ഡെന്മാർക്കിന്റെ സ്വയംഭരണ പ്രദേശമായ ഗ്രീൻലാൻഡ് പിടിച്ചെടുക്കുന്നതിനായി അധിനിവേശ പദ്ധതി തയ്യാറാക്കാൻ യുഎസ് പ്രസിഡന്റ് ഡൊണാൾഡ് ട്രംപ് പ്രത്യേക സൈനിക കമാൻഡർമാർക്ക് ഉത്തരവ് നൽകി. ‘ഡെയ്ലി മെയിൽ’ പുറത്തുവിട്ട ഈ വാർത്ത രാജ്യാന്തര തലത്തിൽ വലിയ ചർച്ചയായിരിക്കുകയാണ്.
ജോയിന്റ് സ്പെഷ്യൽ ഓപ്പറേഷൻസ് കമാൻഡിനോടാണ് ഗ്രീൻലാൻഡ് അധിനിവേശത്തിനുള്ള പദ്ധതി തയ്യാറാക്കാൻ ട്രംപ് ആവശ്യപ്പെട്ടത്. ട്രംപിന്റെ ഈ നീക്കത്തെ മുതിർന്ന സൈനിക ഉദ്യോഗസ്ഥരും ജോയിന്റ് ചീഫ് ഓഫ് സ്റ്റാഫും ശക്തമായി എതിർക്കുന്നു എന്നാണ് വിവരം. ഇത്തരം ഒരു നീക്കം നിയമവിരുദ്ധമാണെന്നും യുഎസ് കോൺഗ്രസിന്റെ പിന്തുണ ഇതിനുണ്ടാകില്ലെന്നുമാണ് സൈനിക മേധാവികളുടെ നിലപാട്.
ഗ്രീൻലാൻഡ് വാങ്ങാൻ ട്രംപ് നേരത്തെ താല്പര്യം പ്രകടിപ്പിച്ചിരുന്നുവെങ്കിലും ഡെന്മാർക്ക് ആ ആവശ്യം തള്ളിക്കളഞ്ഞിരുന്നു. ഇതിന് പിന്നാലെയാണ് ബലപ്രയോഗത്തിലൂടെ ദ്വീപ് സ്വന്തമാക്കാനുള്ള നീക്കത്തിലേക്ക് ട്രംപ് കടക്കുന്നതെന്നാണ് സൂചന. ഗ്രീൻലാൻഡ് അധിനിവേശം എന്ന വിവാദ തീരുമാനത്തിൽ നിന്ന് ട്രംപിനെ പിന്തിരിപ്പിക്കാൻ സൈനിക മേധാവികൾ ശ്രമിക്കുന്നുണ്ട്. റഷ്യയുടെ ഉപരോധങ്ങൾ മറികടക്കാൻ ഉപയോഗിക്കുന്ന ‘ഗോസ്റ്റ് ഷിപ്പുകൾ’ തകർക്കുന്നതിലോ അല്ലെങ്കിൽ ഇറാനെതിരെ സൈനിക നീക്കം നടത്തുന്നതിലോ ശ്രദ്ധ കേന്ദ്രീകരിക്കാനാണ് അവർ ഉപദേശിക്കുന്നത്. എന്നാൽ ട്രംപ് ഗ്രീൻലാൻഡ് എന്ന ലക്ഷ്യത്തിൽ ഉറച്ചുനിൽക്കുകയാണ്.
റഷ്യയോ ചൈനയോ ഗ്രീൻലാൻഡിൽ പിടിമുറുക്കുന്നതിന് മുൻപ് അത് യുഎസിന്റെ ഭാഗമാക്കുക എന്നതാണ് ട്രംപിന്റെ ലക്ഷ്യം. : യുഎസ് സമ്പദ്വ്യവസ്ഥയുടെ മോശം പ്രകടനം മറച്ചുവെക്കാനും വരാനിരിക്കുന്ന ഇടക്കാല തിരഞ്ഞെടുപ്പിൽ (Mid-term elections) വോട്ടർമാരുടെ ശ്രദ്ധ തിരിക്കാനുമുള്ള ഒരു തന്ത്രമായാണ് ബ്രിട്ടീഷ് നയതന്ത്രജ്ഞർ ഇതിനെ കാണുന്നത്. തിരഞ്ഞെടുപ്പിൽ ഡെമോക്രാറ്റുകൾ കോൺഗ്രസ് പിടിച്ചെടുക്കുമെന്ന ഭയം ട്രംപിനുണ്ടെന്നും റിപ്പോർട്ടുകൾ പറയുന്നു.
Discussion about this post