ന്യൂഡൽഹി: പ്രതിപക്ഷ നേതാവ് രാഹുൽ ഗാന്ധി അമേരിക്കൻ സന്ദർശനത്തിനിടെ നടത്തിയ ഇന്ത്യ വിരുദ്ധവും സിഖുകാരെ കുറിച്ചുള്ളതുമായ പരാമർശങ്ങൾ വലിയ വിവാദങ്ങൾക്കാണ് വഴി വച്ചത്. നിരവധി പേരാണ് രാഹുൽ ഗാന്ധിയെ വിമർശിച്ച് രംഗത്ത് വന്നിരിക്കുന്നത്. സംഭവത്തിൽ പ്രതിഷേധം കനക്കുന്നതിനിടെ, രാഹുൽ ഗാന്ധിയെ പിന്തുണച്ച് എത്തിയിരിക്കുകയാണ് ഖാലിസ്ഥാനി ഭീകരനായ ഗുർപത്വന്ത് സംഗ് പന്നൂൻ.
ഇന്ത്യയിലെ സിഖുകാരുടെ അസ്ഥിത്വ ഭീഷണിയെ കുറിച്ചുള്ള രാഹുലിന്റെ പ്രസ്താവന ധീരവും മാർഗദർശിയുമായ ഒന്ന് മാത്രമല്ല, ഇന്ത്യയിൽ സിഖുകാർ നേരിടുന്ന പ്രശ്‌നങ്ങളുടെ ചരിത്രത്തിലൂന്നിയുള്ളതു കൂടിയാണെന്ന് പന്നൂൻ പ്രതികരിച്ചു. 1947 മുതൽ ഇന്ത്യയിലെ തുടർച്ചയായ ഭരണത്തിന് കീഴിൽ സിഖുകാർ നേരിടുന്ന പ്രശ്‌നങ്ങളുടെ ചരിത്രത്തിൽ ഊന്നിയുള്ളതും സിഖ് മാതൃഭൂമി സ്ഥാപിക്കുന്നതിലുള്ള എസ്എഫ്‌ജെയുടെ നിലപാടിനെ സ്ഥിരീകരിക്കുന്നതുമാണ് രാഹുലിന്റെ നിലപാടെന്ന് പന്നൂൻ കൂട്ടിച്ചേർത്തു.
വിർജീനയിലെ ഹെർണ്ടണിയിൽ നടന്ന ഒരു പരിപാടിക്കിടെയായിരുന്നു രാഹുൽ ഗാന്ധിയുടെ വിവാദപ്രസ്താവന. ഇന്ത്യയിൽ മതസ്വാതന്ത്ര്യം ഇല്ല. ഇന്ത്യയിൽ സിഖുകാർക്ക് അവരുടെ തലപ്പാവ് ധരിക്കാനോ അവരുടെ മത ചിഹ്നങ്ങൾ ധരിക്കാനോ കഴിയുമോ എന്നും രാഹുലിന്റെ ചോദിച്ചു. അവർക്ക് ഗുരുദ്വാരയിലേക്ക് പോവാനുള്ള സ്വാതന്ത്ര്യം ഉണ്ടോ എന്നതിലാണ് ഇന്ത്യയിൽ നടക്കുന്ന പോരാട്ടം. ഇത് സിഖുകാരുടെ കാര്യം മാത്രമല്ല, രാജ്യത്തെ എല്ലാ മതങ്ങളുടെയും അവസ്ഥയാണെന്നും രാഹുൽ പറഞ്ഞു.
രാഹുലിന്റെ പ്രസ്താവനയെ ബിജെപി കടുത്ത ഭാഷയിൽ വിമർശിച്ചു. 1984ൽ എന്താണ് നടന്നതെന്ന് രാഹുൽ ഗാന്ധിക്ക് ഓർമയില്ലേ എന്ന് ബിജെപി ചോദിച്ചു. 1984ൽ 3000 സിഖുകളെ കൂട്ടക്കൊല ചെയ്തു. അവരുടെ തലപ്പാവ് അഴിച്ചു മാറ്റി. തലമുടി മുറിച്ചു. താടി വടിച്ചു. ഇതെല്ലാം സംഭവിച്ചത് കോൺഗ്രസിന്റെ ഭരണകാലത്ത് തന്നെയല്ലേ എന്ന് ബിജെപി ചോദിച്ചു. കോൺഗ്രസിന്റെ സമയത്താണ് ഇതെല്ലാം സംഭവിച്ചതെന്ന് രാഹുൽ ഗാന്ധി പരാമർശിക്കാത്തത് എന്താണ്? സിഖ് സമുദായവുമായി ബന്ധപ്പെട്ടുള്ള കോൺഗ്രസിന്റെ ചരിത്രത്തെ കുറിച്ച് രാഹുൽ അവഗണിക്കുകയാണെന്നും ബിജെപി ദേശിയ വക്താവ് ആർപി സിംഗ് കുറ്റപ്പെടുത്തി.
