വാഗ്ദാനം ചെയ്തത് ഡ്രൈവർ വിസ, നൽകിയത് കോൺക്രീറ്റ് ജോലി ; എതിർത്തപ്പോൾ അറബി ഫാമിലേക്ക് കൊണ്ടുപോയി ; മകനെ കാണാനില്ലെന്ന് അമ്മ

കൊല്ലം പുനലൂർ സ്വദേശിയായ ഗോകിൽ എന്ന യുവാവിനെ കുവൈറ്റിൽ വച്ച് കാണാതായെന്ന പരാതിയുമായി അമ്മ. ഗോകിലിനെ കണ്ടെത്താൻ സഹായിക്കണമെന്ന് ആവശ്യപ്പെട്ട് അമ്മ അജിത അനു സമൂഹമാദ്ധ്യമങ്ങളിൽ പങ്കുവെച്ച കുറിപ്പാണ് ഇപ്പോൾ ശ്രദ്ധ നേടുന്നത്. കുവൈറ്റിൽ തന്നെയാണ് യുവാവിന്റെ അമ്മയും ജോലി ചെയ്യുന്നത്. പരിചയമുള്ള ഒരു വ്യക്തിയിൽ നിന്നും ഡ്രൈവർ വിസയിലൂടെയാണ് മകനെ കുവൈറ്റിലേക്ക് കൊണ്ടുവന്നിരുന്നത്. എന്നാൽ ലൈസൻസ് ലഭിക്കുന്നതുവരെ കോൺക്രീറ്റ് ജോലി ചെയ്യാനായി അറബി ആവശ്യപ്പെടുകയായിരുന്നു എന്നാണ് യുവാവിന്റെ അമ്മ വ്യക്തമാക്കുന്നത്. ഈ ജോലി ചെയ്യാൻ കഴിയാതെ പരാതിപ്പെട്ടപ്പോൾ അറബിയുടെ ഫാമിലേക്ക് കൊണ്ടുപോയതായും പിന്നീട് മകനെ കുറിച്ച് വിവരം ഒന്നും ഇല്ല എന്നും അജിത വ്യക്തമാക്കുന്നു.

അജിത അനു പങ്കുവെച്ച സമൂഹമാദ്ധ്യമ പോസ്റ്റ്,

ഇത് എന്റെ മകൻ ഗോകിൽ അവന് ഇപ്പൊ 23 വയസ്സ്
പ്ലസ് റ്റു കഴിഞ്ഞു നാട്ടിൽ കൂട്ടുകെട്ടുമായി നടന്നപ്പോൾ ഞാൻ അവനെ ഇങ്ങോട്ട് (കുവൈറ്റിൽ )കൊണ്ടു വരാം എന്ന് കരുതി കൂടെ ജോലി ചെയ്യുന്ന ഒരാളോട് വിസ ഉണ്ടോ എന്ന് ചോദിച്ചു പുള്ളി ഒരു വിസ ശെരിയാക്കി ഡ്രൈവർ ആയി അബ്ദു അലി, ബോർഡർ സൗദി എന്നാണ് എന്നോട് പറഞ്ഞത് അങ്ങനെ നവംബർ 17- തീയതി അവൻ ഇവിടെ കുവൈറ്റിൽ എത്തി 18- ന്
അവന്റ അറബി അവനെ എയർ പോർട്ടിൽ നിന്നും വിളിച്ചു ജഹ്‌റ എന്ന സ്ഥലത്ത് കൊണ്ടാക്കി
അവിടുന്നു ഡ്രൈവർ വിസക്ക് വന്ന അവനെ കൊണ്ടു കെട്ടിട പണി ചെയ്യിക്കാൻ തുടങ്ങി ചോദിച്ചപ്പോൾ ലൈസൻസ് എടുത്തിട്ടേ അവന്റെ ജോലിക്ക് കൊണ്ട് പോകൂ എന്നായിരുന്നു മറുപടി ഒരു മാസം കഴിഞ്ഞു സാലറി ചോദിച്ചപ്പോൾ രണ്ടു മാസത്തിലെ സാലറി കൊടുക്കൂ എന്നും പറഞ്ഞു.
ഡിസംബർ 25- ന് അവൻ പറഞ്ഞു എനിക്ക് ഈ പണി ചെയ്യാൻ വയ്യ അമ്മേ തലേ ദിവസം രാത്രി 10-മണി വരെ കോൺക്രീറ്റ് ഉണ്ടായിരുന്നു
എന്നിട്ട് രാവിലെ എഴുന്നേറ്റ് പോകാൻ പറഞ്ഞാൽ എനിക്ക് വയ്യ
അപ്പൊ ഞാൻ ഇവനെ കൊണ്ടുവന്ന ബാബുരാജ്, നിസാർ എന്നിവരോട് സംസാരിക്കാൻ പറഞ്ഞു. വിസ എടുക്കാൻ ഞാൻ പറഞ്ഞ ആൾ ബാബുരാജിന്റെ മൊബൈൽ നമ്പർ എനിക്ക് തരുന്നു
അയാൾ വളരെ മോശമായി എന്നോട് സംസാരിക്കുകയും ചെയ്തു.
25- തീയതി മോന്റെ അറബി അവനോട് ജോലിക്ക് പോകണ്ട നിന്റെ സാധനങ്ങൾ പായ്ക്ക് ചെയ്തു ഇരിക്കൂ നിന്റെ ഡ്യൂട്ടിക്ക് അതായത് ഡ്രൈവറായി കൊണ്ടു പോകുകയാണ് എന്ന് പറഞ്ഞു അയാൾ സൗദിക്കു കൊണ്ടുപോയി
ചില ദിവസങ്ങളിൽ വിളിച്ചാൽ കിട്ടില്ല
അവിടെ പോയതിന് ശേഷം ആണ് അവിടെ അവർക്ക് നാല് ഫാമാണ് ഉള്ളത് ഒട്ടകം പച്ചക്കറി അങ്ങനെ ഉള്ളത്.
നാട്ടിൽ പോകണം എന്ന് പറഞ്ഞപ്പോൾ അവനെ അടിച്ചു
വലിച്ചിഴച്ചു വണ്ടിയിൽ കേറ്റി എങ്ങോട്ടോ കൊണ്ടു പോയി ആർക്കെങ്കിലും എന്നെ ഒന്ന് സഹായിക്കാൻ പറ്റുമെങ്കിൽ സഹായിക്കൂ അവനെ നാട്ടിൽ എത്തിക്കാൻ പ്ലീസ് 🙏🏻
എന്റെ പ്രൊഫൈലിൽ എന്റെ ഡീറ്റൈൽ ഉള്ളത് കൊണ്ടാണ് ഞാൻ
എന്റെ പേര് എഴുതാതെ ഇരുന്നത്
ഇത് എഴുതുന്ന എന്റെ പേര്
Ajitha Anu
എന്റെ നാട് കൊല്ലം ജില്ലയിൽ പുനലൂർ ആര്യങ്കാവ്.