ഓസ്‌ട്രേലിയൻ ടി20 ഐ ക്യാപ്റ്റൻ മിച്ചൽ മാർഷ് ഇന്ത്യൻ യുവതാരം അഭിഷേക് ശർമ്മയെ പ്രശംസിച്ചുകൊണ്ട് രംഗത്ത്. ഒക്ടോബർ 29 ന് കാൻബറയിൽ വെച്ചാണ് ഇരു ടീമുകളും അഞ്ച് മത്സരങ്ങളുള്ള ടി20 പരമ്പര ആരംഭിക്കുന്നത്. വാർത്താസമ്മേളനത്തിൽ സംസാരിച്ച മാർഷ് അഭിഷേകിന്റെ ഭീഷണിയെക്കുറിച്ച് വാചാലനായി. യുവ ബാറ്റർ തന്റെ ടീമിന് ഒരു വെല്ലുവിളിയാകുമെന്നും പക്ഷേ തങ്ങൾ അതിനായി കാത്തിരിക്കുകയാണെന്നും പറഞ്ഞു.
“അഭിഷേക് കഴിവുള്ളവനാണ്, ഇന്ത്യയ്ക്കും സൺറൈസേഴ്‌സ് ഹൈദരാബാദിനും വേണ്ടി മികച്ച പ്രകടനം കാഴ്ചവച്ചിട്ടുണ്ട്. അദ്ദേഹം ഞങ്ങൾക്ക് ഒരു വെല്ലുവിളിയായിരിക്കും. പക്ഷേ ലോകത്തിലെ ഏറ്റവും മികച്ച കളിക്കാർക്കെതിരെ ഞങ്ങൾ സ്വയം പരീക്ഷിക്കാൻ ആഗ്രഹിക്കുന്നു. അദ്ദേഹത്തിനെതിരെ പന്തെറിയാൻ ഞങ്ങൾ കാത്തിരിക്കുന്നു” മാർഷ് പറഞ്ഞു.
23 ടി20 ഇന്നിംഗ്‌സുകളിൽ നിന്ന് 36.91 ശരാശരിയിൽ 849 റൺസ് നേടിയിട്ടുള്ള അദ്ദേഹം രണ്ട് സെഞ്ച്വറികളും അഞ്ച് അർദ്ധസെഞ്ച്വറികളും നേടിയിട്ടുണ്ട്. 926 റേറ്റിംഗ് പോയിന്റുകളുമായി ഏറ്റവും ചെറിയ ഫോർമാറ്റിൽ ഒന്നാം സ്ഥാനത്തുള്ള ബാറ്റ്‌സ്മാനാണ് അദ്ദേഹം.
ഇന്ത്യയ്‌ക്കെതിരായ പരമ്പരയിൽ ജോഷ് ഇംഗ്ലിസിന്റെ ലഭ്യതയും മാർഷ് സ്ഥിരീകരിച്ചു. കാലിലെ പരിക്ക് കാരണം ന്യൂസിലൻഡിനെതിരായ ടി20 പരമ്പര അദ്ദേഹത്തിന് നഷ്ടമായി.
“ഇംഗ്ലിസ് കളിക്കും, അദ്ദേഹത്തെ തിരികെ കൊണ്ടുവന്നത് നല്ലതാണ്. അദ്ദേഹം ഞങ്ങൾക്ക് ഒരു പ്രധാന കളിക്കാരനാണ്, നാലാമനായി ബാറ്റ് ചെയ്യും.” ഓസ്‌ട്രേലിയയ്‌ക്കെതിരായ അവസാന മൂന്ന് ടി20 പരമ്പരകളും ഇന്ത്യ വിജയിച്ചിട്ടുണ്ട്.
Discussion about this post