ഐ.പി.എൽ 2026 സീസണിൽ ഇതിഹാസ താരം എം.എസ്. ധോണി ചെന്നൈ സൂപ്പർ കിങ്സിലേക്ക് തിരിച്ചുവരാനുള്ള സാധ്യതകൾ മങ്ങുന്നു. ചെന്നൈയുടെ മുൻ താരം കൂടിയായ ആർ. അശ്വിനാണ് ധോണിയുടെ മടങ്ങിവരവിനെക്കുറിച്ച് സംശയം പ്രകടിപ്പിച്ചത്. സീസൺ തുടങ്ങുന്നതിന് തൊട്ടുമുമ്പ് നേരിട്ട പേശീവലിച്ചിൽ കാരണം ഈ സീസണിൽ ഒരു മത്സരം പോലും ധോണി കളിച്ചിട്ടില്ല.
ധോണിയുടെ അഭാവത്തിലും ടീം ഇപ്പോൾ മികച്ച ഫോമിലേക്ക് തിരിച്ചെത്തിയ സാഹചര്യത്തിൽ അശ്വിന്റെ നിരീക്ഷണങ്ങൾ ഏറെ ചർച്ചയാകുകയാണ്. ചെന്നൈയുടെ പ്ലേ ഓഫ് പ്രതീക്ഷകൾ അവസാനിച്ചാൽ മാത്രമേ ഇനി ധോണി മൈതാനത്ത് ഇറങ്ങാൻ സാധ്യതയുള്ളൂ എന്ന് അശ്വിൻ തന്റെ യൂട്യൂബ് ചാനലിലൂടെ പറഞ്ഞു.
“ധോണി തിരിച്ചെത്തിയാൽ ടീമിന്റെ നിലവിലെ ബാലൻസ് മാറും. അത് പ്രായോഗികമായി ബുദ്ധിമുട്ടുള്ള കാര്യമാണ്. അതുകൊണ്ട് തന്നെ അദ്ദേഹം മടങ്ങിവരാനുള്ള സാധ്യത വളരെ കുറവാണ്. അടുത്ത മൂന്ന് കളികളിൽ രണ്ടെണ്ണം ചെന്നൈ തോറ്റാൽ ഒരുപക്ഷേ ചെന്നൈയിൽ വെച്ച് അദ്ദേഹത്തിന് ഒരു വിടവാങ്ങൽ മത്സരം നൽകിയേക്കാം,” അശ്വിൻ വ്യക്തമാക്കി.
സീസണിന്റെ തുടക്കത്തിൽ ധോണിയുടെ അഭാവം ചെന്നൈയെ വല്ലാതെ ബാധിച്ചിരുന്നു. എന്നാൽ ഇപ്പോൾ ടീം താളം കണ്ടെത്തിയിരിക്കുകയാണ്. ടീമിന്റെ ബാറ്റിംഗ് നിര കൂടുതൽ കരുത്തായി. സഞ്ജു സാംസൺ മധ്യ ഓവറുകളിൽ നടത്തുന്ന പ്രകടനങ്ങൾ ടീമിന് വലിയ മുതൽക്കൂട്ടാണ്. നിലവിലെ ടീം കോമ്പിനേഷൻ മാറ്റുന്നത് ടീമിന്റെ താളം തെറ്റിക്കുമെന്ന് അശ്വിൻ കരുതുന്നു.
ഡൽഹി ക്യാപിറ്റൽസിനെതിരായ വിജയത്തോടെ 10 മത്സരങ്ങളിൽ നിന്ന് 10 പോയിന്റുമായി ചെന്നൈ ആറാം സ്ഥാനത്താണ്. രണ്ട് മുതൽ അഞ്ച് വരെ സ്ഥാനങ്ങളിലുള്ള ടീമുകളുമായി വെറും രണ്ട് പോയിന്റ് വ്യത്യാസം മാത്രമാണ് ചെന്നൈയ്ക്കുള്ളത്.
