ചരിത്ര കരാറിൽ ഒപ്പിട്ട് മോദിയും നഹ്യാനും!
ന്യൂഡൽഹി: ഭാരതത്തിന്റെ ഊർജ്ജ ഭദ്രത ഉറപ്പാക്കുന്നതിൽ നിർണ്ണായക ചുവടുവെപ്പുമായി മോദി സർക്കാർ. യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ സന്ദർശനത്തിനിടെ ഒപ്പിട്ട ചരിത്രപരമായ എൽഎൻജി (LNG) കരാറോടെ, ഖത്തർ കഴിഞ്ഞാൽ ഭാരതത്തിന് ഏറ്റവും കൂടുതൽ പ്രകൃതിവാതകം നൽകുന്ന രണ്ടാമത്തെ വലിയ രാജ്യമായി യുഎഇ മാറി. പ്രതിവർഷം 0.5 ദശലക്ഷം മെട്രിക് ടൺ എൽഎൻജി ഭാരതത്തിന് നൽകാനാണ് ദീർഘകാല കരാറിലൂടെ ധാരണയായത്.
പ്രധാനമന്ത്രി നരേന്ദ്ര മോദി നേരിട്ട് വിമാനത്താവളത്തിലെത്തി യുഎഇ പ്രസിഡന്റിനെ സ്വീകരിച്ചത് ഇരുരാജ്യങ്ങളും തമ്മിലുള്ള ആത്മബന്ധത്തിന്റെ തെളിവായി ലോകം വിലയിരുത്തുന്നു.
ഊർജ്ജ മേഖലയിൽ പുതിയ ഉദയം
യുഎഇ പ്രസിഡന്റിന്റെ സന്ദർശനത്തിന് പിന്നാലെ വിദേശകാര്യ സെക്രട്ടറി വിക്രം മിസ്രി നടത്തിയ വാർത്താസമ്മേളനത്തിലാണ് കരാറിന്റെ വിശദാംശങ്ങൾ പുറത്തുവിട്ടത്. ആഗോള വിപണിയിലെ അനിശ്ചിതത്വങ്ങൾക്കിടയിലും ഭാരതത്തിന്റെ വ്യവസായങ്ങൾക്കും വീടുകൾക്കും ആവശ്യമായ ഇന്ധനം തടസ്സമില്ലാതെ ലഭ്യമാക്കാൻ ഈ കരാർ സഹായിക്കും. 2032-ഓടെ ഇരുരാജ്യങ്ങളും തമ്മിലുള്ള വ്യാപാരം 200 ബില്യൺ ഡോളറിൽ എത്തിക്കാനാണ് ലക്ഷ്യമിടുന്നത്. 2023-24 സാമ്പത്തിക വർഷത്തിൽ ഇത് 84 ബില്യൺ ഡോളറായിരുന്നു.
ഊർജ്ജത്തിന് പുറമെ കൃഷി, ഭക്ഷ്യ സുരക്ഷാ മേഖലകളിലും നിർണ്ണായകമായ ധാരണാപത്രങ്ങൾ ഒപ്പിട്ടു. ഇന്ത്യൻ കർഷകർ ഉൽപ്പാദിപ്പിക്കുന്ന കാർഷിക ഉൽപ്പന്നങ്ങൾ ഗുണനിലവാരത്തോടെ യുഎഇ വിപണിയിൽ എത്തിക്കാൻ പുതിയ കരാർ വഴിയൊരുക്കും. ഇത് ഭാരതത്തിലെ കർഷകരുടെ വരുമാനം വർദ്ധിപ്പിക്കുന്നതിനൊപ്പം യുഎഇയുടെ ഭക്ഷ്യ സുരക്ഷ ഉറപ്പാക്കുകയും ചെയ്യും.ആണവ സഹകരണം: ഭാരതം പുതുതായി നടപ്പിലാക്കിയ ശാന്തി (SHANTI) നിയമത്തിന്റെ പശ്ചാത്തലത്തിൽ, ആണവോർജ്ജം സമാധാനപരമായ ആവശ്യങ്ങൾക്കായി ഉപയോഗിക്കുന്നതിലും ഇരുരാജ്യങ്ങളും കൈകോർക്കും.
പ്രതിരോധ മേഖലയിൽ ഒരു സ്ട്രാറ്റജിക് ഡിഫൻസ് പാക്ട് (Strategic Defence Pact) ഒപ്പിടാനും ഇരുരാജ്യങ്ങളും ധാരണയിലെത്തി. ഭീകരവാദത്തിനെതിരെയുള്ള പോരാട്ടത്തിൽ ഭാരതത്തിന് യുഎഇ നൽകുന്ന പിന്തുണ വരും വർഷങ്ങളിൽ കൂടുതൽ ശക്തമാകും. ഇസ്ലാമിക രാജ്യങ്ങളുമായി ഭാരതം പുലർത്തുന്ന ഈ ശക്തമായ ബന്ധം പാകിസ്ഥാൻ പോലുള്ള രാജ്യങ്ങൾ ഉയർത്തുന്ന വ്യാജ പ്രചാരണങ്ങൾക്കുള്ള കനത്ത തിരിച്ചടിയാണ്.
