ഇസ്രായേലുമായും അമേരിക്കയുമായും നേരിട്ടുള്ള യുദ്ധം കൊടുമ്പിരിക്കൊള്ളുന്ന പശ്ചാത്തലത്തിൽ ഇറാൻ ഭരണകൂടത്തിൽ നിർണ്ണായക അഴിച്ചുപണി. ഇറാന്റെ ഏറ്റവും ഉയർന്ന സുരക്ഷാ നയരൂപീകരണ സമിതിയായ സുപ്രീം നാഷണൽ സെക്യൂരിറ്റി കൗൺസിലിന്റെ (SNSC) പുതിയ സെക്രട്ടറിയായി മുഹമ്മദ് ബാഗർ സോൾഖാദറിനെ (Mohammad Bagher Zolghadr) നിയമിച്ചു. അന്തരിച്ച അലി ലാറിജാനിക്ക് പകരക്കാരനായാണ് സോൾഖാദർ ഈ സുപ്രധാന പദവിയിലെത്തുന്നത്. പശ്ചിമേഷ്യയിൽ യുദ്ധം രൂക്ഷമാകുന്ന ഈ ഘട്ടത്തിൽ, ഇറാന്റെ പ്രതിരോധ തന്ത്രങ്ങളിലും സൈനിക നീക്കങ്ങളിലും വലിയ മാറ്റങ്ങൾ ഉണ്ടാകുമെന്നതിന്റെ സൂചനയായാണ് ഈ നിയമനം വിലയിരുത്തപ്പെടുന്നത്.
ഇറാനിലെ പരമോന്നത നേതാവ് ആയത്തുള്ള അലി ഖമേനിയുടെ വിശ്വസ്തനും ഇസ്ലാമിക് റെവല്യൂഷണറി ഗാർഡ് കോർപ്സിന്റെ (IRGC) മുൻ ഡെപ്യൂട്ടി കമാൻഡറുമാണ് സോൾഖാദർ. നേരത്തെ ആഭ്യന്തര സഹമന്ത്രിയായും അദ്ദേഹം സേവനമനുഷ്ഠിച്ചിട്ടുണ്ട്. സൈനിക രംഗത്തും ആഭ്യന്തര സുരക്ഷാ രംഗത്തും ദശാബ്ദങ്ങളുടെ പരിചയസമ്പത്തുള്ള സോൾഖാദറിന്റെ കടന്നുവരവ് ഇറാൻ കൂടുതൽ ആക്രമണാത്മകമായ പ്രതിരോധ ശൈലി സ്വീകരിക്കുന്നതിന്റെ ഭാഗമായാണ് നിരീക്ഷകർ കാണുന്നത്. ഹോർമുസ് കടലിടുക്കിന്റെ സുരക്ഷയും ഇറാന്റെ ആഭ്യന്തര സുരക്ഷയും ഇനി ഇദ്ദേഹത്തിന്റെ കൈകളിലായിരിക്കും.
അയൽരാജ്യങ്ങളുമായുള്ള പ്രതിരോധ സഹകരണം ശക്തമാക്കാനും റഷ്യ, ചൈന തുടങ്ങിയ രാജ്യങ്ങളുമായി ചേർന്ന് പുതിയ യുദ്ധതന്ത്രങ്ങൾ ആവിഷ്കരിക്കാനും സോൾഖാദർ ശ്രമിക്കുമെന്നാണ് റിപ്പോർട്ടുകൾ. പശ്ചിമേഷ്യയിൽ സമാധാനം പുനഃസ്ഥാപിക്കാനായി ഭാരതം നടത്തുന്ന നയതന്ത്ര നീക്കങ്ങൾക്കിടയിൽ ഇറാന്റെ ഈ പുതിയ സുരക്ഷാ മാറ്റം ലോകരാജ്യങ്ങൾ അതീവ ജാഗ്രതയോടെയാണ് നിരീക്ഷിക്കുന്നത്.
