ടി20 ലോകകപ്പ് കിരീടം നിലനിർത്തുന്ന ആദ്യ ടീമെന്ന റെക്കോർഡ് ഇന്ത്യ സ്വന്തമാക്കിയ ആവേശനിമിഷങ്ങൾക്കിടയിൽ, മുൻ ഇന്ത്യൻ താരവും പ്രശസ്ത കമന്റേറ്ററുമായ രവി ശാസ്ത്രിക്ക് പറ്റിയ അബദ്ധം വലിയ പരിഹാസങ്ങൾക്ക് വഴിവെക്കുന്നു. ഇന്ത്യ വിജയം ഉറപ്പിച്ച അവസാന നിമിഷം കമന്ററി ബോക്സിലിരുന്ന് രവി ശാസ്ത്രി നടത്തിയ തെറ്റായ പ്രഖ്യാപനമാണ് ആരാധകരെ പ്രകോപിപ്പിച്ചത്.
മത്സരത്തിന്റെ 19-ാം ഓവർ എറിയാനെത്തിയ പാർട്ട് ടൈം ബൗളർ അഭിഷേക് ശർമ്മ അവസാന വിക്കറ്റ് വീഴ്ത്തിയപ്പോഴായിരുന്നു സംഭവം. ന്യൂസിലൻഡ് താരം ജേക്കബ് ഡഫിയുടെ ക്യാച്ച് തിലക് വർമ്മ എടുത്തതോടെ ഇന്ത്യ 96 റൺസിന്റെ വിജയം ആഘോഷിച്ചു. എന്നാൽ, കളി അവസാനിച്ചുവെന്ന് പറയുന്നതിന് പകരം ഇത് ഒൻപതാം വിക്കറ്റാണെന്നാണ് രവി ശാസ്ത്രി മൈക്കിലൂടെ അനൗൺസ് ചെയ്തത്. കിരീടനേട്ടത്തിന്റെ ആവേശം വാനോളമുയർന്ന നിമിഷത്തിൽ കമന്ററിയിൽ വന്ന ഈ ‘അബദ്ധം’ ആരാധകർക്ക് ഒട്ടും ദഹിച്ചില്ല. ഉടൻ തന്നെ ശാസ്ത്രി തെറ്റ് തിരുത്തിയെങ്കിലും തങ്ങൾക്ക് ആ ഫീൽ ആസ്വദിക്കാൻ പറ്റിയില്ല എന്നതാണ് പലരും പരാതി പറഞ്ഞത്.
ഇന്ത്യ ചരിത്രവിജയം നേടിയ നിമിഷം ആസ്വദിക്കാൻ കാത്തിരുന്ന ആരാധകർ, ശാസ്ത്രിയുടെ പിഴവ് ശ്രദ്ധയിൽപ്പെട്ടതോടെ സോഷ്യൽ മീഡിയയിൽ രൂക്ഷമായ പ്രതികരണങ്ങളുമായി രംഗത്തെത്തി. ലോകകപ്പ് ഫൈനൽ പോലൊരു വലിയ മത്സരത്തിൽ ഇത്രയും വലിയൊരു പിശക് കമന്റേറ്ററുടെ ഭാഗത്തുനിന്ന് ഉണ്ടാകാൻ പാടില്ലായിരുന്നുവെന്ന് പലരും എക്സിൽ (X) കുറിച്ചു.
മുമ്പ് 2011 ൽ ഇന്ത്യ ഏകദിന ലോകകപ്പ് ജയിച്ചപ്പോൾ അദ്ദേഹം പറഞ്ഞ “Dhoni finishes off in style. A magnificent strike into the crowd! India lift the World Cup after 28 യീര്സ്” കൂടാതെ ഏകദിന ക്രിക്കറ്റിലെ ആദ്യ ഇരട്ട സെഞ്ചുറി സച്ചിൻ നേടിയപ്പോൾ ആ ചരിത്ര നിമിഷത്തിന് സാക്ഷ്യം വഹിച്ചതും ശാസ്ത്രിയുടെ ശബ്ദമായിരുന്നു: “First man on the planet to reach 200 and it’s the Superman from India – Sachin Tendulkar!”ഒരു മത്സരം വിരസമായാൽ പോലും തന്റെ തനതായ ശൈലിയിലൂടെ (ഉദാഹരണത്തിന്: “Tracer Bullet”) ആരാധകരെ ആവേശം കൊള്ളിക്കാൻ അദ്ദേഹത്തിന് സാധിക്കും.
