തിരുവനന്തപുരം: സംസ്ഥാനത്ത് ഇന്നും മഴ തുടരും. ബംഗാൾ ഉൾക്കടലിൽ ചക്രവാതചുഴി രൂപം കൊണ്ടതാണ് സംസ്ഥാനത്ത് മഴ തുടരാൻ കാരണം ആകുന്നത്. സംസ്ഥാന വ്യാപകമായി ശക്തമായ മഴ ലഭിക്കുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം.
ചക്രവാതചുഴി ശക്തിപ്രാപിച്ച് ഇന്ന് ന്യൂനമർദ്ദം ആയേക്കും. ഈ സാഹചര്യത്തിൽ മഴയുടെ ശക്തിവർദ്ധിക്കും. നിലവിൽ മഴ മുന്നറിയിപ്പുകൾ കാലാവസ്ഥാ നിരീക്ഷണ കേന്ദ്രം പുറപ്പെടുവിച്ചിട്ടില്ല. എങ്കിലും ജാഗ്രത പാലിക്കണം എന്നാണ് നിർദ്ദേശം.
കഴിഞ്ഞ ദിവസങ്ങളിലെല്ലാം അതിശക്തമായ മഴയാണ് സംസ്ഥാന വ്യാപകമായി ലഭിച്ചത്. ഈ സാഹചര്യത്തിലാണ് മഴ തുടരുന്നതിൽ ജാഗ്രത പാലിക്കണം എന്ന് കാലാവസ്ഥാ നിരീക്ഷണ കേന്ദ്രം അറിയിക്കുന്നത്. വരും ദിവസങ്ങളിൽ മഴയുടെ ശക്തി വർദ്ധിക്കും. ഈ സാഹചര്യത്തിൽ ശനിയാഴ്ച കണ്ണൂർ, കാസർകോട് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്.
തീരദേശ വടക്കൻ ആന്ധ്രാപ്രദേശിന് മുകളിലും ചക്രവാതചുഴി സ്ഥിതി ചെയ്യുന്നുണ്ട്. ഇത് മധ്യ പടിഞ്ഞാറൻ / വടക്കു പടിഞ്ഞാറൻ ബംഗാൾ ഉൾക്കടലിനു മുകളിലായി ന്യുന മർദ്ദമായി ശക്തി പ്രാപിക്കാൻ സാദ്ധ്യതയുണ്ട്. രാജസ്ഥാന് മുകളിൽ സ്ഥിതിചെയ്തിരുന്ന ന്യൂനമർദ്ദം ചക്രവാത ചുഴിയായി ശക്തി കുറഞ്ഞു. മധ്യ പടിഞ്ഞാറൻ അറബിക്കടൽ ന്യൂനമർദ്ദം ഒമാൻ തീരത്തിന് സമീപം ചക്രവാത ചുഴിയായി ശക്തി കുറഞ്ഞതായും കാലാവസ്ഥാ നിരീക്ഷണ കേന്ദ്രം അറിയിച്ചു.
