വെസ്റ്റ് ഇൻഡീസിനെതിരായ ഐതിഹാസിക വിജയത്തിന് പിന്നാലെ സഞ്ജു സാംസണെ വാനോളം പുകഴ്ത്തി ഇന്ത്യൻ ക്യാപ്റ്റൻ സൂര്യകുമാർ യാദവ്. മൈതാനത്ത് വെച്ച് സഞ്ജുവിനെ വണങ്ങിയ സൂര്യകുമാറിന്റെ ദൃശ്യങ്ങൾ സോഷ്യൽ മീഡിയയിൽ തരംഗമായി മാറിക്കഴിഞ്ഞു.
മത്സരശേഷം ഇൻസ്റ്റാഗ്രാമിലൂടെയാണ് സൂര്യകുമാർ സഞ്ജുവിനോടുള്ള സ്നേഹം പങ്കുവെച്ചത്. സഞ്ജുവിനെ ‘ചേട്ടാ’ എന്ന് അഭിസംബോധന ചെയ്ത സൂര്യകുമാർ, “നല്ല ആളുകൾക്ക് നല്ല കാര്യങ്ങൾ മാത്രമേ സംഭവിക്കൂ” എന്ന് കുറിച്ചു. സഞ്ജുവിന്റെ കഠിനാധ്വാനത്തിനും ക്ഷമയ്ക്കും ഒടുവിൽ ലഭിച്ച അംഗീകാരമാണിതെന്ന് ആരാധകർ ഈ പോസ്റ്റിനെ വിലയിരുത്തുന്നു.
196 റൺസ് എന്ന കൂറ്റൻ ലക്ഷ്യം പിന്തുടർന്ന ഇന്ത്യയ്ക്ക് സഞ്ജുവിന്റെ പ്രകടനം നിർണ്ണായകമായിരുന്നു. ക്യാപ്റ്റൻ സൂര്യകുമാർ യാദവ് 18 റൺസിന് പുറത്തായെങ്കിലും സഞ്ജുവുമായി ചേർന്ന് അദ്ദേഹം കെട്ടിപ്പടുത്ത 50 റൺസിന്റെ കൂട്ടുകെട്ട് വിജയത്തിൽ വലിയ പങ്ക് വഹിച്ചു. സഞ്ജുവിനെപ്പോലൊരു സൂപ്പർ താരം വിമർശകർക്ക് നൽകിയ ഏറ്റവും മികച്ച മറുപടിയാണിതെന്ന് ആരാധകർ പ്രതികരിക്കുന്നു. വിജയത്തിന് പിന്നാലെ സഞ്ജു വികാരാധീനനായി. “എന്റെ കരിയറിൽ ഒരുപാട് ഉയർച്ച താഴ്ചകൾ ഉണ്ടായിട്ടുണ്ട്. പലപ്പോഴും ഞാൻ എന്നെത്തന്നെ സംശയിച്ചിരുന്നു. എനിക്ക് ഇതിന് സാധിക്കുമോ എന്ന് ആലോചിച്ചിട്ടുണ്ട്. പക്ഷേ ഞാൻ വിശ്വസിച്ചു, ഇന്ന് ദൈവം എന്നെ അനുഗ്രഹിച്ചു,” സഞ്ജു പറഞ്ഞു.
സൂപ്പർ 8 കടമ്പ കടന്ന ഇന്ത്യ ഇനി സെമി ഫൈനലിൽ കരുത്തരായ ഇംഗ്ലണ്ടിനെ നേരിടും. മാർച്ച് 5-ന് മുംബൈയിലെ വാംഖഡെ സ്റ്റേഡിയത്തിലാണ് ഈ പോരാട്ടം നടക്കുക. സ്വന്തം തട്ടകത്തിൽ സൂര്യകുമാർ യാദവ് ഫോമിലേക്ക് തിരിച്ചെത്തുമെന്ന പ്രതീക്ഷയിലാണ് ആരാധകർ.
