ഓസ്ട്രേലിയൻ ക്രിക്കറ്റ് ഇതിഹാസം ഡേവിഡ് വാർണർ സിഡ്നിയിൽ മദ്യപിച്ച് വാഹനമോടിച്ചതിന് പോലീസ് പിടിയിലായി. നിലവിൽ പാകിസ്ഥാൻ സൂപ്പർ ലീഗിൽ (PSL) കറാച്ചി കിംഗ്സിന്റെ ക്യാപ്റ്റനായി കളിക്കുന്ന വാർണർ, മത്സരങ്ങൾക്കിടയിലുള്ള ഇടവേളയിൽ കുടുംബത്തെ സന്ദർശിക്കാൻ നാട്ടിലെത്തിയപ്പോഴാണ് സംഭവമുണ്ടായത്.
ഞായറാഴ്ച വൈകുന്നേരം 5:30-ഓടെ സിഡ്നിയിലെ മരൂബ്രയിലാണ് സംഭവം നടന്നത്. പോലീസ് സംഘം വാഹനങ്ങൾ പരിശോധിക്കുന്നത് കണ്ട വാർണർ, പരിശോധനാ സ്ഥലത്തിന് തൊട്ടുമുമ്പായി വാൻ നിർത്തി പാർക്ക് ചെയ്ത് പോലീസിനെ വെട്ടിക്കാൻ ശ്രമിച്ചു. ഇത് ശ്രദ്ധയിൽപ്പെട്ട ഹൈവേ പട്രോൾ ഉദ്യോഗസ്ഥർ വാഹനം പരിശോധിച്ചപ്പോഴാണ് വാർണർ കുടുങ്ങിയത്.
റോഡരികിൽ നടത്തിയ പ്രാഥമിക പരിശോധനയിൽ തന്നെ വാർണർ മദ്യപിച്ചതായി കണ്ടെത്തി. തുടർന്ന് മരൂബ്ര പോലീസ് സ്റ്റേഷനിലെത്തിച്ച് നടത്തിയ രണ്ടാമത്തെ പരിശോധനയിൽ രക്തത്തിലെ മദ്യത്തിന്റെ അളവ് 0.104 ആണെന്ന് സ്ഥിരീകരിച്ചു. ഇത് ഓസ്ട്രേലിയയിലെ നിയമപരമായ പരിധിയുടെ (0.05) ഇരട്ടിയിലധികമാണ്. സംഭവത്തെത്തുടർന്ന് വാർണറുടെ ലൈസൻസ് റദ്ദാക്കുകയും മെയ് 7-ന് കോടതിയിൽ ഹാജരാകാൻ നോട്ടീസ് നൽകുകയും ചെയ്തു.
പിഎസ്എല്ലിൽ തകർപ്പൻ ഫോമിൽ നിൽക്കുന്ന കറാച്ചി കിംഗ്സിന് വാർണറുടെ ഈ നടപടി വലിയ തിരിച്ചടിയാണ്. നിലവിൽ പോയിന്റ് പട്ടികയിൽ ഒന്നാമതുള്ള കറാച്ചിക്ക് വേണ്ടി 93 റൺസ് വാർണർ ഇതിനോടകം നേടിയിട്ടുണ്ട്. ഏപ്രിൽ 9-ന് പെഷവാർ സൽമിക്കെതിരായ മത്സരത്തിന് മുന്നോടിയായി വാർണർ ടീമിൽ തിരിച്ചെത്തേണ്ടതായിരുന്നു. എന്നാൽ സിഡ്നിയിലെ നിയമനടപടികൾ വാർണറുടെ പിഎസ്എൽ സീസൺ അനിശ്ചിതത്വത്തിലാക്കിയിരിക്കുകയാണ്.
