ന്യൂഡൽഹി : ചെങ്കോട്ടയ്ക്കും ഡൽഹി സെക്രട്ടേറിയറ്റിനും ബോംബ് ഭീഷണി. ഡൽഹി പോലീസിനാണ് സെക്രട്ടേറിയറ്റിലും ചെങ്കോട്ടയിലും ബോംബ് ആക്രമണമുണ്ടാകുമെന്ന് ഭീഷണി ഇമെയിൽ സന്ദേശം ലഭിച്ചത്. ഭീഷണി സന്ദേശത്തിന് പിന്നിൽ ഖാലിസ്ഥാൻ ഗ്രൂപ്പുകൾ ആണെന്നാണ് കണ്ടെത്തിയിരിക്കുന്നത്. സംഭവത്തിൽ അധികൃതർ അന്വേഷണം ആരംഭിച്ചിട്ടുണ്ട്. ചെങ്കോട്ടയിലും ഡൽഹി സെക്രട്ടറിയേറ്റിലും സമഗ്രമായ തിരച്ചിൽ തുടരുകയാണ്.
ചെങ്കോട്ട പ്രദേശത്തിന് സമീപം ഭീകരാക്രമണ സാധ്യതയുണ്ടെന്ന ഇന്റലിജൻസ് റിപ്പോർട്ടുകളെ തുടർന്ന് ഡൽഹിയിൽ അധികൃതർ നഗരത്തിൽ അതീവ ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്. പാകിസ്താൻ ആസ്ഥാനമായുള്ള ഭീകര സംഘടനയായ ലഷ്കർ-ഇ-തൊയ്ബ ഡൽഹിയിൽ ഐഇഡി ആക്രമണം നടത്താൻ പദ്ധതിയിടുന്നതായി ഇന്റലിജൻസ് വൃത്തങ്ങൾ സൂചന നൽകിയിട്ടുള്ള സാഹചര്യത്തിൽ കർശന ജാഗ്രതയിലാണ് ദേശീയ തലസ്ഥാനം. ഡൽഹിയിലുടനീളമുള്ള പ്രധാന മതകേന്ദ്രങ്ങളിലും മറ്റ് സെൻസിറ്റീവ് സ്ഥലങ്ങളിലും സുരക്ഷ ശക്തമാക്കിയിട്ടുണ്ട്.
