മിഡിൽ ഈസ്റ്റിലെ യുദ്ധസാഹചര്യങ്ങളും ബംഗ്ലാദേശിലെ രാഷ്ട്രീയ അസ്ഥിരതയും കാരണം അന്താരാഷ്ട്ര രോഗികളുടെ എണ്ണത്തിൽ കുറവുണ്ടായെങ്കിലും, 2025-26 സാമ്പത്തിക വർഷത്തിൽ ഇന്ത്യയിലെ പ്രമുഖ ലിസ്റ്റഡ് ആശുപത്രികളുടെ മെഡിക്കൽ ടൂറിസം വരുമാനത്തിൽ വർദ്ധനവെന്ന് റിപ്പോർട്ടുകൾ. വിദേശ രോഗികളുടെ എണ്ണത്തിലുണ്ടായ കുറവ് മറികടക്കാൻ കൂടുതൽ സങ്കീർണ്ണമായ ചികിത്സാ രീതികൾ അവലംബിച്ചതും പുതിയ വിപണികളിലേക്ക് ശ്രദ്ധ കേന്ദ്രീകരിച്ചതും ആശുപത്രികളെ സഹായിച്ചു.
പ്രതിസന്ധിയുടെ പ്രാരംഭ ഘട്ടത്തിൽ, നേരത്തെ തന്നെ ഇന്ത്യയിൽ എത്തിയിരുന്ന വിദേശ രോഗികൾക്കാണ് ആശുപത്രികൾ പ്രധാനമായും ചികിത്സ നൽകിയിരുന്നതെന്നും ആ മാസത്തിൽ ബിസിനസ്സിൽ ഏകദേശം 7 ശതമാനത്തോളം ഇടിവ് രേഖപ്പെടുത്തിയതായും ഫോർട്ടിസ് ഹെൽത്ത്‌കെയർ ഗ്രൂപ്പ് ചീഫ് ഓപ്പറേറ്റിംഗ് ഓഫീസർ അനിൽ വിനായക് വ്യക്തമാക്കി. എങ്കിലും, 2024-25 സാമ്പത്തിക വർഷത്തിലെ 539 കോടി രൂപയിൽ നിന്ന് 18.5 ശതമാനം വളർച്ചയോടെ 2025-26-ൽ മെഡിക്കൽ ടൂറിസം വരുമാനം 639 കോടി രൂപയായി ഉയർത്താൻ ഫോർട്ടിസിന് സാധിച്ചു. സമാനമായി മാക്സ് ഹെൽത്ത്‌കെയർ , മേദാന്ത എന്നീ പ്രമുഖ ഗ്രൂപ്പുകളും തങ്ങളുടെ അന്താരാഷ്ട്ര ബിസിനസ്സിൽ മികച്ച വളർച്ച കൈവരിച്ചു.
പടിഞ്ഞാറൻ ഏഷ്യയിലെ സംഘർഷങ്ങൾ കാരണം രോഗികളുടെ വരവ് കുറഞ്ഞെങ്കിലും, ഹൃദയ ശസ്ത്രക്രിയകൾ, അവയവ മാറ്റിവെക്കൽ, കാൻസർ ചികിത്സ , റോബോട്ടിക് സർജറികൾ തുടങ്ങിയ സങ്കീർണ്ണവും ചിലവേറിയതുമായ ചികിത്സകൾക്കായി ഇന്ത്യയിലെത്തുന്ന രോഗികളുടെ എണ്ണത്തിൽ വർദ്ധനവുണ്ടായതാണ് വരുമാനം ഉയരാൻ കാരണമായതെന്ന് മാക്സ് ഹെൽത്ത്‌കെയർ വക്താവ് അറിയിച്ചു.
മറ്റൊരു പ്രമുഖ ശൃംഖലയായ അപ്പോളോ ഹോസ്പിറ്റൽസ് തങ്ങളുടെ കൃത്യമായ വരുമാന കണക്കുകൾ പുറത്തുവിട്ടിട്ടില്ലെങ്കിലും, ബംഗ്ലാദേശിൽ നിന്നുള്ള രോഗികളുടെ കുറവ് സാമ്പത്തിക വർഷത്തെ പ്രകടനത്തെ ചെറിയ രീതിയിൽ ബാധിച്ചതായി അപ്പോളോയുടെ മാനേജിംഗ് ഡയറക്ടർ സുനിത റെഡ്ഡി വ്യക്തമാക്കി. സാധാരണയായി ഇന്ത്യയിൽ മെഡിക്കൽ വിസയിൽ എത്തുന്ന വിദേശികളിൽ 75 ശതമാനത്തോളം പേർ ബംഗ്ലാദേശിൽ നിന്നുള്ളവരാണ്. എന്നാൽ ഇരുരാജ്യങ്ങളും തമ്മിലുള്ള സമീപകാല പ്രശ്നങ്ങൾ കാരണം ഇതിൽ കുറവുണ്ടായതോടെ ആശുപത്രികൾ ആഫ്രിക്ക, തെക്കുകിഴക്കൻ ഏഷ്യ, സി.ഐ.എസ് രാജ്യങ്ങൾ എന്നിവടങ്ങളിൽ നിന്നുള്ള പുതിയ വിപണികളിലേക്ക് ശ്രദ്ധ തിരിച്ചു.
ആസ്റ്റർ ഡിഎം ഹെൽത്ത്‌കെയർ ഡെപ്യൂട്ടി മാനേജിംഗ് ഡയറക്ടർ അലീഷ മൂപ്പൻ വ്യക്തമാക്കിയതനുസരിച്ച്, ഈ മേഖലയിൽ കമ്പനി 41 ശതമാനം വാർഷിക വളർച്ച നേടിയിട്ടുണ്ട്. പടിഞ്ഞാറൻ ഏഷ്യയിലെ പ്രതിസന്ധി കാരണം ഉണ്ടായ കുറവ് മറികടക്കാൻ മാലിദ്വീപിൽ നിന്നുള്ള രോഗികളുടെ ഒഴുക്ക് സഹായിച്ചതുമൂലം കേരളത്തിലെ മാത്രം മെഡിക്കൽ ടൂറിസം വരുമാനത്തിൽ 51 ശതമാനം വളർച്ചയുണ്ടായതായി അവർ കൂട്ടിച്ചേർത്തു.
പടിഞ്ഞാറൻ ഏഷ്യയിലെ പ്രശ്നങ്ങൾ താൽക്കാലികമാണെന്നും വരും മാസങ്ങളിൽ ഈ പ്രതിസന്ധികൾ അവസാനിക്കുന്നതോടെ ബംഗ്ലാദേശ്, മിഡിൽ ഈസ്റ്റ് വിപണികൾ ശക്തമായി തിരിച്ചുവരുമെന്നും 2026-27 സാമ്പത്തിക വർഷത്തിൽ മെഡിക്കൽ ടൂറിസം മേഖല കൂടുതൽ കരുത്ത് നേടുമെന്നുമാണ് ഇന്ത്യൻ ആരോഗ്യ മേഖലയിലെ വിദഗ്ദ്ധർ പ്രതീക്ഷിക്കുന്നത്.
