മൈതാനത്തെ തകർപ്പൻ പ്രകടനങ്ങൾ കൊണ്ട് മാത്രമല്ല, തന്റെ വലിയ മനസ്സു കൊണ്ടും ആരാധകരുടെ പ്രിയങ്കരനായി മാറുകയാണ് മലയാളി ക്രിക്കറ്റ് താരം സഞ്ജു സാംസൺ. സെൽഫി എടുക്കാൻ എത്തിയ ആരാധകന്റെ ഫോണിന്റെ അവസ്ഥ കണ്ടപ്പോൾ പകരം പുതിയ ഫോൺ സമ്മാനിച്ച സഞ്ജുവിന്റെ പ്രവൃത്തിയാണ് ഇപ്പോൾ ചർച്ചയാകുന്നത്. പാലക്കാട് കടമ്പഴിപ്പുറം സ്വദേശി ടി. സബരീഷിനാണ് സഞ്ജുവിൽ നിന്ന് ഈ അപ്രതീക്ഷിത സമ്മാനം ലഭിച്ചത്.
ഇന്നലെ വൈകുന്നേരം 5:30-ഓടെ പാലക്കാട് പുഞ്ചപ്പാടം ബസ് സ്റ്റോപ്പിന് സമീപത്താണ് സംഭവം നടന്നത്. സബരീഷും സുഹൃത്തുക്കളും പതിവുപോലെ ക്രിക്കറ്റ് കളിക്കാൻ പോയതായിരുന്നു. ചെന്നൈ സൂപ്പർ കിംഗ്സിന്റെയും സഞ്ജു സാംസണിന്റെയും കടുത്ത ആരാധകനായ സബരീഷ് മഞ്ഞ ജേഴ്സി ധരിച്ച് കയ്യിൽ ബാറ്റുമായാണ് നിന്നിരുന്നത്. ആ സമയത്താണ് ഒരു കറുത്ത റേഞ്ച് റോവർ കാർ അവിടെ നിർത്തിയിരിക്കുന്നത് സബരീഷ് ശ്രദ്ധിച്ചത്. കാറിനടുത്ത് നിന്ന് ഫോണിൽ സംസാരിക്കുകയായിരുന്ന സഞ്ജുവിനെ കണ്ട് സബരീഷ് അത്ഭുതപ്പെട്ടു.
സഞ്ജുവിനടുത്തേക്ക് ചെന്ന് സബരീഷ് ഒരു സെൽഫി വേണമെന്ന് ആവശ്യപ്പെട്ടു. ഒട്ടും മടി കൂടാതെ സഞ്ജു സമ്മതിച്ചു. എന്നാൽ സെൽഫി എടുത്തപ്പോൾ സബരീഷിന്റെ ഫോണിന്റെ ഡിസ്പ്ലേ പൊട്ടിയതിനാൽ ചിത്രം തെളിഞ്ഞില്ല. ഇത് ശ്രദ്ധയിൽപ്പെട്ട സഞ്ജു ഉടൻ തന്നെ തന്റെ കാറിൽ ഉണ്ടായിരുന്ന ഒരു പുതിയ മൊബൈൽ ഫോൺ പുറത്തെടുത്തു. “നിന്റെ ഫോണിന്റെ ഡിസ്പ്ലേയ്ക്ക് കേടുപാടുണ്ട്, അതുകൊണ്ട് ഈ ഫോൺ നീ വെച്ചോ” – എന്ന് പറഞ്ഞ് സഞ്ജു ആ ഫോൺ സബരീഷിന് കൈമാറി.
ഫോൺ സമ്മാനിച്ചതിന് ശേഷം ക്രിക്കറ്റ് കളി നന്നായി തുടരണമെന്ന് സബരീഷിനോട് ഉപദേശിച്ച ശേഷമാണ് സഞ്ജു അവിടെ നിന്ന് മടങ്ങിയത്. ഐപിഎല്ലിൽ ടിവിയിൽ മാത്രം കണ്ടിട്ടുള്ള പ്രിയ താരം നേരിട്ട് വന്ന് സമ്മാനം നൽകിയതിന്റെ ആവേശത്തിലാണ് സബരീഷും സുഹൃത്തുക്കളും.
