ടി20 ലോകകപ്പ് കിരീടം നേടിയിട്ടും സൂര്യകുമാർ യാദവിനെ നായകസ്ഥാനത്ത് നിന്ന് നീക്കാനുള്ള ബിസിസിഐ നീക്കങ്ങൾ സജീവമാകുന്നു. ശ്രേയസ് അയ്യർക്ക് പിന്നാലെ മലയാളി താരം സഞ്ജു സാംസണും നായകസ്ഥാനത്തേക്ക് പരിഗണിക്കപ്പെടുന്നു എന്നതാണ് ഏറ്റവും പുതിയ റിപ്പോർട്ടുകൾ. ഇന്ത്യൻ ടി20 ടീമിന്റെ നായകസ്ഥാനത്ത് നിന്ന് സൂര്യകുമാർ യാദവ് ഉടൻ പുറത്തായേക്കുമെന്ന് സൂചന. മോശം ബാറ്റിംഗ് ഫോം സൂര്യകുമാറിന് തിരിച്ചടിയാകുമ്പോൾ, പകരക്കാരനായി സഞ്ജു സാംസണെയും പരിഗണിക്കുന്നതായാണ് റിപ്പോർട്ടുകൾ. നേരത്തെ ശ്രേയസ് അയ്യരുടെ പേര് ഉയർന്നു കേട്ടിരുന്നെങ്കിലും സഞ്ജുവിനും ഇപ്പോൾ വലിയ സാധ്യത കൽപ്പിക്കപ്പെടുന്നു.
2024 ടി20 ലോകകപ്പ് മുതൽ സഞ്ജു ഇന്ത്യൻ ടി20 ടീമിലെ സ്ഥിരസാന്നിധ്യമാണ്. അന്താരാഷ്ട്ര തലത്തിൽ താരം ഇതിനോടകം തന്നെ തന്റെ കഴിവ് തെളിയിച്ചു കഴിഞ്ഞു. ഐപിഎൽ 2026-ൽ ചെന്നൈ സൂപ്പർ കിംഗ്സിനായി സഞ്ജു തകർപ്പൻ ഫോമിലാണ് കളിക്കുന്നത്. ഈ സീസണിൽ ഏറ്റവും കൂടുതൽ റൺസ് നേടിയ താരങ്ങളിൽ ഒരാളാണ് അദ്ദേഹം. രാജസ്ഥാൻ റോയൽസിനെ നയിച്ചുള്ള പരിചയസമ്പത്തും നായകൻ എന്ന നിലയിലുള്ള മികച്ച പ്രതിച്ഛായയും സഞ്ജുവിന് അനുകൂല ഘടകങ്ങളാണ്.
പഞ്ചാബ് കിംഗ്സിനായി ഐപിഎല്ലിൽ മികച്ച പ്രകടനം നടത്തുന്നുണ്ടെങ്കിലും ശ്രേയസ് അയ്യർ അന്താരാഷ്ട്ര ടി20 മത്സരങ്ങളിൽ നിന്ന് ഏറെക്കാലമായി വിട്ടുനിൽക്കുകയാണ്. 2023 ഡിസംബർ 3-നാണ് അദ്ദേഹം അവസാനമായി ഇന്ത്യയ്ക്ക് വേണ്ടി ടി20 കളിച്ചത്. ഇത്രയും വലിയ ഇടവേളയ്ക്ക് ശേഷം നേരിട്ട് ടീമിലെത്തി നായകസ്ഥാനം ഏറ്റെടുക്കുന്നത് പ്രായോഗിക ബുദ്ധിമുട്ടുകൾ ഉണ്ടാക്കിയേക്കാം.
ജൂൺ-ജൂലൈ മാസങ്ങളിൽ നടക്കാനിരിക്കുന്ന ഇംഗ്ലണ്ട്, അയർലൻഡ് പര്യടനങ്ങളിൽ സൂര്യകുമാർ യാദവിനെ തന്നെ നായകനായി നിലനിർത്തിയേക്കാം. എന്നാൽ ഐപിഎല്ലിലെ മോശം ഫോം ഈ പര്യടനങ്ങളിലും തുടർന്നാൽ അദ്ദേഹം നായകസ്ഥാനത്ത് നിന്ന് നീക്കപ്പെടുമെന്ന് ഉറപ്പാണ്. 10 ഐപിഎൽ മത്സരങ്ങളിൽ നിന്ന് വെറും 195 റൺസ് മാത്രമാണ് സൂര്യകുമാറിന് ഇതുവരെ നേടാനായത്.
അന്താരാഷ്ട്ര ടി20യിൽ 62 മത്സരങ്ങളിൽ നിന്ന് മൂന്ന് സെഞ്ചുറികളും ആറ് അർദ്ധ സെഞ്ചുറികളും ഉൾപ്പെടെ 1,399 റൺസ് സഞ്ജു സാംസൺ നേടിയിട്ടുണ്ട്. ഇന്ത്യയുടെ ലോകകപ്പ് വിജയത്തിലും സഞ്ജു നിർണ്ണായക പങ്ക് വഹിച്ചിരുന്നു.
