സ്റ്റാർ ഓപ്പണർ സ്മൃതി മന്ദാന തന്റെ ഏറ്റവും വലിയ ഭയത്തെക്കുറിച്ച് വെളിപ്പെടുത്തൽ നടത്തി രംഗത്ത്. ഒറ്റയ്ക്ക് ഉറങ്ങാൻ തനിക്ക് ഭയമാണെന്നും അതാണ് ഏറ്റവും കൂടുതൽ പേടിപ്പിക്കുന്ന കാര്യമെന്ന് അവർ വെളിപ്പെടുത്തി. 2025 ലോകകപ്പ് നേടിയ ഇന്ത്യൻ ടീമിന്റെ ഭാഗമായിരുന്നു സ്മൃതി. സ്വസ്ഥമായി ഉറങ്ങാൻ തനിക്ക് റൂമിൽ ആരെങ്കിലും വേണമെന്നും അവർ വെളിപ്പെടുത്തി. ഇന്ത്യൻ ടീമിലെ സഹതാരവും അടുത്ത സുഹൃത്തുമായ ജെമീമ റോഡ്രിഗസ് ആയിരുന്നു തനിക്ക് കൂട്ട കിടന്നിരുന്നത് എന്ന് അവർ പറഞ്ഞു.
“എനിക്ക് ഒറ്റയ്ക്ക് ഉറങ്ങാൻ പേടിയാണ്. എനിക്ക് മുറിയിൽ ഒരാളുടെ കൂട്ട് വേണം. ടൂറിൽ പോലും ഞാൻ ഒരാളെ ഒപ്പം കൂട്ടരുണ്ട്. എനിക്ക് നല്ല സുഹൃത്തുക്കളുണ്ട്. ജെമ്മിയും പേടിയുള്ള ആളാണ്. പക്ഷേ അതെ, എനിക്ക് നല്ല ഉറക്കം ആവശ്യമാണ്.” അവർ പറഞ്ഞു.
മോശം ദിവസങ്ങളിൽ താൻ എന്ത് ചെയ്തെന്നും ശക്തമായ തിരിച്ചുവരവ് നടത്താനുള്ള തന്റെ മാനസികാവസ്ഥയെക്കുറിച്ചും സ്മൃതി വെളിപ്പെടുത്തി. നെഗറ്റീവ് ആകുന്നത് ഇഷ്ടമില്ല എന്നും പോസിറ്റീവായി ഇരിക്കാനാണ് ഇഷ്ടമെന്നും അവർ പറഞ്ഞു. 2024 ടി20 ലോകകപ്പിൽ നിന്ന് ഇന്ത്യ ഗ്രൂപ്പ് ഘട്ടത്തിൽ പുറത്തായപ്പോൾ തോന്നിയ വികാരം എന്തായിരുന്നു എന്നും അവർ പറഞ്ഞു.
“മോശം ദിവസങ്ങൾ വരുമ്പോൾ എനിക്ക് ഒരുപാട് എഴുതാൻ ഇഷ്ടമാണ്. എങ്ങനെ മെച്ചപ്പെടാമെന്ന് ചിന്തിക്കാൻ തുടങ്ങുന്ന നിമിഷം മുതൽ ഞാൻ തിരിച്ചുവരാൻ ശ്രമിക്കും. ഞാൻ എനിക്ക് മുന്നിൽ തന്നെ കഠിനമായ ലക്ഷ്യങ്ങൾ മുന്നോട്ട് വെക്കാൻ തുടങ്ങി. 2024 ലോകകപ്പിൽ ഗ്രുപ്പ് ഘട്ടത്തിനപ്പുറം പോകാൻ സാധിക്കാതെ പോയത് സങ്കടം ഉണ്ടാക്കി”
2025 ലെ ലോകകപ്പിൽ ഇന്ത്യയുടെ ഏറ്റവും കൂടുതൽ റൺസ് നേടിയ താരമായിരുന്ന സ്മൃതി ഒമ്പത് മത്സരങ്ങളിൽ നിന്ന് ഒരു സെഞ്ച്വറിയും ഒരു അർദ്ധ സെഞ്ച്വറിയും ഉൾപ്പെടെ 434 റൺസ് നേടി.
