടുക്കാനും വേണ്ടിയായിരുന്നു താൻ വിദേശത്ത് പോയതെന്ന് നാഗേന്ദ്രം പറയുന്നു. അപ്രതീഷിതമായാണ് ഈ സമ്മാനം തന്നെ തേടിയെത്തിയത്. മക്കളുടെ ഭാവി സുരക്ഷിതമാക്കാനും തന്റെ അഭിലാഷങ്ങൾ പൂർത്തീകരിക്കാനും നാഷണൽ ബോണ്ട് അവസരം നൽകിയെന്നും നാഗേന്ദം പ്രതികരിച്ചു.
