ആലപ്പുഴ : പാടത്ത് ക്രിക്കറ്റ് കളിക്കുന്നതിനിടെ ഇടിമിന്നലേറ്റ് യുവാവ് മരിച്ചു . ഇടിമിന്നലേറ്റതിന് പിന്നാലെ അഖിലിന്റെ കൈവശമുണ്ടായിരുന്ന സ്മാര്‍ട്‌ഫോണ്‍ പൊട്ടിത്തെറിച്ചതാണ് മരണത്തിന് കാരണമായത്. എടത്വാ സ്വദേശി അഖില്‍ പി ശ്രീനിവാസനാണ് മരിച്ചത്.
വൈകുന്നേരം മൂന്നര മണിയോടെയാണ് സംഭവം നടന്നത്. എടത്വാ പുത്തന്‍വരമ്പിനകം പാടത്ത് അഖിലും കൂട്ടുകാരും ക്രിക്കറ്റ് കളിക്കുകായിരുന്നു. കളിക്കിടെ കോള്‍ വന്നു. ഫോണ്‍ റിംഗ് ചെയ്യുന്നത് കേട്ട് അറ്റന്റ് ചെയ്ത് സംസാരിക്കുന്ന സമയത്ത് ശക്തമായ മിന്നലുണ്ടായി. ഈ സമയത്ത് ഫോണ്‍ പൊട്ടിത്തെറിക്കുകയായിരുന്നു. ഫോൺ പൊട്ടിത്തെറിച്ച് അഖിലിന്റെ ചെവിയുടെയും തലയുടെയും നെഞ്ചിന്റെ ഭാഗത്തും ഗുരുതരമായി പൊള്ളലേറ്റിരുന്നു.ആലപ്പുഴ മെഡിക്കല്‍ കോളേജ് ആശുപത്രിയിലേക്ക് കൊണ്ടുപോയെങ്കിലും ജീവന്‍ രക്ഷിക്കാനായില്ല.
അഖിലിനൊപ്പം കളിക്കുകയായിരുന്ന സുഹൃത്ത് ശരണിനും പരിക്കേറ്റു. എന്നാല്‍ ഇയാളുടെ പരിക്ക് സാരമുള്ളതല്ലെന്നാണ് ലഭ്യമാകുന്ന വിവരം. വെല്‍ഡിങ്ങ് ജോലിക്കാരാനായിരുന്ന അഖില്‍.
Discussion about this post