ചണ്ഡീഗഡ്: പഞ്ചാബിൽ ഭീകരർ. പഠാൻകോട്ടിലെ ഫഗ്‌ടോളി ഗ്രാമത്തിലാണ് ഭീകരർ എത്തിയത്. ഇതേ തുടർന്ന് പ്രദേശത്ത് അതീവ ജാഗ്രതാ നിർദ്ദേശം പുറപ്പെടുവിച്ചു. തിരച്ചിലും ശക്തമാക്കിയിട്ടുണ്ട്.
ഏഴോളം ഭീകരർ പ്രദേശത്ത് ഉണ്ടെന്നാണ് രഹസ്യാന്വേഷണ വിഭാഗം വ്യക്തമാക്കുന്നത്. രാവിലെ ഗ്രാമത്തിൽ സംശയാസ്പദമായ സാഹചര്യത്തിൽ കാൽപ്പാടുകൾ കണ്ടെത്തിയിരുന്നു. ഇതുമായി ബന്ധപ്പെട്ട് നടത്തിയ അന്വേഷണത്തിലായിരുന്നു ഭീകരർ എത്തിയതായി സ്ഥിരീകരിച്ചത്. ഇതോടെ ജാഗ്രതാ നിർദ്ദേശം പുറപ്പെടുവിക്കുകയായിരുന്നു.
പ്രദേശത്ത് ഭീകരർക്കായി പരിശോധന ആരംഭിച്ചിട്ടുണ്ട്. ഇന്ത്യൻ സൈന്യത്തിന്റെയും പോലീസിന്റെയും സംയുക്ത സംഘമാണ് പ്രദേശത്ത് പരിശോധന നടത്തുന്നത്. ഭീകരരെ നേരിട്ട് കണ്ടതായി ചിലർ സുരക്ഷാ സേനയ്ക്ക് മൊഴി നൽകിയിട്ടുണ്ട്. ഇതിന്റെ അടിസ്ഥാനത്തിൽ രേഖാ ചിത്രം തയ്യാറാക്കിയിട്ടുണ്ട്. നിലവിൽ ഗ്രാമം മൊത്തം സുരക്ഷാ സേന വളഞ്ഞിട്ടുണ്ട്.
കാർഗിൽ യുദ്ധത്തിൽ പാകിസ്താനെതിരെ ഇന്ത്യ വിജയം നേടിയതിന്റെ 25ാം വാർഷികം ആണ് നാളെ. ഇതിനിടെയാണ് പഠാൻകോട്ടിൽ ഭീകരർ എത്തിയിരിക്കുന്നത്. ഇതിൽ ആശങ്കയിലാണ് രാജ്യം. ജമ്മു കശ്മീരിലും അതീവ സുരക്ഷയാണ് ഒരുക്കിയിരിക്കുന്നത്.
