കളി കാര്യമായി, കാര്യം തമാശയായി; രാജസ്ഥാനെ വീഴ്ത്തി ഡൽഹിയുടെ ചരിത്രവിജയവും ജഡേജ-കുൽദീപ് 'പോരും'; വീഡിയോ കാണാം

ഐപിഎൽ 2026-ൽ രാജസ്ഥാൻ റോയൽസും (RR) ഡൽഹി ക്യാപിറ്റൽസും (DC) തമ്മിൽ നടന്ന മത്സരത്തിനിടെ രവീന്ദ്ര ജഡേജയും കുൽദീപ് യാദവും തമ്മിലുള്ള രസകരമായ നിമിഷങ്ങൾ സോഷ്യൽ മീഡിയയിൽ വൈറലാകുന്നു. കളിക്കളത്തിലെ വീറും വാശിയും മാറ്റിവെച്ച് ഇരുവരും തമ്മിൽ നടത്തിയ ഈ രസകരമായ പ്രകടനം ആരാധകർ ഏറ്റെടുത്തുകഴിഞ്ഞു.

രാജസ്ഥാൻ ഇന്നിംഗ്സിന്റെ 12-ാം ഓവറിൽ ധ്രുവ് ജുറേൽ പുറത്തായതിന് പിന്നാലെ ബാറ്റ് ചെയ്യാൻ എത്തിയതായിരുന്നു ജഡേജ. ഇതിനിടെ തന്റെ അടുത്തേക്ക് വരുന്ന കുൽദീപിനെ കണ്ട ജഡേജ, ഇന്ത്യൻ സഹതാരത്തെ പേടിപ്പിക്കാനായി ബാറ്റ് വീശുന്നതായി കാണിച്ചു. എന്നാൽ ഇതൊന്നും വകവെയ്ക്കാതിരുന്ന കുൽദീപ്, ജഡേജയുടെ തോളിൽ പിടിച്ച് തള്ളുകയും ഇരുവരും തമ്മിൽ തമാശകൾ പങ്കുവെക്കുകയും ചെയ്തു. അമ്പയറെക്കൊണ്ട് ബാറ്റ് പരിശോധിപ്പിക്കാൻ പോകുന്നതിനിടയിലും കുൽദീപ് ജഡേജയെ വീണ്ടും പിടിച്ച് തള്ളുന്നത് വീഡിയോയിൽ കാണാമായിരുന്നു.

Stories you may like

ഓസീസ് പടയെ ചുഴറ്റിയെറിഞ്ഞ ‘ഹിറ്റ്മാൻ’ കൊടുങ്കാറ്റിന് രണ്ട് വയസ്സ്; സ്റ്റാർക്കിനെയും കമ്മിൻസിനെയും അടിച്ചൊതുക്കിയ രോഹിതിന്റെ ആ മാസ്മരിക ഇന്നിങ്സ്

ദാദ അത്ര വലിയ വിഡ്ഢിയല്ല; കെകെആറിൽ ഒപ്പം പ്രവർത്തിക്കാൻ ഗ്രെഗ് ചാപ്പൽ ഇമെയിൽ അയച്ചിരുന്നു; വെളിപ്പെടുത്തലുമായി സൗരവ് ഗാംഗുലി

മത്സരത്തിൽ രാജസ്ഥാനെതിരെ ഡൽഹി ക്യാപിറ്റൽസ് തകർപ്പൻ വിജയമാണ് സ്വന്തമാക്കിയത്. രാജസ്ഥാൻ ഉയർത്തിയ 226 റൺസ് വിജയലക്ഷ്യം 5 പന്തുകൾ ബാക്കിനിൽക്കെ ഡൽഹി മറികടന്നു. ഐപിഎൽ ചരിത്രത്തിൽ ഡൽഹിയുടെ ഏറ്റവും ഉയർന്ന വിജയകരമായ റൺ ചേസാണിത്.

ഓപ്പണർമാരായ കെ.എൽ രാഹുലിന്റെയും (40 പന്തിൽ 75) പതും നിസ്സങ്കയുടെയും (33 പന്തിൽ 62) അർദ്ധസെഞ്ചുറികളാണ് ഡൽഹിക്ക് കൂറ്റൻ വിജയമൊരുക്കിയത്. ഇരുവരും ചേർന്ന് ഒന്നാം വിക്കറ്റിൽ 110 റൺസാണ് കൂട്ടിച്ചേർത്തിയത്. നിതീഷ് റാണ (33), അഷുതോഷ് ശർമ്മ (25*), ട്രിസ്റ്റൻ സ്റ്റബ്സ് (18*) എന്നിവരുടെ മികച്ച പ്രകടനങ്ങളും ഡൽഹിക്ക് കരുത്തായി. തുടർച്ചയായ മൂന്ന് തോൽവികൾക്ക് ശേഷമാണ് ഡൽഹി ക്യാപിറ്റൽസ് വിജയവഴിയിൽ തിരിച്ചെത്തുന്നത്.

നേരത്തെ ടോസ് നേടി ആദ്യം ബാറ്റ് ചെയ്ത രാജസ്ഥാൻ നിശ്ചിത 20 ഓവറിൽ 6 വിക്കറ്റ് നഷ്ടത്തിൽ 225 റൺസ് എന്ന കൂറ്റൻ സ്കോർ സ്വന്തമാക്കിയിരുന്നു. ക്യാപ്റ്റൻ റിയാൻ പരാഗിന്റെ തകർപ്പൻ ബാറ്റിംഗാണ് (50 പന്തിൽ 90 റൺസ്) രാജസ്ഥാന് കരുത്തായത്. ഈ സീസണിൽ താരത്തിന്റെ ആദ്യ ഫിഫ്റ്റി പ്ലസ് സ്കോർ കൂടിയാണിത്. വെറും 14 പന്തിൽ 47 റൺസെടുത്ത് പുറത്താകാതെ നിന്ന ഡോണോവൻ ഫെരേരയും രാജസ്ഥാനായി വെടിക്കെട്ട് പ്രകടനം പുറത്തെടുത്തു.

ആദ്യ രണ്ട് ഓവറുകൾക്കുള്ളിൽ തന്നെ യശസ്വി ജയ്‌സ്വാൾ (6), വൈഭവ് സൂര്യവംശി (4) എന്നിവരെ നഷ്ടപ്പെട്ട രാജസ്ഥാനെ പരാഗും ധ്രുവ് ജുറേലും (42) ചേർന്നാണ് കരകയറ്റിയത്. പഞ്ചാബ് കിംഗ്സിനെതിരായ കഴിഞ്ഞ മത്സരത്തിനിടെ ഗ്രൗണ്ടിൽ വെച്ച് വേപ്പ് ചെയ്തതിന് പിഴ ചുമത്തപ്പെട്ടതിന് പിന്നാലെയാണ് പരാഗ് മിന്നും ഫോമിലേക്ക് തിരിച്ചെത്തിയത്. ഡൽഹിക്കായി മിച്ചൽ സ്റ്റാർക്ക് 40 റൺസ് വഴങ്ങി പരാഗിന്റേത് ഉൾപ്പെടെ മൂന്ന് വിക്കറ്റുകൾ വീഴ്ത്തി.

https://twitter.com/i/status/2050239219424260546