ന്യൂഡൽഹി : ഇന്ത്യയും ഇസ്രായേലും തമ്മിലുള്ള ഉന്നതതല യോഗം ന്യൂഡൽഹിയിൽ വെച്ച് നടന്നു. വിദേശകാര്യ മന്ത്രി ഡോ. എസ്. ജയശങ്കറും ഇസ്രായേൽ വിദേശകാര്യ മന്ത്രി ഗിഡിയോൺ സറുമായി നടത്തിയ സുപ്രധാന കൂടിക്കാഴ്ചയിൽ ഇരു രാജ്യങ്ങളും തമ്മിലുള്ള സഹകരണം വർദ്ധിപ്പിക്കുന്നത് സംബന്ധിച്ച നിരവധി വിഷയങ്ങളിൽ ചർച്ചകൾ നടന്നു. ഗാസ സമാധാന പദ്ധതിക്ക് ഇന്ത്യ പിന്തുണ അറിയിച്ചു. ഇന്ത്യ-മിഡിൽ ഈസ്റ്റ്-യൂറോപ്പ് സാമ്പത്തിക ഇടനാഴി സംബന്ധിച്ചും ചർച്ച നടന്നു.
“ഒക്ടോബർ 7 ന് ഹമാസ് ആക്രമണത്തിന് ശേഷം, പ്രധാനമന്ത്രി നെതന്യാഹുവിനെ വിളിച്ച ആദ്യത്തെ ലോകനേതാവ് പ്രധാനമന്ത്രി മോദിയാണെന്ന് ഞങ്ങൾ ഓർക്കുന്നു. ഇത് ഞങ്ങൾ ഒരിക്കലും മറക്കില്ല. തീവ്രവാദമാണ് ഇന്ത്യയ്ക്കും ഇസ്രായേലിനും ഏറ്റവും വലിയ ഭീഷണി. ഹമാസ്, ഹിസ്ബുള്ള, ഹൂത്തികൾ തുടങ്ങിയ തീവ്ര തീവ്രവാദ സംഘടനകൾ ഇസ്രായേലിന്റെ സ്ഥിരതയ്ക്കും സുരക്ഷയ്ക്കും ഗുരുതരമായ വെല്ലുവിളി ഉയർത്തുന്നവയാണ്. അതിനാൽ തന്നെ അവരെ ഇല്ലാതാക്കേണ്ടത് അത്യാവശ്യമാണ്. ഹമാസിനെ നിരായുധീകരിക്കുന്നതും ഗാസയെ സൈനികമായി മോചിപ്പിക്കുന്നതും ഇസ്രായേൽ ഇപ്പോൾ ലക്ഷ്യമിടുന്നു. ഇന്ത്യയുമായുള്ള എല്ലാ മേഖലകളിലെയും സഹകരണം വർദ്ധിപ്പിക്കും. I2U2 (ഇന്ത്യ-ഇസ്രായേൽ-യുഎഇ-യുഎസ്), IMEC (ഇന്ത്യ-മിഡിൽ ഈസ്റ്റ്-യൂറോപ്പ് സാമ്പത്തിക ഇടനാഴി) തുടങ്ങിയ പദ്ധതികൾ നമ്മുടെ മേഖലയുടെ ഭാവിക്ക് കൂടുതൽ പ്രകാശമേകും,” എന്ന് ഇസ്രായേൽ വിദേശകാര്യ മന്ത്രി ഗിഡിയോൺസർ വ്യക്തമാക്കി. പഹൽഗാമിലെ ദാരുണമായ ഭീകരാക്രമണത്തെ അദ്ദേഹം ശക്തമായി അപലപിച്ചു.
ഇരു രാജ്യങ്ങളും തമ്മിലുള്ള തന്ത്രപരമായ പങ്കാളിത്തം വിശ്വാസത്തിലും സഹകരണത്തിലും അധിഷ്ഠിതമാണെന്ന് വിദേശകാര്യ മന്ത്രി ജയശങ്കർ പറഞ്ഞു. ഗാസ സമാധാന പദ്ധതി, ഭീകരതയോടുള്ള സീറോ ടോളറൻസ് നയം, നിക്ഷേപ സഹകരണം എന്നീ വിഷയങ്ങളും ചർച്ചകളിൽ ഉൾപ്പെട്ടു. ഇരു രാജ്യങ്ങളും തമ്മിലുള്ള അടുത്തിടെയുണ്ടായ ഉഭയകക്ഷി നിക്ഷേപ കരാർ ഒരു സുപ്രധാന ചുവടുവയ്പ്പാണെന്ന് വിദേശകാര്യ മന്ത്രി ജയ്ശങ്കർ പറഞ്ഞു. “ഇന്ത്യയും ഇസ്രായേലും തമ്മിലുള്ള തന്ത്രപരമായ പങ്കാളിത്തത്തിന്റെ യഥാർത്ഥ അർത്ഥം വിശ്വാസം, സഹകരണം, പങ്കിട്ട മൂല്യങ്ങൾ എന്നിവയെ അടിസ്ഥാനമാക്കിയുള്ള ബന്ധമാണ്. ദുഷ്കരമായ സമയങ്ങളിൽ ഞങ്ങൾ പരസ്പരം പിന്തുണച്ചിട്ടുണ്ട്. തീവ്രവാദത്തിന്റെ പൊതുവായ വെല്ലുവിളി ഇരു രാജ്യങ്ങളും നേരിടുന്നു, അതിനാൽ ലോകം തീവ്രവാദത്തോട് ഒരു വിട്ടുവീഴ്ചയില്ലാത്ത സമീപനം സ്വീകരിക്കേണ്ടത് അത്യാവശ്യമാണ്. ഇരു രാജ്യങ്ങളും തമ്മിലുള്ള സൗഹൃദത്തിന്റെ ഭാഗമായി കൃഷി, സമ്പദ്വ്യവസ്ഥ, ടൂറിസം, ധനകാര്യം എന്നിവയുമായി ബന്ധപ്പെട്ട ഇസ്രായേൽ മന്ത്രിമാർ ഇതിനകം ഇന്ത്യ സന്ദർശിച്ചിട്ടുണ്ട്”, എന്നും വിദേശകാര്യ മന്ത്രി എസ് ജയശങ്കർ വ്യക്തമാക്കി.
