മാർക്കോയും കല്ലുമാലയും പോലുള്ള സിനിമകൾ സമൂഹത്തിന് നൽകുന്ന സന്ദേശം വയലൻസാണെന്ന് സന്തുല ഹോസ്പിറ്റലിലെ സൈക്കോളജിസ്റ്റായ ഫാദർ എഡ്വേർഡ് ജോർജ്ജ് . വയലൻസ് പ്രോത്സാഹിപ്പിക്കുന്ന ഇത്തരം സിനിമകൾ ബാൻ ചെയ്യണം. ഇങ്ങനെയുള്ള സിനിമകൾ ഉണ്ടാക്കുന്നവർക്കും ഇതേ ക്രിമിനൽ താൽപര്യങ്ങളായിരിക്കും ഉണ്ടാവുക. മാർക്കോ കാണുന്നവന് ഒരാളെ ഇടിക്കാൻ തോന്നും എന്ന് എഡ്വേർഡ് ജോർജ്ജ് പറഞ്ഞു.
ഇന്റർവ്യൂവിലാണ് അദ്ദേഹം ഇക്കാര്യങ്ങൾ പങ്കുവച്ചത്.
ഇപ്പോൾ നടക്കുന്ന കൊലപാതകങ്ങൾക്ക്, ഇത്തരം സിനിമകൾ സൃഷ്ടിക്കുന്ന ആളുകൾക്ക് ഉത്തരവാദിത്യമുണ്ട്. ഇങ്ങനെയുള്ള സിനിമകൾ സെൻസർ ബോർഡ് നിരുത്സാഹപ്പെടുത്തണം എന്നാണ് താൻ പറയുകയുള്ളൂ എന്ന് അദ്ദേഹം പറഞ്ഞു.
വയലൻസിനെ മനുഷ്യർ സ്നേഹിക്കുകയാണ്. ഇത് ഒരു ലഹരിയാണ് . പാട്ട് ചിലർക്ക് ലഹരിയാണ്്. മതം ലഹരിയാണ്. കഥകൾ ലഹരിയാണ്. പുസ്തക വായന ചിലർക്ക് ലഹരിയാണ്.. അതുപോലെ തന്നെ വയലൻസും വൻ ലഹരിയാണ്. വയലൻസ് കണ്ട് തുടങ്ങിയാൽ പിന്നീട് അത് തന്നെ കാണാനായിരിക്കും ചിലർക്ക് താൽപര്യം. അപ്പോൾ നിങ്ങൾ ചോദിക്കുമായിരിക്കും. സിനിമ കണ്ടിട്ടാണോ ആളുകൾ ആക്രമിക്കുന്നത് എന്ന്. എന്നാൽ താൻ പറയും അതേ എന്ന്. മാർക്കോ സിനിമ കണ്ടവന് അടുത്ത് വരുന്നവനെ ഒന്ന് പിടിച്ച് ഇടിക്കാൻ തോന്നും, വയലൻസിന് വേണ്ടിയുള്ള ദാഹം കുഞ്ഞുങ്ങളുടെ ഇടയിലേക്ക് കുത്തിവെയ്ക്കുന്നതിലൂടെ കുട്ടികൾ നശിക്കുകയാണ്. എത്രയേറെ കേസുകളാണ് ഞങ്ങളുടെ അടുത്തേക്ക് വരുന്നത്. എല്ലാവരോടും തനിക്ക് പറയാനുള്ളത് ഇത്തരത്തിലുള്ള സിനിമകൾ കാണാതിരിക്കുക, ഇങ്ങനെയുള്ള സിനിമകൾ കാണില്ല എന്നതിലേക്ക്് സമൂഹം എത്തിയില്ലെങ്കിൽ അനാരോഗ്യകരമായ പ്രവണതകൾ ഉണ്ടാകുന്ന അനുഭവങ്ങൾ ഇനിയും വരും. ഇങ്ങനെയുള്ള സിനിമകൾ ആർക്കും ഉപകാരപ്പെടില്ല. ആളുകളെ തകർത്ത് കളയുക മാത്രമാണ് ചെയ്യുക എന്നും അദ്ദേഹം കൂട്ടിച്ചേർത്തു.
മാംസം വിൽക്കുന്നത് പോലും ഒളിച്ച് വിൽക്കണമെന്നാണ് നമ്മുടെ നിയമം. അങ്ങനെയുള്ള സമൂഹമാണ് മനുഷ്യന്റെ തല വെട്ടികൊണ്ടുപോകുന്നത് പരസ്യമായി കാണിക്കുന്നത്. ഈ കാണിക്കുന്നതെല്ലാം വളരെ വലിയ ദുരന്തമാണ് . ഇങ്ങനെയുള്ള സിനിമകൾ അനുവദിച്ച് കൊടുക്കുന്നത് തന്നെ ക്രിമിനൽ കുറ്റമാണ്. ഒരു സമൂഹത്തെ തന്നെ വഴിതെറ്റിക്കുന്ന സിനിമകളാണ് ഇപ്പോൾ ഇറങ്ങുന്നത്. കാശ് ഉണ്ടാക്കാനായി കഞ്ചാവ് വിൽക്കുന്നതുപോലെ തന്നെയാണ് പണം ഉണ്ടാക്കാൻ ഇങ്ങനെയുള്ള ചിത്രങ്ങൾ നിർമ്മിക്കുന്നത് എന്നും അദ്ദേഹം ചൂണ്ടിക്കാട്ടി.
സിനിമകളിലെ വയലൻസ് സമൂഹത്തെ ബാധിക്കില്ല എന്ന് വാദിക്കുന്നവരുണ്ട്. പക്ഷേ മനശാസ്ത്രജ്ഞർ പല പ്രധാനപ്പെട്ട പഠനങ്ങൾ ഇതിന് പിന്നിൽ നടത്തിയിട്ടുണ്ട് . മുന്ന് തരത്തിലുള്ള സിനിമകൾ കുട്ടികളെ കാണിച്ചു. ഒന്നാമതായി വയലൻസ് കാണിക്കുന്ന ചിത്രങ്ങൾ. രണ്ടാമതായി വയലൻസിനെ പ്രകീർത്തിപ്പിക്കുന്ന ചിത്രങ്ങൾ . മൂന്നാമതായി വയലൻസ് തീരെ ഇല്ലാത്ത ചിത്രങ്ങൾ . ഇങ്ങനെ ആവർത്തിച്ച് കുട്ടികളെ ചിത്രങ്ങൾ കാണിച്ചു കൊടുത്തു. എന്നാൽ വയലൻസ് പ്രകീർത്തിപ്പിക്കുന്ന ചിത്രം കാണിച്ച കുട്ടികളിൽ പോലും വയലൻസ് കാണിക്കാനുള്ള പ്രേരണ കൂടുതൽ കാണിച്ചു എന്നാണ് പഠനം പറയുന്നത്. വയലൻസിനെ ശിക്ഷിക്കുന്ന സിനിമകളിൽ പോലും വയലൻസ് ഉണ്ടായി എന്നാണ് പറയുന്നത്. ഇതാണ് വയലൻസിന്റെ പ്രത്യേകത എന്നും അദ്ദേഹം പറഞ്ഞു..
Discussion about this post