ഇന്ന് എല്ലാ വീടുകളിലെയും അടുക്കളയിൽ സ്ഥാനം പിടിച്ച ഒന്നാണ് നോൺസ്റ്റിക് പാനുകൾ. പേര് സൂചിപ്പിക്കുന്നത് പോലെ തന്നെ പാകം ചെയ്യുമ്പോൾ ഭക്ഷണം ഒട്ടിപ്പിടിക്കുന്നില്ല എന്നതാണ് ഇത്തരം പാത്രങ്ങളുടെ പ്രധാന സവിശേഷത. അധികം എണ്ണ ഉപയോഗിക്കാതെ തന്നെ വറുക്കാനും പൊരിക്കാനും കഴിയുന്നു എന്നതും നോൺസ്റ്റിക് പാനുകളെ വീട്ടമ്മമാരുടെ പ്രിയപ്പെട്ടത് ആക്കുന്നു.
എന്നാൽ മറ്റ് പാത്രങ്ങളെപ്പോലെ ദീർഘനാൾ ഉപയോഗിക്കാൻ കഴിയില്ല എന്നത് ഇത്തരം പാത്രങ്ങളുടെ പോരായ്മയാണ്. ഇതിന്റെ നോൺസ്റ്റിക് കോട്ടിംഗ് ഇളകി പോയാൽ പിന്നെ ഭക്ഷണം പാകം ചെയ്യുക ദുഷ്‌കരമാണ്. മാത്രമല്ല നോൺസ്റ്റിക് കോട്ടിംഗ് ഇളകിയ പാനുകളിൽ ഭക്ഷണം ഉണ്ടാക്കി കഴിച്ചാൽ ശരീരത്തിന് അത് ദോഷവും ചെയ്യു. അതിനാൽ കോട്ടിംഗ് ഇളകിയാൽ ഇത്തരം പാനുകൾ മാറ്റിവയ്ക്കുകയാണ് പതിവ്. എന്നാൽ ഇനി അതിന്റെ ആവശ്യമില്ല. തൊടിയിൽ നിൽക്കുന്ന വാഴയുടെ ഇലയിൽ ഉണ്ട് ഇതിനുള്ള പരിഹാരം.
പാനുകളിൽ നോൺസ്റ്റിക് കോട്ടിംഗ് ആയി പ്രവർത്തിക്കാൻ വാഴയിലയ്ക്ക് കഴിയും. അതിനാൽ മീനോ ഇറച്ചിയോ വറുക്കാൻ ഈ വിദ്യ പ്രയോഗിക്കുന്നത് നല്ലതാകും. പാനിന്റെ ആകൃതിയിൽ വാഴ ഇല കീറി എടുക്കലാണ് ആദ്യ പടി. ശേഷം പാൻ കത്തിച്ച് ഈ വാഴ ഇല പാനിൽവച്ച് വാട്ടിയെടുക്കാം. മൂത്ത വാഴ ഇല എടുക്കാൻ പ്രത്യേകം ശ്രദ്ധിക്കണം. ഇല വാട്ടിയ ശേഷം തണുക്കാനായി വയ്ക്കുക. ഇതിന് ശേഷം പാനിൽ വച്ച് ഈ ഇലയിൽ വറുക്കുകയോ പൊരിക്കുകയോ ചെയ്യാം.
വാട്ടിയ വാഴ ഇല പാനിൽ വച്ച ശേഷം എണ്ണ ഒഴിയ്ക്കുക. ഈ എണ്ണ ചൂടായ ശേഷം മീനും ഇറച്ചിയും ഇതിൽ വറുക്കാം. ഭക്ഷണം നന്നായി മൊരിഞ്ഞുവരുമെന്ന് മാത്രമല്ല നല്ല രുചിയും ലഭിക്കും. ഇല മൊരിഞ്ഞാൽ എടുത്ത് മാറ്റി സമാന രീതിയിൽ മറ്റൊരില വയ്ക്കാം. നോൺസ്റ്റിക് പാനിന് സമാനമായ രീതിയിൽ കുറവ് എണ്ണ മാത്രം ഇത്തരത്തിൽ പാകം ചെയ്യാൻ. വാഴ ഇലയിൽ ഭക്ഷണം പാകം ചെയ്യുന്നത് ആരോഗ്യത്തിനും ഗുണകരമാണ്.
