ഐപിഎൽ 2026-ലെ ആവേശകരമായ പോരാട്ടത്തിൽ മുംബൈ ഇന്ത്യൻസിനെ എട്ട് വിക്കറ്റിന് തകർത്ത് ചെന്നൈ സൂപ്പർ കിംഗ്സ്. ബാറ്റിംഗിലും ബൗളിംഗിലും ഒരുപോലെ തിളങ്ങിയ ചെന്നൈ, മുംബൈ ഉയർത്തിയ 160 റൺസ് വിജയലക്ഷ്യം 11 പന്തുകൾ ബാക്കിനിൽക്കെ മറികടന്നു. ക്യാപ്റ്റൻ റുതുരാജ് ഗെയ്ക്വാദും യുവതാരം കാർത്തിക് ശർമ്മയും നേടിയ അർദ്ധ സെഞ്ച്വറികളാണ് ചെന്നൈയുടെ വിജയം എളുപ്പമാക്കിയത്.
മുംബൈ ഇന്നിംഗ്സിന്റെ 12-ാം ഓവറിലായിരുന്നു മത്സരത്തിലെ ഏറ്റവും ശ്രദ്ധേയമായ ആ നാടകീയ സംഭവം. സിഎസ്കെ ഓൾറൗണ്ടർ ജാമി ഓവർട്ടന്റെ പന്തിൽ സ്കൂപ്പ് ഷോട്ടിന് ശ്രമിച്ചതായിരുന്നു മുംബൈ താരം തിലക് വർമ്മ. എന്നാൽ ഷോട്ട് പിഴയ്ക്കുകയും പന്ത് നേരെ തിലകിന്റെ കയ്യിലിരുന്ന വാച്ചിൽ വന്ന് അടിക്കുകയുമായിരുന്നു. പന്തിന്റെ ആഘാതത്തിൽ വാച്ച് തെറിച്ച് ഗ്രൗണ്ടിൽ വീണു.
ഏകദേശം 28,000 രൂപ വിലവരുന്ന ‘WHOOP’ ഫിറ്റ്നസ് ബാൻഡ് ആയിരുന്നു താരം ധരിച്ചിരുന്നത്. പന്ത് കയ്യിൽ തട്ടിയതിനെത്തുടർന്ന് താരം വൈദ്യസഹായം തേടിയെങ്കിലും പിന്നീട് ബാറ്റിംഗ് തുടർന്നു. ഭാഗ്യവശാൽ വാച്ചിന് കാര്യമായ കേടുപാടുകൾ സംഭവിച്ചില്ല. എങ്കിലും ഈ സംഭവത്തിന് ശേഷം വെറും രണ്ട് പന്തുകൾ കൂടി മാത്രമേ തിലകിന് ക്രീസിൽ തുടരാനായുള്ളൂ. അഞ്ച് റൺസെടുത്ത താരം ഉടൻ തന്നെ പുറത്തായി.
ആദ്യം ബാറ്റ് ചെയ്ത മുംബൈ ഇന്ത്യൻസിന് നിശ്ചിത 20 ഓവറിൽ 7 വിക്കറ്റ് നഷ്ടത്തിൽ 159 റൺസെടുക്കാനേ കഴിഞ്ഞുള്ളൂ. 57 റൺസെടുത്ത നമൻ ധീറും 37 റൺസെടുത്ത റയാൻ റിക്കൽട്ടനും മാത്രമാണ് മുംബൈ നിരയിൽ തിളങ്ങിയത്. ചെന്നൈയ്ക്കായി അൻഷുൽ കംബോജ് മൂന്ന് വിക്കറ്റും നൂർ അഹമ്മദ് രണ്ട് വിക്കറ്റും വീഴ്ത്തി.
മറുപടി ബാറ്റിംഗിൽ ചെന്നൈയുടെ തുടക്കം തകർച്ചയോടെയായിരുന്നെങ്കിലും ഗെയ്ക്വാദും (67*), കാർത്തിക് ശർമ്മയും (54*) ചേർന്ന് ടീമിനെ വിജയത്തിലെത്തിച്ചു. കാർത്തിക് ശർമ്മയുടെ ഐപിഎൽ കരിയറിലെ ആദ്യ അർദ്ധ സെഞ്ച്വറിയായിരുന്നു ഇത്. മുംബൈ ബൗളർമാരിൽ ജസ്പ്രീത് ബുംറയും ഗസൻഫറും ഓരോ വിക്കറ്റ് വീതം വീഴ്ത്തി.
ഈ വിജയത്തോടെ പോയിന്റ് പട്ടികയിൽ ചെന്നൈ തങ്ങളുടെ നില മെച്ചപ്പെടുത്തി. തിലക് വർമ്മയുടെ വാച്ച് തെറിച്ചുപോകുന്ന വീഡിയോ ഇപ്പോൾ സമൂഹമാധ്യമങ്ങളിൽ വൻതോതിൽ പ്രചരിക്കുന്നുണ്ട്.
https://twitter.com/i/status/2050602195503259977
