യുണൈറ്റഡ് എയർലൈൻസ് വിമാനത്തിൻറെ പൈലറ്റുമാരിൽ ഒരാൾ പാസ്പോർട്ട് മറന്നതിനെ തുടർന്ന് വിമാനം വൈകിയത് ആറുമണിക്കൂർ. ലോസ് ഏഞ്ചൽസിൽ നിന്ന് ചൈനയിലേക്ക് പോകുകയായിരുന്ന യുണൈറ്റഡ് എയർലൈൻസ് വിമാനത്തിലാണ് സംഭവം. പൈലറ്റുമാരിൽ ഒരാൾ പാസ്പോർട്ട് ഇല്ലാതെ വിമാനത്തിൽ കയറിയതായി കണ്ടെത്തിയതിനെ തുടർന്ന് പറന്നുയർന്ന വിമാനത്തിന് അപ്രതീക്ഷിതമായി യു-ടേൺ എടുക്കേണ്ടി വന്നു. ഇക്കാരണത്താൽ വിമാനം ഷെഡ്യൂൾ ചെയ്ത സമയത്തിൽ നിന്ന് ആറ് മണിക്കൂർ വൈകിയാണ് ഷാങ്ഹായിൽ ലാൻഡ് ചെയ്തത്.
257 യാത്രക്കാരെയും 13 ജീവനക്കാരെയും വഹിച്ചുകൊണ്ടാണ് വിമാനം യാത്ര ആരംഭിച്ചത്. പസഫിക് സമുദ്രത്തിന് മുകളിലൂടെ വടക്കുപടിഞ്ഞാറൻ ഭാഗത്തേക്ക് പറക്കുന്നതിനിടെയാണ് പാസ്പോർട്ട് ഇല്ലാത്ത വിവരം പൈലറ്റിന് ഓർമ്മവന്നത് . ഏകദേശം രണ്ട് മണിക്കൂറിന് ശേഷം സാൻ ഫ്രാൻസിസ്കോയിൽ വിമാനം തിരിച്ചിറങ്ങി. പിന്നീട് പുതിയ ജീവനക്കാരുമായി വിമാനം വീണ്ടും ചൈനയിലേക്ക് പറന്നുയർന്നു.
പൈലറ്റ് പാസ്പോർട്ട് മറന്നുപോയതിനെ തുടർന്ന് വിമാനം തിരിച്ചിറക്കിയതായി യുണൈറ്റഡ് എയർലൈൻസ് പിന്നീട് പ്രസ്താവന ഇറക്കി. “പൈലറ്റിന് അവരുടെ പാസ്പോർട്ട് വിമാനത്തിൽ ഉണ്ടായിരുന്നില്ല,” , യാത്രക്കാരെ അവരുടെ ലക്ഷ്യസ്ഥാനത്തെത്തിക്കാൻ പുതിയ ക്രൂവിനെ നിയോഗിച്ചു,ഭക്ഷണവും നഷ്ടപരിഹാരവും നൽകി യാത്രക്കാരുടെ പ്രശ്നങ്ങൾ പരിഹരിച്ചു, പ്രസ്താവനയിൽ വ്യക്തമാക്കി.
സംഭവം വിവിധ സമൂഹമാദ്ധ്യമ പ്ലാറ്റ്ഫോമുകളിൽ വലിയ ചർച്ചയായി. വിമർശനങ്ങളുമായി നിരവധിപേരാണ് അഭിപ്രായ പ്രകടനം നടത്തിയത്. വെറും ഭക്ഷണ വൗച്ചറുകൾ നൽകിയതിന് ചിലർ എയർലൈനിനെ വിമർശിച്ചും രംഗത്തെത്തി.
Discussion about this post