ക്രിക്കറ്റ് വൃത്തങ്ങളിൽ ഭൂരിഭാഗവും പറയുന്ന ഒരു വസ്തുതയാണ് മുൻ നായകൻ എം.എസ്. ധോണിക്ക്, കഴിവുള്ളവരെ കണ്ടെത്തി അവരെ മാച്ച് വിന്നർമാരാക്കുന്നതിൽ കഴിവുണ്ട് എന്നത്. കുൽദീപ് യാദവ്, യുസ്വേന്ദ്ര ചാഹൽ തുടങ്ങി നിരവധി താരങ്ങൾ ഇതിന് ഉദാഹരണമാണ്. ഒരിക്കൽ മഹേന്ദ്ര സിങ് ധോണി ഇത്തരത്തിൽ ഒരു പ്രവചനം നടത്തിയ ആളാണ് ഓൾ റൗണ്ടർ അക്സർ പട്ടേൽ. അക്സർ സൂപ്പർ താരമാകുന്നതിന് മുമ്പ് തന്നെ ധോണി താരത്തെ “നെക്സ്റ്റ് ജഡേജ ” എന്ന വിശേഷണം നൽകിയതാണ്.
2014 ജൂണിൽ മിർപൂരിൽ ബംഗ്ലാദേശിനെതിരായ ഏകദിന മത്സരത്തിലൂടെയാണ് അക്സർ അന്താരാഷ്ട്ര ക്രിക്കറ്റിൽ അരങ്ങേറ്റം കുറിച്ചത്. കഴിഞ്ഞ കുറച്ച് വർഷങ്ങളായി, ബാറ്റിംഗ്, ബൗളിംഗ് ഫീൽഡിങ് എന്നിവയിലെ മികവോടെ ക്രിക്കറ്റ് താരം തന്റേതായ സ്ഥാനം നേടിയിട്ടുണ്ട്. എന്നിരുന്നാലും, 2015 ൽ ഇന്ന് കാണുന്ന അക്സർ ആകുന്നതിന് മുമ്പുതന്നെ, അക്സറിന് ശോഭനമായ ഭാവി ധോണി പ്രവചിച്ചിരുന്നു. ഓസ്ട്രേലിയയിൽ നടന്ന ഒരു ഏകദിന മത്സരത്തിന് ശേഷം സംസാരിച്ച അന്നത്തെ ഇന്ത്യൻ ക്യാപ്റ്റൻ ഇങ്ങനെ അഭിപ്രായപ്പെട്ടു:
“അക്സറിന് ബാറ്റ് ചെയ്യാനും കഴിയുമെന്ന് നമുക്കെല്ലാവർക്കും അറിയാം. നാളെ അദ്ദേഹത്തിന് [രവീന്ദ്ര] ജഡേജയെപ്പോലെ മികച്ചവനാകാൻ കഴിയും. എതിർ ടീമിനെ ആശ്രയിച്ച് ആവശ്യമെങ്കിൽ രണ്ട് ഇടംകൈയ്യൻ സ്പിന്നർമാരെ കളിപ്പിക്കാനുള്ള ഓപ്ഷനും എനിക്ക് കിട്ടുന്നു. അതൊരു ഗുണം തന്നെയാണ്.”
“അക്സറിന് ഞങ്ങളുടെ ഡെത്ത് ബൗളറാകാൻ കഴിയുമോ എന്ന് നമ്മൾ കണ്ടറിയണം. പക്ഷേ, നമുക്ക് അദ്ദേഹത്തെ പരിശീലിപ്പിക്കാൻ കഴിയുമെങ്കിൽ, എന്തുകൊണ്ട് പാടില്ല?” മുൻ കീപ്പർ ബാറ്റർ കൂട്ടിച്ചേർത്തു.
ഇതുവരെ 15 ടെസ്റ്റുകളിലും 71 ഏകദിനങ്ങളിലും 83 ടി20 മത്സരങ്ങളിലും അക്സർ കളിച്ചിട്ടുണ്ട്. ടെസ്റ്റ് മത്സരങ്ങളിൽ 19.66 ശരാശരിയിൽ 57 വിക്കറ്റുകൾ അദ്ദേഹം നേടിയിട്ടുണ്ട്, അഞ്ച് അഞ്ച് വിക്കറ്റ് പ്രകടനം ഉൾപ്പെടെ. ബാറ്റിംഗിൽ, നാല് അർദ്ധസെഞ്ച്വറികളുൾപ്പെടെ 688 റൺസ് അദ്ദേഹം നേടിയിട്ടുണ്ട്. ഏകദിനങ്ങളിൽ, 75 വിക്കറ്റുകളും 858 റൺസും അദ്ദേഹം നേടി. ടി20യിലെ നമ്പറുകൾ നോക്കുമ്പോൾ, അദ്ദേഹം 7.25 എന്ന ഇക്കണോമി റേറ്റിൽ 79 വിക്കറ്റുകളും 137.87 എന്ന സ്ട്രൈക്ക് റേറ്റിൽ 637 റൺസും നേടിയിട്ടുണ്ട്.
