വയനാട്: ജില്ലയിലെ വിദ്യാഭ്യാസ സ്ഥാപനങ്ങൾക്ക് നാളെ അവധി നൽകി ജില്ലാ കളക്ടർ. ജില്ലയിൽ കനത്ത മഴ തുടരുന്ന പശ്ചാത്തലത്തിലാണ് അവധി നൽകിയത്. ഔദ്യോഗിക ഫേസ്ബുക്ക് പേജിലൂടെയാണ് ജില്ലകളക്ടർ അവധി നൽകുന്നതായി അറിയിച്ചത്.
ജില്ലയിലെ പ്രൊഫഷണൽ കോളേജ് ഉൾപ്പെടെയുള്ള സ്ഥാപനങ്ങൾക്കാണ് അവധി നൽകിയിരിക്കുന്നത്. അങ്കണവാടികളും ട്യൂഷൻ സെന്ററുകളും തുറന്ന് പ്രവർത്തിപ്പിക്കരുതെന്ന് ജില്ലാ കളക്ടർ അറിയിച്ചു. അതേസമയം മുൻകൂട്ടി നിശ്ചയിച്ച പരീക്ഷകൾക്ക് അവധി ബാധകമല്ല. പിഎസ്‌സി പരീക്ഷകളും അഭിമുഖങ്ങളും നടക്കും. മോഡൽ റസിഡൻഷ്യൽ , നവോദയ സ്‌കൂളുകൾക്കും അവധി ബാധകമല്ല.
കനത്ത മഴയുടെ സാഹചര്യത്തിൽ വയനാട് ജില്ലയിൽ നാളെ ഓറഞ്ച് അലർട്ടാണ് പുറപ്പെടുവിച്ചിരിക്കുന്നത്. മഴ തുടരുന്നതിനാൽ മുന്നറിയിപ്പിൽ മാറ്റം വരുത്താനാണ് സാദ്ധ്യത. മഴ ശക്തിപ്രാപിച്ചതോടെ ഇന്ന് ജില്ലയിൽ റെഡ് അലർട്ട് പ്രഖ്യാപിച്ചിരുന്നു.
