ഭാഗംവെപ്പ് ഇല്ല ; അഞ്ചുവർഷവും മുഖ്യമന്ത്രി ദേവേന്ദ്ര ഫഡ്നാവിസ് തന്നെ ; ഷിൻഡെ ഉപ മുഖ്യമന്ത്രി ആകുമെന്ന് സൂചന

മുംബൈ : മഹാരാഷ്ട്ര തിരഞ്ഞെടുപ്പിലെ കനത്ത വിജയത്തെ തുടർന്ന് ബിജെപി നേതൃത്വത്തിലുള്ള മഹായുതി സഖ്യം വൈകാതെ തന്നെ അധികാരം ഏറ്റെടുക്കും. ബിജെപി നേതാവ് ദേവേന്ദ്ര ഫഡ്നാവിസ് ആയിരിക്കും മഹാരാഷ്ട്ര മുഖ്യമന്ത്രിയാകുന്നത്. ശിവസേന നേതാവും നിലവിലെ മഹാരാഷ്ട്ര മുഖ്യമന്ത്രിയുമായ ഏകനാഥ് ഷിൻഡെ ചൊവ്വാഴ്ച മുഖ്യമന്ത്രി സ്ഥാനം രാജിവച്ചു.

അടുത്ത മഹായുതി സഖ്യത്തിന്റെ സർക്കാരിൽ ഏകനാഥ് ഷിൻഡെ ഉപമുഖ്യമന്ത്രിയാകും എന്നാണ് റിപ്പോർട്ടുകൾ സൂചിപ്പിക്കുന്നത്. മുംബൈയിലെ രാജ്ഭവനിൽ ഗവർണർ സിപി രാധാകൃഷ്ണന് ഷിൻഡെ ഇന്ന് രാജിക്കത്ത് സമർപ്പിച്ചു. പുതിയ മുഖ്യമന്ത്രി സത്യപ്രതിജ്ഞ ചെയ്യും വരെ കാവൽ മുഖ്യമന്ത്രിയായി പ്രവർത്തിക്കാൻ ഗവർണർ ഷിൻഡെയോട് ആവശ്യപ്പെട്ടിട്ടുണ്ട്. മുൻ മന്ത്രി സഭയിൽ ഉപ മുഖ്യമന്ത്രിയായിരുന്ന അജിത് പവാർ പുതിയ മന്ത്രിസഭയിലും ഉപമുഖ്യമന്ത്രിയായി തുടരാൻ സാധ്യതയുണ്ട് എന്നും റിപ്പോർട്ടുകൾ സൂചിപ്പിക്കുന്നു.

മഹാരാഷ്ട്രയിലെ 288 അംഗ നിയമസഭയിൽ 235 സീറ്റുകൾ നേടിയാണ് മഹായുതി സഖ്യം അധികാരത്തിൽ എത്തുന്നത്. ഉപ മുഖ്യമന്ത്രി പദവി കൂടാതെ ഏകനാഥ്‌ ഷിൻഡെയ്ക്ക് നഗരവികസന മന്ത്രാലയമോ പൊതുമരാമത്ത് വകുപ്പോ നൽകുമെന്നും സൂചനയുണ്ട്. എൻസിപി നേതാവ് അജിത് പവാറിന് ധനകാര്യവകുപ്പും നൽകിയേക്കും എന്നും റിപ്പോർട്ടുകൾ സൂചിപ്പിക്കുന്നു.