ഐപിഎൽ 2026-ൽ മുംബൈ ഇന്ത്യൻസിനെതിരെ പഞ്ചാബ് കിംഗ്സിന് മിന്നും ജയം. ക്വിന്റൺ ഡി കോക്കിന്റെ സെഞ്ച്വറി മികവിൽ മുംബൈ പടുത്തുയർത്തിയ 195 റൺസ് വിജയലക്ഷ്യം 17 ഓവറിനുള്ളിൽ തന്നെ പഞ്ചാബ് അനായാസം മറികടന്നു. മത്സരത്തിൽ ഹാർദിക് പാണ്ഡ്യയെ പുറത്താക്കാൻ പഞ്ചാബ് താരം ശ്രേയസ് അയ്യർ എടുത്ത അത്ഭുത ക്യാച്ചാണ് ഇപ്പോൾ സോഷ്യൽ മീഡിയയിലെ പ്രധാന സംസാരവിഷയം.
മുംബൈ ബാറ്റിംഗിനിടെ മാർക്കോ ജാൻസൺ എറിഞ്ഞ 18-ാം ഓവറിലെ മൂന്നാം പന്തിലായിരുന്നു സംഭവം. ക്രീസിൽ നന്നേ ബുദ്ധിമുട്ടിയ ഹാർദിക് പാണ്ഡ്യ ഒരു കൂറ്റനടിക്ക് ശ്രമിച്ചു. പന്ത് ബൗണ്ടറി കടക്കുമെന്ന് ഉറപ്പിച്ച നിമിഷം ലോംഗ്-ഓണിൽ നിന്ന് ഓടിയെത്തിയ ശ്രേയസ് അയ്യർ വായുവിൽ പറന്നുയർന്ന് പന്ത് കയ്യിലൊതുക്കി. എന്നാൽ അതിർത്തി കടക്കുമെന്ന് ഉറപ്പായതോടെ പന്ത് വായുവിൽ വെച്ച് തന്നെ അരികിലുണ്ടായിരുന്ന സഹതാരമായ സേവ്യർ ബാർട്ട്ലെറ്റിന് എറിഞ്ഞുകൊടുക്കുകയായിരുന്നു.
സ്കോർബോർഡിൽ ഇത് ബാർട്ട്ലെറ്റിന്റെ ക്യാച്ചാണെങ്കിലും ഈ വിക്കറ്റിന്റെ മുഴുവൻ ക്രെഡിറ്റും അയ്യർക്കുള്ളതാണ്. ക്യാച്ചിന് ശേഷം മുംബൈ ഗാലറിയോട് കയ്യടിക്കാൻ അയ്യർ ആവശ്യപ്പെടുന്നതും കാണാമായിരുന്നു. ഈ സീസണിലെ ഏറ്റവും മികച്ച ക്യാച്ചായാണ് ആരാധകർ ഇതിനെ വിലയിരുത്തുന്നത്. അയ്യർ ക്യാച്ച് എടുത്തതിന് പിന്നാലെ മുംബൈ ഡഗ്ഔട്ടിൽ ഉണ്ടായിരുന്ന താരങ്ങൾ പ്രത്യേകിച്ച് സൂപ്പർതാരങ്ങളായ രോഹിതും, സൂര്യകുമാറും അടക്കമുള്ളവർ ഞെട്ടിത്തരിച്ച് ഇരിക്കുന്ന വീഡിയോ ഇപ്പോൾ വൈറലായിരിക്കുകയാണ്.
പരിക്കേറ്റ രോഹിത് ശർമ്മയ്ക്ക് പകരക്കാരനായി പ്ലേയിംഗ് ഇലവനിലെത്തിയ വെറ്ററൻ താരം ക്വിന്റൺ ഡി കോക്ക് തന്റെ അവസരം ഗംഭീരമാക്കി. 3 ഓവറിൽ 15/2 എന്ന നിലയിൽ തകർന്ന മുംബൈയെ ഡി കോക്കും നമൻ ധിറും (50) ചേർന്നാണ് കരകയറ്റിയത്. 60 പന്തിൽ 8 ഫോറുകളും 7 കൂറ്റൻ സിക്സറുകളുമടക്കം ഡി കോക്ക് പുറത്താകാതെ 112 റൺസെടുത്തു. 2022 ന് ശേഷമുള്ള താരത്തിന്റെ ആദ്യ ഐപിഎൽ സെഞ്ച്വറി കൂടിയാണിത്. ഇരുവരുടെയും ബാറ്റിംഗ് മികവിൽ മുംബൈ 20 ഓവറിൽ 195/6 എന്ന ഭേദപ്പെട്ട സ്കോറിലെത്തി.
മുംബൈ മുൻനിരയെ തുടക്കത്തിൽ തന്നെ തകർത്തത് പഞ്ചാബ് പേസർ അർഷ്ദീപ് സിംഗായിരുന്നു. കൃത്യതയോടെ പന്തെറിഞ്ഞ അദ്ദേഹം 22 റൺസ് മാത്രം വഴങ്ങി സുപ്രധാനമായ 3 വിക്കറ്റുകൾ വീഴ്ത്തി. 196 റൺസ് വിജയലക്ഷ്യവുമായി മറുപടി ബാറ്റിംഗിനിറങ്ങിയ പഞ്ചാബ് കിംഗ്സ്, 17 ഓവറിനുള്ളിൽ തന്നെ വിജയലക്ഷ്യം മറികടന്ന് മുംബൈയെ സ്വന്തം തട്ടകത്തിൽ വീണ്ടും പരാജയപ്പെടുത്തുകയായിരുന്നു.
SHREYAS IYER, WHAT HAVE YOU DONE!! 🤯
🎥 One of the best catches you would see in the #TATAIPL history 🔥🔥
Updates ▶️ https://t.co/Fn2dxJ4zYR#KhelBindaas | #MIvPBKS | @PunjabKingsIPL pic.twitter.com/6EKgHR82cL
— IndianPremierLeague (@IPL) April 16, 2026
